15 قاراشا، 2017

ءتۇرلى ءومىردى باستان كەشۋ مۇمكىندىگى

276 رەت كورسەتىلدى

ونى ادامعا كىتاپ قانا بەرە الادى

«كىتاپ – ماڭگىلىك، ويتكەنى ول ادامعا كوپتەگەن ءومىردى باستان كەشۋ مۇمكىندىگىن بەرەدى» دەگەن ەكەن رۋنەتتەگى Lib.ru ەلەكتروندى كىتاپحاناسىن قۇرۋشى ماكسيم موشكوۆ جۋىقتا جۋرناليستەردىڭ بىرىنە بەرگەن سۇحباتىندا.

وسى ءسوز ءبىزدى ويلاندىرىپ تاستادى. راس-اۋ دەيمىز ىشتەي. وسىلاي دەپ ويلايمىز دا، ءوزىمىزدىڭ بالا كەزدەن باستاپ وقىعان كىتاپتارىمىزدى ەسكە تۇسىرە باستايمىز: «جاۋ تىلىنداعى بالا»، «پارتيزان قىزى»، «ولگەندەر قايتىپ كەلمەيدى»، «ماحاببات قىزىق مول جىلدار»، «كۇتۋمەن وتكەن عۇمىر»، «سوڭعى كوش»، «اباي جولى»، «قىزىل مەن قارا»، «ايۆەنگو»، «جۇمباق سالت اتتى»، «قاھار»، «جانتالاس»، «الماس قىلىش»، «سوعىس جانە بەيبىتشىلىك»، «اننا كارەنينا»... وسىلاي جالعاسىپ كەتە بەرەدى.

ويلاپ قاراساق 13-14 جاستان باستاپ، 25 جاسقا دەيىنگى ءومىرىمىز جۇيەلى تۇردە كوركەم شىعارمالار وقۋمەن وتكەن ەكەن. مۇنان كەيىن كىتاپ وقۋدى قويىپ كەتپەسەك تە، سيرەتە تۇستىك. وعان قىزمەتكە ارالاسۋ، وتباسىن اسىراۋ، العاشقى نارىق قيىندىقتارى، ۋاقىت تاپشى­لىعى سەكىلدى ءارتۇرلى پروبلەمالاردىڭ ىقپال ەتكەنى انىق. بىراق ومىرگە قاجەتتى رۋحاني ازىعىمىزدى سول ءبىر كىتاپتى جۇيەلى تۇردە وقىعان بوزبالا، جىگىتتىك شاعىمىزدا الىپپىز. قازىر ناقتى سانىن ەسەپتەپ جاتقان كىم بار، سول تۇستا كەمىندە ءبىر 100 كىتاپ وقىعان شىعارمىز. دەمەك جۇزدەگەن ءومىردى باستان كەشكەندەي اسەرگە بولەنگەندىگىمىز انىق.

قازىر ويلاپ قاراسام، كىتاپ وقۋدىڭ، سونىڭ ىشىندە كوركەم شىعارمالار، اسىرەسە روماندار وقۋدىڭ قىزىعىنا كوپ ەشتەڭە جەتپەيتىن سەكىلدى. الەمگە، قالا­بەردى ەلىمىزگە ايگىلى كلاسسيكتەردىڭ جازعان شىعارمالارى جانىڭدى باۋراپ الاتىندىعى سونداي، ءبىرازدان كەيىن سەن كىتاپتا جازىلىپ جاتقان وقيعالاردىڭ ىشىنە ەنىپ كەتەسىڭ دە، سولارمەن بىرگە ءومىر سۇرە باستايسىڭ. كىتاپتى اياقتاعاننان كەيىن دە ءبىراز ۋاقىت سونىڭ اسەرىمەن جۇرەسىڭ. ول اسەردەن سەنى كەلەسى ءبىر قىزىقتى كىتاپ قانا الىپ شىعا الادى. 

قازىر بولسا ادامدار كىتاپ وقىمايتىن بولدى دەگەن پىكىرلەر ءجيى ايتىلادى. راس شىعار. نارىقتىق قاتىناس ورنىققاننان بەرى كوپتەگەن ادامدار ءۇشىن ۋاقىت تاپ­شىلىعى سەزىلە باستادى. ەكىنشى جاقتان تەلەديدار مەن ينتەرنەتتىڭ دامۋى، تۆيت­تەر، فەيسبۋك سەكىلدى جانە باسقا دا الەۋ­مەتتىك جەلىلەردىڭ ىسكە قوسىلۋى قوعام بەتىن باسقا نارسەلەرگە دە بۇرا باستادى.

ماسەلەن، قازىرگى زاماننىڭ قالادا تۇراتىن كەز كەلگەن ادامىن الايىق. ونىڭ ءومىرى نەدەن تۇرادى؟ جۇمىس ىستەۋ، جۇمىسقا جەتۋ ءۇشىن كەپتەلىستە تۇرۋ، الەۋمەتتىك جەلىلەردى وقۋ، ءۇي تۇرمىسىمەن اينالىسۋ، بالا تاربيەسى، سپورتپەن شۇعىلدانۋ، ودان اسسا، كوڭىل كوتەرۋ. قىسقاسىن ايتقاندا، بۇرىنعىداي قالىڭ كىتاپتاردى وقۋعا ۋاقىتتىڭ تىم شەكتەۋلى ەكەندىگىن بايقاۋعا بولادى. بىراق كوپتەگەن ادامدار قارىن توعايىپ، كيىم كوبەيگەنىمەن ءومىردىڭ بارلىق قاجەتتىلىكتەرى وسىلارمەن عانا وتەلمەيتىندىگىن قازىردىڭ وزىندە سەزىنە باستادى. قالاي الىپ قاراساڭ دا، ءسىزدىڭ ومىرىڭىزگە بىردەڭە جەتپەي تۇرعان سەكىلدى بولادى دا تۇرادى. شاماسى، ول جەتپەي تۇرعان جان ازىعى – كىتاپ بولار. ويتكەنى ءسىز قانشا جەردەن تەلەديداردىڭ الدىندا وتىرىپ الىپ، «يزاۋرا كۇڭ»، «قاراپايىم ماريا»، «داللاس» سەكىلدى ۇزاققا سوزىلاتىن سەريالداردى كورىڭىز، بىراق ولار ءباربىر ءسىزدىڭ كىتاپ، سونىڭ ىشىندە كوركەم شىعارمالار وقۋدان الاتىن جان ازىعىڭىزدى تولتىرا المايدى.

ويتكەنى كينو مەن كىتاپ دەگەنىمىز ەكى بولەك دۇنيە. كىتاپ سىزگە ەلەستەتۋ مۇم­كىندىگىن بەرەدى. كىتاپتا ءسىز ءوتىپ جات­قان وقيعالاردىڭ كارتيناسىن ەلەستەتۋ ارقىلى ءوزىڭىز جاسايسىز. وسىلايشا كورۋگە قاراعاندا وقۋدىڭ اسەرى الدەقايدا مول بولاتىندىعىن بايقايسىز. ونىڭ ۇستىنە، سەريالداردا كەيىپكەرلەردىڭ جان كۇيزەلىستەرى، وي تولعانىستارى كىتاپتارداعىداي اسەرلى بەرىلە قويمايدى. ماسەلەن، مەن ءوز باسىم بۇرىنعى وقىعان روماندارىم، پوۆەستەرىم كەيىننەن كينوعا اينالىپ شىققان كەزدە ولاردى كورۋدەن كىتاپتاعىداي اسەر العان ەمەسپىن. ۇنەمى ەكەۋى ەكى باسقا ءومىر نەمەسە وقيعا سەكىلدى سەزىلەدى دە تۇرادى. ءسويتىپ كىتاپتىڭ سالماعى قاشاندا بولسىن باسىم ەكەندىگىنە كوز جەتكىزەمىن.

دەمەك كىتاپ وقۋ ەشۋاقىتتا ولمەي­دى. قوعامدا ۇزاق سونار وقيعالاردى قىزىعا وقيتىن ادامدار ءبارىبىر بولادى. ادامنىڭ ۋاقىتى قانشا تاپشى دەسەك تە، ءومىردىڭ ءوزى انەكدوتتاعىداي قىسقا قاشىقتىقتاردان تۇرمايدى عوي. كىتاپتاعى، رومان، پوۆەستەردەگى ءومىر قانشا جەردەن بوتەننىڭ ءومىرى بولسا دا، ءسىز وقۋ ارقىلى سونداعى كەيىپكەرلەردىڭ ومىرىنە ارالاساسىز. سولايشا ءوزىڭىز دە سول ءومىردى باستان وتكەرگەندەي بولاسىز. ەندەشە، زامان اۋىسقانىمەن ادامزات پەن حالقىمىزدىڭ ۇلى سۋرەتكەر جازۋشىلارى جاساپ كەتكەن شىعارمالار ەشۋاقىتتا ولمەيدى. بالكىم كىتاپتىڭ فورماسى وزگەرەر. ول ەندى ەلەكتروندى تۇردە بولار. بىراق ماعىناسى، جانرى بۇرىنعىسىنشا قالا بەرەدى دەگەن ويدامىز.

سۇڭعات الىپباي،
«ەگەمەن قازاقستان»

سوڭعى جاڭالىقتار

ەلىمىزدە كۇن قايتا سالقىندايدى

اۋا رايى • بۇگىن، 16:53

ەسىل وزەنىنە جاڭا كوپىر سالىنادى

ايماقتار • بۇگىن، 15:16

شىعىس قازاقستان «جاسىل» ايماقتا

ايماقتار • بۇگىن، 12:15

دوللار ارزانداپ، مۇناي قىمباتتادى

ەكونوميكا • بۇگىن، 11:36

قىركۇيەكتە حالىق ساناعى باستالادى

قازاقستان • بۇگىن، 09:47

بۇگىن ەلىمىزدە قاتتى ىستىق بولادى

قازاقستان • بۇگىن، 09:05

ۇقساس جاڭالىقتار