«قازاقستاننىڭ گەوگرافيالىق ورنالاسۋى مەن كولىك ينفراقۇرىلىمى ايىنا جاڭا ءتۇسىمنىڭ 1,5 ملن تونناسىن تاسىمالداۋ كولەمىن قامتاماسىز ەتۋگە مۇمكىندىك بەرەدى. بۇل 1 ملن توننا استىق پەن 300 مىڭ توننا ۇندى قۇرايدى», دەيدى و.قۇلاقوۆ. ونىڭ مالىمەتىنشە, ءتۇسىمنىڭ جاقسى ساپالىق جانە ساندىق كورسەتكىشتەرى استىق پەن ۇن ەكسپورتى قۇرىلىمىنىڭ وزگەرۋىنە ىقپال ەتكەن. يتاليا, تۇركيا, يران, اۋعانستان ءتارىزدى الىس ەلدەرگە ەكسپورت ارتقان. بۇل ءوز كەزەگىندە الىسقا تاسىمالداۋدىڭ ارتۋىنا جانە استىق تاسىمالى تۇتىنۋشىلىق پاركى مەن جابىق ۆاگونداردىڭ كوبەيۋىنە سەبەپشى بولىپتى. «قتج – جۇك تاسىمالى» اق-نىڭ باسشىسى ەلىمىزدە استىقتى كونتەينەرمەن ەكسپورتقا شىعارۋ جولعا قويىلاتىنىن مالىمدەدى.
ء«بىز استىق تاسىمالداۋدىڭ جاڭا تەحنولوگيالارىن ەنگىزۋ باعىتىندا دا جۇمىس جۇرگىزۋدەمىز. ماسەلەن, قازان ايىندا «قۇرىق-اليات-احالكالاكي-كارس-مەرسين» جاڭا باعىتىندا كونتەينەرمەن استىق تاسىمالداۋدىڭ بىرەگەي جوباسىن جۇزەگە اسىردىق. كەلەشەكتە بۇل باعىتتا اي سايىن 10 مىڭ تونناعا دەيىن استىق تاسىمالداۋ جوسپارلانۋدا», دەدى و.قۇلاقوۆ. نەگىزى, قازاقستان ۇنىنىڭ اۋقىمدى بولىگى اۋعانستانعا جونەلتىلەدى. ول باعىتتاعى لوگيستيكا جەتكىزۋ جىلدامدىعىنىڭ وتە تومەندىگىمەن جانە اۋعانستاننىڭ حايراتون, اكين جانە تۋرگۋندي قابىلداۋ ستانسالارىنداعى جۇكتى ءتۇسىرۋ مۇمكىندىگىنىڭ السىزدىگىمەن سيپاتتالادى. سەبەبى اۋعان تاراپىندا ۆاگونداعى جۇكتى ءتۇسىرۋ اۆتوماتتاندىرىلماعان ەكەن. جۇك تۇسىرەتىن ستانسالاردا تاۋارلار ىركىلىسى ءجيى ورىن الاتىن كورىنەدى.
ورالحان رايحان ۇلى كاسپي ارقىلى تاسىمال الەۋەتىنىڭ بارىنشا جوعارى ءوسىمىن قامتاماسىز ەتۋ ءۇشىن پورت ينفراقۇرىلىمىن دامىتۋ قولعا الىنىپ جاتقانىنا توقتالدى. «اقتاۋ پورتىن سولتۇستىككە قاراي كەڭەيتۋ جوباسى اياقتالدى. قۇرىق پورتىندا تەمىر جول جانە پاروم كەشەنى پايدالانۋعا بەرىلدى جانە كەلەسى جىلدىڭ باسىندا ونىڭ ەكىنشى فازاسى لوگيستيكالىق ينفراقۇرىلىمى مەن كەدەندىك قىزمەت كورسەتۋ ايماعى بار اۆتوموبيلدىك پاروم كەشەنىنىڭ قۇرىلىسى اياقتالاتىن بولادى», دەدى ول. كومپانيا باسشىسىنىڭ ايتۋىنشا, ءتيىستى شارۋالار اتقارىلعان سوڭ استىق تاسىمالى كەلەسى جىلى 26 ميلليون تونناعا دەيىن ارتاتىن بولادى. سونىمەن قاتار مەنشىكتى قۇرعاق جۇك تاسيتىن پارومدى فلوت قۇرىلىپ, بەس جىلدىڭ ىشىندە كەمەلەر سانى جيىرماعا جەتپەك.
اسحات رايقۇل,
«ەگەمەن قازاقستان»
