جيىنعا پارلامەنت سەناتى مەن ءماجىلىسىنىڭ دەپۋتاتتارى, پرەمەر-ءمينيستردىڭ ورىنباسارى ەربولات دوساەۆ, ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ, بۇۇ دامۋ باعدارلاماسىنىڭ تۇراقتى وكىلى مۋنحتۋي التانگەرەل جانە قوعامدىق كەڭەستەر مەن ساراپشىلار قاۋىمداستىعىنىڭ وكىلدەرى, مەملەكەتتىك ورگاندار مەن حالىقارالىق ۇيىمداردىڭ جەتەكشىلەرى قاتىستى.
القالى كەڭەستىڭ اشىلۋ سالتاناتىندا ءسوز العان پرەمەر-ءمينيستردىڭ ورىنباسارى ە.دوساەۆ قازاقسان رەسپۋبليكاسى پرەمەر-ءمينيسترى ب.ساعىنتاەۆتىڭ قۇتتىقتاۋ حاتىن وقىپ بەردى.
«بارشاڭىزدى قوعام, پارلامەنت جانە اتقارۋشى بيلىك وكىلدەرىنىڭ باسىن بىرىكتىرگەن ءى رەسپۋبليكالىق قوعامدىق كەڭەستەر ءماجىلىسىنىڭ وتۋىمەن قۇتتىقتايمىن. بۇگىنگى تاڭدا "100 ناقتى قادام" ۇلت جوسپارىن جۇزەگە اسىرۋ اياسىندا ءتۇرلى دەڭگەيدە 229 قوعامدىق كەڭەس قۇرىلدى, ولاردىڭ قۇرامىندا 4 مىڭنان استام ادام قىزمەت ەتەدى. قوعامدىق كەڭەستەر قىزمەتى مەملەكەتتىك ورگانداردىڭ جۇمىسىندا اشىقتىق پەن بيلىككە دەگەن سەنىم دەڭگەيىن ۇلعايتۋعا, ىسكە اسىرىلىپ جاتقان مەملەكەتتىك باعدارلامالار مەن باستامالار تۋرالى جاريالىلىقتى ارتتىرۋعا, سونداي-اق ازاماتتاردىڭ مەملەكەتتىك باسقارۋعا كەڭىنەن قاتىسۋىنا مۇمكىندىك بەردى. بۇگىنگى ءماجىلىستىڭ سىندارلى وي مەن ساليقالى پىكىر الماسۋ, تاجىريبە ءبولىسۋ الاڭىنىڭ باستاۋى بولاتىنىنا ۇلكەن ءۇمىت ارتامىن. رەسپۋبليكالىق قوعامدىق كەڭەستەر ءماجىلىسى قوعامدىق-ساياسي جانە الەۋمەتتىك-ەكونوميكالىق پروتسەستەردى دامىتۋعا ۇلەس قوسىپ, مەملەكەتتىك جانە قوعامدىق ينستيتۋتتاردىڭ ءتيىمدى جۇمىس ىستەۋىنە جاڭا سەرپىن بەرەتىنىنە سەنىمدىمىن», دەلىنگەن قۇتتىقتاۋ حاتتا.
بۇگىندە ەلىمىز بويىنشا ءوز قىزمەتىن ۇسىنىپ وتىرعان 200-دەن استام قوعامدىق كەڭەستىڭ 16-سى رەسپۋبليكالىق دەڭگەيدە بولسا, 213-ءى وڭىرلىك دەڭگەيدە جۇمىس ىستەيدى ەكەن. ال جالپى قوعامدىق كەڭەستەردىڭ قۇرامىنا مۇشەلىككە تىركەلگەندەر سانى 4 055 ادام ءارى ونىڭ 818-ءى ۇكىمەتتىك ەمەس ۇيىمداردىڭ وكىلدەرى.
نەگىزىنەن, «100 ناقتى قادام» ۇلت جوسپارىن ىسكە اسىرۋ شەڭبەرىندە مەملەكەتتىك ورگاندار مەن ازاماتتىق قوعام اراسىنداعى ديالوگتىڭ نىسانى رەتىندە قوعامدىق كەڭەستەر وتكەن جىلى قۇرىلعان ەدى. مەملەكەتتىك ەمەس ۇيىمدار رەتىندە تىركەلگەن مۇنداي كەڭەستەر ۇكىمەتتىك شەشىمدەردى قابىلداۋدىڭ اشىقتىعىن ارتتىرۋعا ارنالعان كونسۋلتاتسيالىق باقىلاۋشى ورگاندار رەتىندە تانىلعان. سوندىقتان دا قوعامدىق كەڭەستەر قۇرىلعالى بەرى 9 مىڭنان استام نورماتيۆتىك-قۇقىقتىق اكتىلەردىڭ جوبالارى قارالىپ, كەڭەس مۇشەلەرى تاراپىنان اتالعان جوبالارعا قاتىستى ءتيىستى ەسكەرتۋلەر مەن ۇسىنىستار بەرىلىپتى. اتاپ ايتقاندا, تۇرعىنداردى تازا اۋىز سۋمەن قامتاماسىز ەتۋ, سانيتارلىق-ەپيدەميولوگيالىق جاعدايدى جاقسارتۋ جانە مەديتسينالىق قىزمەت كورسەتۋ ساپاسىنا قاتىستى ماسەلەلەر بويىنشا قوعامدىق تىڭداۋلاردا 600-دەن استام الەۋمەتتىك ماڭىزدى پروبلەمالار دا قاراستىرىلعان.
«كەڭەستەردىڭ قىزمەتى ەسەپ بەرەتىن جانە اشىق مەملەكەت قالىپتاستىرۋ ۇدەرىسىنە وڭ اسەرىن تيگىزۋدە جانە مىڭداعان بەلسەندى ازاماتتارعا ەلدىڭ قوعامدىق ومىرىنە قاتىسۋىنا مۇمكىندىكتەر بەرىلىپ, بيلىك پەن بۇقارانىڭ اراسىنا دانەكەر بولاتىن بايلانىستىرۋشى جولدار اشىلۋدا», دەدى ن.ەرمەكباەۆ.
العاش رەت ۇيىمداستىرىلعان قوعامدىق كەڭەستەردىڭ جالپى جيىنىندا ولاردىڭ قازىرگى قىزمەت اياسىنداعى مارتەبەسىن كوتەرۋ جايى كەڭىنەن ءسوز بولدى. سونىمەن قاتار, ءماسليحاتتاردىڭ قىزمەتىنە ۇقساس قوعامدىق كەڭەستەردىڭ فۋنكتسيالارىن جويۋ ءۇشىن كەڭەستىڭ وكىلەتتىكتەرىن وزگەرتە وتىرىپ, ۇيىم جۇمىسىندا مەملەكەتتىك ورگاندار مۇشەلەرىنىڭ وكىلدىك دەڭگەيىن تومەندەتۋ سياقتى بىرقاتار وزەكتى ماسەلەلەر دە كۇن تارتىبىنە شىعارىلدى.
«ناتيجەسىندە, بۇگىندە قوعامدىق كەڭەستەر قىزمەتىنىڭ تاجىريبەسى قالىپتاسىپ, قىزمەت اۋقىمى كەڭەيۋدە. وعان قوسا, قوعامداعى وزەكتى ماسەلەلەر بويىنشا ازاماتتاردىڭ پىكىرى ەسكەرىلىپ, وڭتايلى شەشىمدەر قابىلدانۋدا. اسىرەسە, اۋىز سۋ مەن دەنساۋلىق ساقتاۋ سالاسى سىندى ءتۇيىنى تارقاتىلماعان الەۋمەتتىك ماسەلەلەردى شەشۋدە مۇنداي كەڭەستەر ناقتى قوعامدىق ينستيتۋت رەتىندە ءتيىمدى ديالوگ الاڭىنا اينالدى دەپ ايتا الامىز», دەدى ن.ەرمەكباەۆ.
بۇگىندە كەڭەس جۇمىسىن جەتىلدىرۋ ماقساتىندا حالىقپەن بۇقارالىق اقپارات قۇرالدارىنىڭ ءوزارا ءىس-قيمىلىن نىعايتۋ, جۇمىس تيىمدىلىگىن دامىتۋ, وڭتايلى تاجىريبەلەردى تالقىلاۋ تاقىرىپتارىندا ۇدايى پىكىرتالاستار مەن سەمينارلار ۇيىمداستىرىلىپ تۇرادى. سونىمەن قاتار, قوعامدىق كەڭەستەردىڭ قىزمەتىنە ارنالعان جانە ولاردىڭ تاجىريبەسىن زەردەلەۋگە مۇمكىندىك بەرەتىن kazkenes.kz بىرىڭعاي اقپاراتتىق رەسۋرسىنىڭ قۇرىلعانىن ەسكەرتە كەتكەن ءجون.
«قوعامدىق كەڭەستەر: ءىس-تاجىريبە جانە مەملەكەت پەن قوعامنىڭ ءوزارا ارەكەتتەسۋ تەتىكتەرى» تاقىرىبىندا ۇيىمداستىرىلعان پلەنارلىق وتىرىس قورىتىندىسى بويىنشا قاتىسۋشىلاردىڭ ناقتى شەشىمدەرى مەن ۇسىنىستارى نەگىزىندە ارنايى قارار قابىلداندى.
وسى كۇنى ءتۇس اۋا پرەزيدەنت جانىنداعى ورتالىق كوممۋنيكاتسيالار قىزمەتىندە قوعامدىق كەڭەستەردىڭ رەسپۋبليكالىق ءماجىلىسىن قورىتىندىلاعان ءباسپاسوز ءماسليحاتى ءوتتى. ازاماتتىق قوعام كوميتەتىنىڭ ءتورايىمى ءاليا عالىموۆا, ءدىن ىستەرى جانە ازاماتتىق قوعام سالاسىنداعى قوعامدىق كەڭەستىڭ مۇشەسى, «ايماق» قق ءتورايىمى ايگۇل سولوۆەۆا, الماتى قالاسى قوعامدىق كەڭەسىنىڭ مۇشەسى, «بولاشاق» حالىقارالىق قوزعالىسى مەن «جاستار ءۇنى» جاستار قوعامدىق بىرلەستىگىنىڭ توراعاسى داۋرەن بابامۇراتوۆ, شىعىس قازاقستان قوعامدىق كەڭەسىنىڭ مۇشەسى, وبلىستىق ءماسليحات دەپۋتاتى ولەگ چەرنىشەۆ, پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ الەۋمەتتىك-ساياسي زەرتتەۋلەر ءبولىمىنىڭ باسشىسى الۋا جولدىبالينا قاتىسقان ءباسپاسوز ءماسليحاتىندا سپيكەرلەر اۋقىمى كەڭ القالى باسقوسۋدىڭ جۇمىس ناتيجەلەرى تۋرالى باياندادى. سونداي-اق, قوعامدىق كەڭەستەردىڭ قىزمەتىن جەتىلدىرۋ جونىندەگى ادىستەمەلىك نۇسقاۋلىق پىسىقتالعانى دا ايتىلدى.
ءا.عالىموۆا قوعامدىق كەڭەستەردىڭ ءى رەسپۋبليكالىق ءماجىلىسىنىڭ نەگىزگى مىندەتى – قوعامدىق كەڭەستەردىڭ قىزمەتىن جەتىلدىرۋ بويىنشا وڭ تاجىريبە مەن ۇسىنىستاردى ورتاعا سالۋ جانە پىكىر الماسۋ ارقىلى وڭتايلى شەشىمدەر قابىلداۋ بولىپ تابىلاتىندىعىن تىلگە تيەك ەتتى.
«ەكى جىلدىق جۇمىس بارىسىندا قوعامدىق كەڭەستەر ءتيىستى مىندەتتى ىسكە اسىرۋ ارقىلى وزدەرىنىڭ تيىمدىلىگىن دالەلدەدى. سونىمەن قاتار, قوعامدىق كەڭەستەر تاراپىنان قوعامدىق باقىلاۋدىڭ 4 تەتىگى ەنگىزىلدى. ولار: مەملەكەتتىك ورگانداردىڭ نەگىزگى باعىتتارى بويىنشا قوعامدىق مونيتورينگ وتكىزۋ, مەملەكەتتىك ورگانداردىڭ قوعامدىق ماڭىزى بار شەشىمدەرىن قوعامدىق تىڭداۋلار مەن تالقىلاۋلار, ازاماتتاردىڭ قۇقىقتارى, بوستاندىقتارى مەن مىندەتتەرىنە قاتىستى نورماتيۆتىك-قۇقىقتىق اكتىلەر جوبالارىن ساراپتاۋدىڭ تەتىكتەرى, مەملەكەتتىك ورگاندار جانە لاۋازىمدى تۇلعالار جۇمىسىنىڭ ناتيجەلەرى تۋرالى ەسەپتەردى تىڭداۋ», دەدى ول ءوز سوزىندە.
نۇرلىبەك دوسىباي,
«ەگەمەن قازاقستان»
سۋرەتتى تۇسىرگەن ەرلان وماروۆ
