وعان قالا باسشىلىعى, زيالى قاۋىم وكىلدەرى, ستۋدەنتتەر مەن جاستار تۇلعانىڭ جاقىندارى قاتىسىپ, ارنايى جاساقتالعان تۇراقتى ەكسپوزيتسيانىڭ اشىلۋىن تاماشالادى. ورال بايعونىس ۇلىنىڭ جەكە زاتتارىنىڭ ىشىندە پارلامەنتتە جانە ءار جىلدارى تۇسكەن فوتو سۋرەتتەرى, پايدالانىلعان كىتاپتارى, ەكى قالامسابى ەرەكشە نازار اۋدارادى.
«ەلىمىز تاۋەلسىزدىگىنىڭ ەلەڭ-الاڭىنان باستاپ, قازاقستان رەسپۋبليكاسى پرەزيدەنتى اكىمشىلىگىنىڭ ۇيىمداستىرۋ-باقىلاۋ جانە كادر ساياساتى باسقارماسىنىڭ مەملەكەتتىك ينسپەكتورى, پارلامەنت ءماجىلىسى توراعاسىنىڭ ورىنباسارى, پارلامەنت ءماجىلىسى توراعاسى بولىپ, مەملەكەتتىك جاۋاپتى قىزمەتتەر اتقارعان ورال بايعونىس ۇلى قازاقستانداعى باسقارۋ جانە زاڭ شىعارۋ ىسىنە مول ۇلەس قوستى. ول كىسىنىڭ ادامگەرشىلىك تۇلعاسى دا جاستارعا ۇلگى بولىپ قالا بەرەدى» دەدى ارقالىق قالاسىنىڭ اكىمى امانتاي بالعارين.
سالتاناتقا جينالعاندارعا ورال مۇحامەتجانوۆتىڭ دوسى حاميتبەك ماحمۇت ۇلى ء ىرى مەملەكەت قايراتكەرى تۋرالى ەستەلىكتەر, جۇبايى شولپان, ۇلى ەركىن ورال ۇلى ونەگەلى ءىستى وسكەلەڭ ۇرپاققا ۇلگى ەتكەن ەل ازاماتتارىنا العىس ايتتى.
ورال مۇحامەتجانوۆقا ارنالعان شارا ارقالىقتاعى ى.التىنسارين اتىنداعى مەملەكەتتىك پەداگوگيكالىق ينستيتۋتتا جالعاسىپ, «ەلىن سۇيگەن ازامات» اتتى ەسكە الۋ كەشى ءوتتى. وندا قالا اكىمىنىڭ ورىنباسارى تۇبەكباي اۋباكىروۆ ءسوز سويلەپ, قالالىق ءماسليحاتتىڭ حاتشىسى گۇلبانۋ ەلتەباەۆا ءبىرتۋار تۇلعانىڭ ءومىرى مەن قىزمەتى جايلى بايانداما جاسادى. ەڭبەك ارداگەرلەرى سەرىكباي تاپاەۆ, قايىردەن جيەنباەۆ, قر مادەنيەت قايراتكەرى جۇماعالي ومىربەك, قاراتاي نۇرمانوۆتار ەستەلىكتەرىن ايتتى.
ەلىنە تۇتقا بولعان اسىل پەرزەنتتىڭ 70 جىلدىق مەرەيتويى قارساڭىندا قالالىق ءبىلىم ءبولىمىنىڭ ۇيىتقى بولۋىمەن وتكىزىلگەن مەكتەپشىلىك «ورال مۇحامەدجانوۆ – مەملەكەت قايراتكەرى» تاقىرىبىنداعى شىعارماشىلىق جۇمىستار (شىعارما, رەفەرات) بايقاۋىنىڭ جەڭىمپازدارى ماراپاتتالدى.
ءنازيرا جارىمبەت
«ەگەمەن قازاقستان»
قوستاناي
