«بۇل – ءبىز ءۇشىن كەزەكتى ءىس-شارانىڭ ءبىرى ەمەس, ۇلكەن تاريحي مىندەت. سوندىقتان دا قازاق ءتىلىن لاتىن گرافيكاسىنا اۋىستىرۋ ءىسىنىڭ ارقالايتىن جۇگى سالماقتى, جاۋاپكەرشىلىگى مول. راس, جاڭا ءالفاۆيتتى ءبىر دەمدە, ءبىر ساتتە ەنگىزە سالۋدىڭ ەشقانداي قيىندىعى جوق. الايدا گاپ باسقادا. مۇنىڭ ءوزى ونىڭ ءتيىمدى جولدارى مەن تۇتقالارىن تابۋ بولىپ تابىلادى. ءبىز بۇگىن سول ءۇشىن دە جينالىپ وتىرمىز», دەدى جيىنعا توراعالىق ەتكەن اقتوبە وبلىسىنىڭ اكىمى بەردىبەك ساپارباەۆ.
بۇدان كەيىنگى كەزەكتە قازاق ءتىلى ءالىپبيىن لاتىن گرافيكاسىنا اۋىستىرۋ قاجەتتىلىگىن اتاپ كورسەتكەن مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى جاريالانعاننان كەيىن وڭىردە قۇرىلعان اقپاراتتىق-ءتۇسىندىرۋ توپتارىنىڭ قىزمەتى ءالى كۇنگە دەيىن جالعاسىپ كەلە جاتقانى ايتىلدى. تەك ەندىگى كەزەكتە ونىڭ سونى سيپاتى مەن ۋاقىت ەرەكشەلىگىنە ساي جاڭا تۇجىرىمدارعا باسىمدىق بەرىلمەك.
اقتوبە وبلىستىق تىلدەردى دامىتۋ باسقارماسىنىڭ باسشىسى گۇلايىم تولەباەۆانىڭ ايتۋىنشا, ايماقتا لاتىن گرافيكاسىنا كوشۋگە بايلانىستى حالىقتىڭ وي-پىكىرىن ايقىنداۋ جونىندە ءتيىستى ءىس-شارالار كەشەنى بەلگىلەنىپ, جۇزەگە اسقان. الەۋمەتتىك ساۋالناما قورىتىندىلارى وبلىس تۇرعىندارىنىڭ تۇگەلگە دەرلىك بولىگى اتالعان رەفورمانى قولداعانىن كورسەتكەن. ال قازىرگى كەزدە مۇندا جاڭا قازاق ءالىپبيىنىڭ ناقتى قانداي نۇسقادا كورىنىس تاباتىنى جونىندە كەڭ اۋقىمدى پىكىرتالاستار ورىستەپ كەلەدى.
باسقوسۋ كەزىندە جاڭا ءالفاۆيتتى ەنگىزۋ جۇمىستارى كەزەڭ-كەزەڭ بويىنشا قولعا الىنۋىنا بايلانىستى ءبىرىنشى كەزەكتە مۇعالىمدەردىڭ بىلىكتىلىگىن ارتتىرۋعا كوڭىل ءبولىنۋى قاجەتتىگى اتالىپ ءوتتى. سونىمەن بىرگە لاتىن گرافيكاسىن ەنگىزۋدىڭ تاعى ءبىر ءتيىمدى تەتىگىنىڭ ءبىرى ادىستەمەلىك بازانى دامىتۋ بولماق. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى, فيلولوگيا فاكۋلتەتىنىڭ دەكانى, فيلولوگيا عىلىمدارىنىڭ دوكتورى گۇلزات ساديروۆا ءوز ويىن وسى تۇرعىدان ءوربىتتى. جيىن بارىسىندا ورتاعا تاستالعان تاعى ءبىر ماڭىزدى ماسەلەنىڭ ءبىرى – مەملەكەتتىك ءتىل توڭىرەگىندەگى رەفورمالاردى باق ارقىلى كورسەتۋ مەن جاريالاۋعا قاتىستى تۋىندادى. بۇل ورايدا «شامشىراق-اقتوبە» جشس باسشىسى راۋكەن وتىنشين جانە «قازاقستان رترك» اق فيليالىنىڭ ديرەكتورى ەرنۇر بۋراحان وسى باعىتتا قولعا الىنعان جۇمىستار تۋرالى بايانداپ بەردى. اتاپ ايتقاندا, ر.وتىنشين پرەزيدەنتتىڭ باعدارلامالىق ماقالاسى جاريالانعاننان كەيىنگى العاشقى كۇندەردەن باستاپ-اق ءتۇسىندىرۋ جۇمىستارى سەرىكتەستىككە قاراستى بارلىق اقپاراتتىق رەسۋرستا كەڭىنەن جۇرگىزىلە باستاعانىن بايانداپ, بۇل شارا قازىرگى كۇنى دە جالعاسىپ كەلە جاتقانىن ايتىپ بەرسە, ە.بۋراحان جاڭا تەلەماۋسىمدا «بولاشاققا باعدار: رۋحاني جاڭعىرۋ» يدەياسىن نەگىزگە العان سەگىز تەلەباعدارلاما جارىققا شىققانىن جەتكىزدى. جالپى العاندا مەملەكەت باسشىسىنىڭ باعدارلامالىق ماقالاسى «اقتوبە» تەلەارناسىنىڭ بارلىق جاڭا جوبالارىندا كورىنىس تابا باستادى دەدى ول.
كەزدەسۋ قورىتىندىسىندا قازاق ءتىلىنىڭ لاتىن جازۋىنا اۋىسۋى حالىقارالىق ستاندارتتار تالاپتارىنا ساي جۇرگىزىلىپ وتىرعانى جونىندە ءتۇيىن جاسالدى. ءوز كەزەگىندە جوعارىدا ايتىلعان ءتيىستى تالاپتارعا ساي اقپاراتتىق-ءتۇسىندىرۋ جۇمىستارى دا ودان ءارى جالعاسا بەرمەك.
تەمىر قۇسايىن,
«ەگەمەن قازاقستان»
اقتوبە
سۋرەتتە: باسقوسۋدان كورىنىس
