بەس كۇنگە جالعاساتىن جيىندا قاتىسۋشىلار كوشباسشىلىق نەگىزدەرى, ونىڭ ىشىندە پەرسونالدى كوشباسشىلىق پەن كومانداعا ۇيىتقى بولۋ, ۇيىمدى ترانسفورماتسيالاۋ, ىشكى جانە ۇيىمارالىق كوممۋنيكاتسيا ماسەلەلەرى قاراستىرىلۋدا. جەتەكشىلەردى وقىتۋدىڭ ماقساتى – «ا» كورپۋسىنداعى مەملەكەتتىك قىزمەتكەرلەردىڭ الەۋەتىن قامتاماسىز ەتۋ جانە دامىتۋ.
سەميناردى قازاقستان پرەزيدەنتى اكىمشىلىگى باسشىسىنىڭ ورىنباسارى وڭداسىن ورازالين, مەملەكەتتىك قىزمەت سالاسىنداعى استانا وڭىرلىك حابى باسقارۋشى كوميتەتىنىڭ توراعاسى ءاليحان بايمەنوۆ جانە نازارباەۆ ۋنيۆەرسيتەتتىڭ پرەزيدەنتى شيگەو كاتسۋ قۇتتىقتاۋ سوزدەرىمەن اشتى.
ءاليحان بايمەنوۆ ءوزىنىڭ سوزىندە قازاقستاننىڭ مەملەكەتتىك قىزمەتىن جەتىلدىرۋدە «ا» كورپۋسىنىڭ, كاسىبي مەملەكەتتىك قىزمەتتەگى ەڭ جوعارى لاۋازىمدار – جاۋاپتى حاتشىلار مەن اپپارات جەتەكشىلەرىنىڭ ورنى ەرەكشە ەكەنىن اتاپ ءوتتى. «مەملەكەتتىك ورگانداردىڭ ستراتەگيالىق جوسپارلارعا ساي ىرعاقتى جۇمىسىن قامتاماسىز ەتىپ, كادرلار قىزمەتىن ۇيلەستىرەتىن جاۋاپتى حاتشىلار مەن اپپارات جەتەكشىلەرىنىڭ كوشباسشىلىق قاسيەتتەرى ارقاسىندا مەملەكەتتىك ورگانداردا مامانداردىڭ الەۋەتىن ەل يگىلىگىنە جۇمساۋعا مۇمكىندىك بەرەتىن ءتيىستى احۋال قالىپتاسادى», دەدى. سوندىقتان ول جاۋاپتى حاتشىلار مەن اپپارات جەتەكشىلەرىنىڭ مەملەكەتتىك ورگاندارداعى مەنەدجمەنت پەن كوشباسشىلىق بويىنشا وزىق يدەيالاردى مەڭگەرۋى ماڭىزدى ەكەنىن ءسوز ەتتى.
سەمينار جۇمىسىنا «ا» كورپۋسىنىڭ 35 مەملەكەتتىك قىزمەتكەرى – مينيسترلىكتەردىڭ جاۋاپتى حاتشىلارى مەن وبلىس اكىمدىكتەرىنىڭ اپپارات جەتەكشىلەرى قاتىسۋدا. دارىستەر كەزىندە قاتىسۋشىلار كوماندانىڭ تيىمدىلىگىنە اسەر ەتەتىن فاكتورلاردى, مەنەدجەرلەر مەن كوشباسشىلاردىڭ ءرولى مەن مىندەتتەرىن قاراستىرىپ, تالدايتىن بولادى. ولار باسقارۋداعى كۇردەلى مىندەتتەردى ورىنداۋ تاسىلدەرىن مەڭگەرىپ, جاڭا قۇندىلىقتار مەن مادەنيەتتەرگە بەيىمدەلۋ ارقىلى جاھاندىق زاماناۋي سىناقتارعا توتەپ بەرۋ جولدارىمەن تانىسادى.
«ەگەمەن-اقپارات»
