بۇگىن, 2017 جىلعى 17 قاراشادا «University Medical Center» كورپوراتيۆتىك قورىنىڭ انا مەن بالا ۇلتتىق عىلىمي ورتالىعىندا شالا تۋعان بالالاردىڭ حالىقارالىق كۇنىنە ارنالعان شارا ۇيىمداستىرىلدى. اكتسيا اياسىندا ەلىمىزدىڭ بارلىق وڭىرلەرىنەن كەلگەن شالا تۋىلعان بالالار مەديتسينالىق تەكسەرىستەن وتكىزىلىپ, مەرەكەلىك كونتسەرتتە پاتسيەنتتەردىڭ اتا-انالارى مەن نەوناتولوگ دارىگەرلەر ونەر كورسەتتى, انيماتورلار بالالاردىڭ كوڭىلدەرىن كوتەرىپ, ەستەلىك سىيلىقتار تابىس ەتتى.
«UMC» كورپوراتيۆتىك قورىنىڭ رەسپۋبليكالىق دياگنوستيكالىق ورتالىعىنىڭ پەدياتريا ءبولىمىنىڭ جانە انا مەن بالا ۇلتتىق عىلىمي ورتالىعىنىڭ 14 ءتۇرلى سالا بويىنشا 30-دان استام ماماندارى: نەوناتولوگ, پەدياتر, حيرۋرگ, ورتوپەد, ۋرولوگ, كارديولوگ, پۋلمونولوگ, نەفرولوگ, ەندوكرينولوگ, گاستروەنتەرولوگ, نەۆروپاتولوگ, وتورينولارينگولوگ, وكۋليست جانە دەرماتولوگ دارىگەرلەرى كەلگەن بالالاردى تەكسەرۋدەن وتكىزىپ, كەڭەستەرىن بەردى. زەرتتەۋ ناتيجەلەرى بويىنشا بالالاردىڭ ءبىرازى جان-جاقتى تەرەڭدەتىلگەن دياگنوستيكالىق-ينسترۋمەنتالدىق زەرتتەۋدەن وتۋگە جىبەرىلدى. جاتىپ ەم الۋعا مۇقتاج بالالارعا جوسپارلى تۇردە ەمدەۋدەن وتۋگە كەڭەس بەرىلدى. سونداي-اق, تەكسەرۋدەن وتكىزىلگەن پاتسيەنتتەردىڭ ىشىنەن اۋىر جانە كۇردەلى دەرتتەر انىقتالعاندارى «UMC» كورپوراتيۆتىك قورىنىڭ انا مەن بالا ۇلتتىق عىلىمي ورتالىعىندا 2018 جىلدىڭ باسىندا ستاتسيونارلىق ەم الاتىن بولدى. ەم اقىسىز نەگىزدە تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە كورسەتىلەدى. ال دەنساۋلىقتارى كەڭىنەن زەرتتەۋدى قاجەت ەتەتىن بالالار «UMC» كورپوراتيۆتىك قورىنىڭ رەسپۋبليكالىق دياگنوستيكالىق ورتالىعىنا امبۋلاتوريالىق-دياگنوستيكالىق تەكسەرۋگە باعىتتالدى.
