ەل وڭىرلەرىنە كومىر جونەلتىلىمىن قامتاماسىز ەتۋ ءۇشىن ۆاگوندار سانى جەتكىلىكتى ەكەنىن اڭگىمەلەگەن ول قاڭتار-قازان ايلارى ارالاعىندا كومپانيا 83,9 ميلليون توننا كومىر تاسىمالداعانىن ايتتى. بۇل وتكەن جىلعى دەڭگەيدەن 11 ميلليون تونناعا نەمەسە 15 پايىزعا ارتىق.
«قازاقستاندىق تۇتىنۋشىلارعا 56,6 ميلليون توننا وتىن تاسىمالداندى. بۇل – وتكەن جىلعى دەڭگەيدەن 17 پايىز كوپ. ەندى جىل سوڭىنا دەيىن 107 ميلليون توننا كومىر تاسىمالداۋ جوسپارلانىپ وتىر. بۇل كورسەتكىش تە بىلتىرعى دەڭگەيدەن 17 پايىزعا جوعارى», دەدى ورالحان رايحان ۇلى. ونىڭ ايتۋىنشا, قازىرگى كەزدە «قازاقستان تەمىر جولى» ۇلتتىق كومپانياسى پاركىنە «قازتەمىرترانس» اق اشىق ۆاگوندار پاركى تارتىلعان. ولاردىڭ ۇلەسى ەلىمىزدەگى اشىق ۆاگونداردىڭ جالپى پاركىنىڭ 40 پايىزدان استامىن قۇرايدى.
«كومىر قورلارىن ۋاقتىلى جيناۋ بويىنشا اكىمدىكتەرمەن بىرلەسە جۇرگىزىلگەن جۇمىستاردىڭ ارقاسىندا بارلىق جىلۋ-ەلەكتر ستانسالارى قاجەتتى كومىر قورىمەن قامتاماسىز ەتىلدى. كوممۋنالدىق-تۇرمىستىق كومىردىڭ جەتىسپەۋشىلىگى توڭىرەگىندەگى احۋال حالىققا ارنالعان كومىردى ساتىپ الۋ جانە بولۋمەن كاسىپكەرلىك قۇرىلىمنىڭ اينالىسۋىنان تۋىنداۋدا. كەي جاعدايدا ولاردىڭ جەكەمەنشىك ۆاگوندارى, كومىردى ساقتاۋ جانە تەڭدەي ءبولۋ ءۇشىن قاجەتتى قويمالارى جوق», دەگەن كومپانيا باسشىسى الداعى ۋاقىتتا كومىر تاپشىلىعىنا قاتىستى مۇنداي جايت ورىن الماۋ ءۇشىن حالىق وتىندى مامىر ايىنان باستاپ ساتىپ الۋى قاجەت ەكەنىن جەتكىزدى.
باسقوسۋدا بەلگىلى بولعانداي, كومىر جەتكىزۋگە بايلانىستى جاعداي كۇندەلىكتى ءجىتى قاداعالانىپ وتىرادى. ءار تاپسىرىستىڭ قامتاماسىز ەتىلۋىنە تاۋلىك بويى باقىلاۋ جاسالادى, كوممۋنالدىق-تۇرمىستىق سالا دا نازاردان تىس قالمايدى.
اسحات رايقۇل,
«ەگەمەن قازاقستان»
