بىرەگەي ءبىلىم وشاعىنىڭ باسشىسى سالامات يزباستينانىڭ ايتۋىنشا, وتكەن جىلى 26 وقۋشى التىن ۇيامەن قوشتاستى. سونىڭ 19-ى گرانتقا ءتۇستى. جىلدا «التىن بەلگى» جانە «ۇزدىك اتتەستات» يەگەرلەرى ۇبت-دا بىلىمدەرىن دالەلدەپ ءجۇر. بيىل «التىن بەلگىگە» 4 ۇمىتكەر بار.
مەكتەپتە بارلىعى 27 ۇيىرمە جۇمىس ىستەيدى. ونىڭ ىشىندە «ارت-ستۋدياسى», «اۋەن», «بوزتورعاي», «جاس دارىن», «تەاتر», «شەبەر قولدار», «نازەركە» بي ءانسامبلى مەن «اقجەلەڭ» دومبىرا ۇيىرمەسى ءبىلىم وشاعىنىڭ ابىرويىن ارتتىرىپ ءجۇر. 2015-2016 جىلدارى گ.اقشولاقوۆا جەتەكشىلىك ەتەتىن «نازەركە» دومبىرا ءانسامبلى حالىقارالىق «ەرلىگى – ەلگە مۇرا» بايقاۋىندا باس جۇلدەنى ولجالادى, 2 وقۋشى 1-ورىندى ەنشىلەدى. وسى جىلى ي.سماعۇلوۆا جەتەكشىلىك ەتەتىن «ناز» ءانسامبلى «سولو» اتالىمىندا باس جۇلدەنى, ورتا توپ 1-ورىندى, جوعارى توپ ءىى ورىندى يەلەندى. جۋىردا كوركەمسۋرەت مەكتەبىنىڭ بولىمشەسى اشىلادى.
گيمنازيانىڭ نەگىزىن قالاۋشى ءلايلا سىرىمبەتوۆا ءبىلىم ورداسىمەن بايلانىسىن ۇزگەن جوق. بۇگىندە استاناداعى ىبىراي التىنسارين اتىنداعى ۇلتتىق ءبىلىم اكادەمياسىندا 3 تىلدە ءبىلىم بەرەتىن ءبولىمدى باسقارادى. بىلتىردان باستاپ ءلايلا سىرىمبەتوۆا اتىنداعى ءپان وليمپياداسى ءداستۇرلى تۇردە وتكىزىلە باستادى.
«گيمنازيانىڭ جۇمىسى «قىزدار الىپپەسى» اۆتورلىق باعدارلاماسى مەن «قىزدار الىپپەسى» حرەستوماتياسىنا نەگىزدەلگەن. ءبىلىم بەرۋدەن بولەك, وسى باعدارلاما قىزداردىڭ كەلەشەكتە وتباسىنىڭ ۇيىتقىسى بولۋىنا اسەر ەتتى مە؟ سىزدەر ستاتيستيكالىق زەرتتەۋلەر جۇرگىزىپ كوردىڭىزدەر مە دەگەن ساۋالىمىزعا سالامات داۋىتقىزى: «قازاق قىزدار گيمنازياسىنىڭ باستى يدەياسى – «جۇرتىڭدى قورعايمىن دەسەڭ, ۇلىڭدى تاربيەلە, ۇلتىڭدى قورعايمىن دەسەڭ, قىزىڭدى تاربيەلە». مەكتەپتە وقۋ-تاربيە جۇمىسىنىڭ تۇجىرىمداماسى, مەكتەپ تۇلەگى مەن قازاق قىزدار گيمنازياسى مۇعالىمىنىڭ مودەلى جاسالدى, ولاردى جىل سايىن اتا-انالار قوعامى الەۋمەتتىك سۇرانىسقا ساي تولىقتىرىپ, تۇزەتىپ وتىرادى. بۇل باعدارلامانىڭ ماقساتى – ۇلتتىق رۋحاني بايلىقتى جالپىادامزاتتىق مادەنيەتپەن ۇشتاستىرا بايلانىستىرۋ ارقىلى قازاق قىزدارىن تاربيەلەۋ جانە وقىتۋ. باعدارلاما اياسىندا بارلىق وقۋ پاندەرى قامتىلعان جانە سىنىپتان تىس جۇمىستار ەنگىزىلگەن. ستاتيستيكا دەمەكشى, گيمنازيانىڭ 20 جىلدىعى قارساڭىندا وسى ارالىقتا ءبىلىم العان 2 مىڭنان استام تۇلەكتىڭ قازىرگى جاعدايىمەن سىنىپ جەتەكشىلەرى ارقىلى تانىستىق. زەرتتەۋدىڭ ناتيجەسىندە گيمنازيادا تاربيەلەنگەن قىزداردىڭ 90 پايىزى ءوز وتباسىلارىنىڭ ۇيىتقىسى بولىپ وتىرعانىنا كوز جەتكىزدىك. ياعني بىرەن-سارانى بولماسا جالعىزباستى, اجىراسقان انالار جوقتىڭ قاسى», دەپ جاۋاپ بەردى. ءارى قاراي اڭگىمەسىن ساباقتاعان ول: 2008 جىلى بىزگە عيماراتتىڭ 200 بالاعا لايىقتالعان ەكىنشى قاناتى ءبولىندى. ءبىز 183 بالامەن كوشىپ كەلدىك. 20 جىلدا بالا سانى ەكى ەسە ءوستى. بۇگىندە 403 بالا ءبىلىم الۋدا. سونىڭ سالدارىنان ەكى اۋىسىمدا جۇمىس ىستەپ جاتىرمىز. اتا-انالار تاراپىنان نارازىلىق بىلدىرۋشىلەر كوپ. وسى ماسەلە شەشىمىن تاپسا ەكەن دەيمىز», دەپ ءتۇيىنى شەشىلمەي تۇرعان ماسەلەنى دە ايتتى.
«ويدى وي قوزعايدى» دەمەكشى, دەموگرافيالىق وسىمگە بايلانىستى بۇگىندە قازاق مەكتەپتەرىنە دەگەن سۇرانىستىڭ ءوسىپ كەلە جاتقاندىعىن ۋاقىت كورسەتىپ وتىر. كەيبىر قازاق مەكتەپتەرى ەكى اۋىسىمدا جۇمىس ىستەۋگە ءماجبۇر. ەكىنشى اۋىسىمدا وقۋ نەمەسە تۇستەن كەيىن ەڭبەكتەنۋ مۇعالىمگە دە, وقۋشىعا دا قولايسىزدىق تۋدىرادى. وسىندايدا بالالارى ەكىنشى اۋىسىمدا وقيتىن اتا-انالاردىڭ وكپە-رەنىشىنە تۇسىنىستىكپەن قاراۋ كەرەك.
ايتسە دە ءبىز تۇسىنبەيتىن ءبىر جاي – قازاق مەكتەپتەرىندە بالا سانىنىڭ كوپتىگىنە قاراماستان, كەيبىر مەملەكەتتىك مەكەمەلەردى ءبىلىم ورداسىنىڭ وشاعىنا كوشىرۋ قانداي قاجەتتىلىكتەن تۋدى ەكەن دەپ ويلايسىڭ. ماسەلەن, №18 مەكتەپتىڭ ءبىر قاناتىندا قالالىق ارحيۆ, №2 مەكتەپتە پەداگوگيكالىق-پسيحولوگيالىق مەديتسينالىق ورتالىق, №36 ليتسەي-مەكتەبىندە قازاق-تۇرىك ليتسەيى ورنالاسقان. ال №25 قىزدار گيمنازياسىنىڭ كۇيى جوعارىداعىداي. بۇل گيمنازيا ۇجىمى مەن وقۋشىلار وگەي بالانىڭ كۇيىن كەشىپ, اسحانانى, سپورتزالدى, مەدپۋنكتتى №24 مەكتەپپەن بىرگە پايدالانىپ وتىر. ونىڭ وزىندە باسىمدىق – عيمارات يەسى №24 مەكتەپكە بەرىلەدى.
ءبىلىم ورداسى بالالارعا عانا قىزمەت كورسەتۋى ءتيىس دەگەن ويدامىز.
داريا ەرعازينا,
جۋرناليست
پاۆلودار وبلىسى,
ەكىباستۇز قالاسى
