سۋرەت: Vesti.kz
بىردەن ايتايىق, بۇل كەشتە وسىدان ەكى اپتا بۇرىن «استانا ارەنادا» ويسىراي جەڭىلگەن «ماككابيدىڭ» بىردە-ءبىر نىشانى جوق. كەرىسىنشە, ءا دەگەننەن-اق الاڭ يەلەرىنىڭ باسىمدىقتارى انىق بايقالىپ تۇردى. ءتىپتى, ەسەپتى ءبىرىنشى بولىپ اشىپ, جانكۇيەرلەرىن ءبىر قۋانتىپ تاستادى.
كەزدەسۋدىڭ العاشقى مينۋتتارىنان-اق الاڭ يەلەرىنىڭ باسىمدىعى بايقالىپ تۇر.ء تىپتى, ەسەپتى ءبىرىنشى بولىپ اشا جازدادى. ويىننىڭ 3-مينۋتىندا ۆيدار كيارتانسون الاڭنىڭ ورتا تۇسىنان قاقپاعا قاراي تەپكەنىمەن, بۇل جەردە نەناد ەريچ توسقاۋىل قويا ءبىلدى. ال بۇرىشتامادان بەرىلگەن دوپتى ادەمى قابىلداعان جان-سيلۆەن بابەننىڭ جولى بولمادى. ابىروي بولعاندا ول قاقپادان بيىك تەپتى.
بۇل ماتچتا وسىدان بىرەر كۇن بۇرىن «استانا» – «قايرات» اراسىنداعى ويىندا جاراقات العان يۋري لوگۆينەنكونىڭ جوقتىعى ءبىلىنىپ-اق تۇردى. ويتكەنى, «ماككابيدىڭ» شابۋىلى كوبىنە الاڭنىڭ ورتا تۇسىنان جاسالدى. ايتكەنمەن, ءبىزدىڭ جىگىتتەر دە قاراپ قالماي, شاما-شارقى كەلگەندە شابۋىل باستاپ كورگىسى كەلىپ-اق ءجۇردى. بىراق, وعان الاڭ يەلەرى مۇمكىندىك بەرمەدى. ۇزىلىستە تاكتيكانى وزگەرتپەسە يزرايلدىكتەر كوزدەگەن ماقساتىنا قول جەتكىزەتىنىن بىلگەن س.ستويلوۆ ەكىنشى تايمدا مۇلدەم باسقا ويىنشىلاردى الىپ شىققانداي.
ۇزىلىستەن كەيىن جەرلەستەرىمىزدىڭ ويىنى 180 گرادۋسقا وزگەرىپ شىعا كەلدى. ۋاقىت ۇزاعان سايىن س.ستويلوۆ شاكىرتتەرى ەكىنشى كەزەڭدە رايكوۆيچ قورعاعان قاقپا جاققا قىسىمدى كۇشەيتە ءتۇستى. سونىڭ ناتيجەسىندە كەزدەسۋدىڭ 57-مينۋتىندا ابزال بەيسەبەكوۆتىڭ وڭ قاپتالدان بەرگەن پاسىن ادەمى پايدالانعان پاتريك تۆۋماسي ەش قينالماستان قاقپاعا دارىتا الدى. جارايسىڭ, گانانىڭ قارا دومالاق بالاسى.
وسى گولدان كەيىن يوردي كرويف ەكى ويىنشىسىن, ءسال ۋاقىت وتە كەلە تاعى ءبىر فۋتبولشىسىن الماستىرىپ, تاكتيكاعا وزگەرىس جاساعىسى كەلگەنى انىق ەدى. الايدا, ول جوسپارى ورىندالمادى. «استانا» سوعىلعان گولدان كەيىن ارا-تۇرا شابۋىل جاساعانىمەن, كوبىنە قورعانىسقا جاتىپ الىپ, قاقپالارىن كۇزەتۋمەن بولدى. ەڭ باستىسى, «استانا» 1:0 ەسەبىمەن جەڭىسكە جەتتى. جەڭىس قۇتتى بولسىن, اعايىن!
الماس ماناپ,
«ەگەمەن قازاقستان» –
ناتانيادان (يزرايل)
