«استانا» ەۋروكۋبوك ويىندارىندا ءوز الاڭىندا 17 ماتچ بويى مۇلدەم ۇتىلماپتى. 17 ماتچتىڭ توعىزىن جەڭىپ, سەگىزىمەن تەڭ ءتۇسىپتى. مادريدتەن «اتلەتيكو» كەلىپ گول سوعا الماي كەتىپتى, ليسسابوننان «بەنفيكا» كەلىپ ءبىر ۇپاي ارقالاپ قايتىپتى. وسىدان 5 جىل بۇرىن مۇنداي دۇنيە ەرتەگىدەي ەستىلەتىن, بۇگىن مىنە شىندىققا اينالدى. بىراق, «استانانى» ءوز ۇيىندە عانا ازۋ كورسەتىپ, جىراققا شىقسا قۇيرىعىن باسىپ قاشا جونەلەتىن قورقاۋعا تەڭەگەندەر كوپ بولدى. ستاتيستيكا دا سونى مەڭزەيدى, 17 ويىندا تەك يۋرمالانىڭ «سپارتاگىن» ۇتىپتى. ەندى مىنە, تەل-ءاۆيۆتىڭ «ماككابيىن» ۇتىپ, تاريحي جەڭىسكە قول جەتكىزدى. تاريحي دەيتىن سەبەبىمىز, «استانا» ەۋروپادا العاش رەت ءبىر كوماندانى ۇيدە دە, تۇزدە دە ۇتىپ وتىر. توپتىق كەزەڭدەگى ويىندا العاش رەت تۇزدە گول جىبەرگەن جوق. مۇنداي جەتىستىك بولماعان. رومانتيكا!
ەموتسيانى قويىپ, ناقتى اڭگىمەگە كوشسەك. بۇگىنگى فۋتبول ەستەتيكادان الشاقتاپ بارادى, ناقتى ناتيجەنى ماقسات تۇتاتىن پراگماتيكالىق ويىن سالتانات قۇردى. بۇل تەك «استانانىڭ» عانا ەمەس, الەمدىك فۋتبول كلۋبتارىنىڭ ويىن فيلوسوفياسىنا اينالدى. قورعانۋ دا ونەر, ال قورعانىپ ءجۇرىپ گول سوعۋ – فۋتبولداعى ەڭ بيىك ونەر. وسىدان بىرەر كۇن بۇرىن «توتتەنحەم» ءوز الاڭىندا بيلەپ توستەمەي-اق «رەالدى» جەڭدى, ۇستەمدىك قۇرماي-اق ءۇش ۇپايىن الدى. ەڭ باستى قۇندىلىق – ناتيجە. «استانانىڭ» ويىنى دا ءسۇيسىنىپ قارايتىنداي, تەلمىرىپ تاماشالايتىنداي, شەبەر پاس شىعارىپ, جىلدام دوپ الماسىپ, الاڭدا ۇستەمدىك قۇرىپ, قارسىلاستىڭ قاقپاسىنا توپىرلاتىپ گول سوعاتىن, پوزيتسيالىق شابۋىل جاساۋدا ەشكىمگە دەس بەرمەيتىن ەستەتيكالىق دەڭگەيدەگى ويىن ەمەس. ستانيمير ستويلوۆ قورعانىسقا كوپ كوڭىل بولەدى, ويىن تاكتيكاسى قورعانىستىڭ نەگىزىندە قۇرىلعان. ورتادان دوپتى تارتىپ العان جاعدايدا جەلمەن جارىساتىن تۆۋماسي, توماسوۆ سەكىلدى جەلاياق ويىنشىلار, گول سوعاتىن كابانانگا دەيتىن بومباردير بار. ارينە, بۇل «استانانىڭ» ىشكى بىرىنشىلىكتەگى ويىندارىنا قاتىسى جوق. بىراق, ەۋروپاعا باسقاشا بەيىمدەلى مۇمكىن ەمەس.
استانا قاتارىنان ءۇشىنشى جىل ەۋروكۋبوك ويىندارىنىڭ توپتىق كەزەڭىندە ويناپ كەلەدى. جىل سايىن ىلگەرىلەۋ بار. ءار قاتەلىكتەن ساباق الادى, ءاربىر ماتچتان تاجىريبە جينايدى. كەشەگى ويىن سونى كورسەتتى.
ماسەلەن, 2015-2016 جىلعى ماۋسىمدا چەمپيوندار ليگاسىنىڭ توپتىق كەزەڭىندە «اتلەتيكو» (مادريد), "بەنفيكا" (ليسسابون), "گالاتاساراي" (ستامبۇل) سياقتى ازۋلى كوماندالارمەن ءبىر توپقا ءتۇستى. 5 گول سوعىپ, 11 گول (توپتاعى ەڭ تومەن كورسەتكىش) جىبەردى. بىردە-ءبىر ماتچتى جەڭە الماي, ءتورت ويىندا تەڭ ءتۇستى.
2016-2017 جىل. ەۋروپا ليگاسىنىڭ ۆ توبىندا «يانگ بويز» (بەرن), اپوەل (نيكوسيا) جانە «وليمپياكوسپەن» (پيرەي) سەكىلدى كوماندالارمەن جولى ءتۇيىستى. بۇل توپتا ءبىر ويىندا جەڭىسكە جەتىپ (اپوەل 2-1), ەكى ويىندا تەڭ ءتۇستى. تاعى دا 5 گول سوعىپ, 11 گول جىبەردى.
ەندى مىنە, ەۋروپا ليگاسىنىڭ ا توبىندا «ۆيلياررەال», «سلاۆيا» (پراگا), "ماككابي" (تەل-اۆيۆ) سەكىلدى فۋتبول ۇجىمدارىمەن پلەي-وفف كەزەڭىنە شىعۋ ءۇشىن ۇلكەن تالاس بولىپ جاتىر. بار-جوعى 4 تۋر وتكىزدى, بىراق 7 گول سوعىپ ۇلگەردى («ۆيلياررەالمەن» بىردەي كورسەتكىش). 2 ويىندى ۇتىپ, ءبىر تەڭ ويىنعا قول جەتكىزدى. ءالى ۇيدە يسپاندارمەن, تۇزدە چەحيالىقتارمەن دوپ تەبەدى. دەمەك, 7 ۇپاي اقىرعى مەجە ەمەس. «استانا» تاعى ءبىر تاريحي مەجەنى باعىندىرۋعا بەت الدى. «استانانىڭ» ەۋروپاداعى جورىعى جاڭا جىلدان كەيىن دە جالعاسادى دەگەن ءۇمىت باسىم.
ستويلوۆ وسى ماۋسىمدى ءساتتى اياقتاعاننان كەيىن كومانداعا جوعارى دەڭگەيدە وينايتىن ورتالىق قورعاۋشىلار شاقىرۋعا سەبەپ بار. كەشە ورتالىق قورعانىستا ويناعان پوستنيكوۆ پەن مالىي ءالى دە بولسا لوگۆينەنكو مەن ءانيچيچتى تەڭ دارەجەدە الماستىرا الاتىن ويىنشىلار ەمەس ەكەنىن دالەلدەدى. اسىرەسە, مالىيدىڭ كەشەگى ويىنىنا داق تۇسىرمەي, پوستنيكوۆتى سىننان امان الىپ قالعان قاقپاشى نەناد ەريچ بولدى. ءدال قازىر «استانا» ەۋروكۋبوكتاعى ويىنداردان 20 ملن. ەۋرو كولەمىندە پايدا ءتۇسىردى. كوماندانىڭ ەۋروپاعا جورىعى جالعاسا بەرسە, تۇسەتىن قارجى كولەمى دە ۇلعاياتىنى ءسوزسىز. بۇگىنگى فۋتبول وسى, قورجىنىڭدى ۇپايمەن عانا ەمەس, قارجىلاي دا تولتىرۋعا بولادى. مۇنداي ولجا قازاقستاندىق كلۋبتار ءۇشىن ەكى ەسە جەڭىس.
جاندوس ءبايدىلدا,
جۋرناليست
