دوڭگەلەك ۇستەل بارىسىندا «رۋحاني جاڭعىرۋ» باعدارلاماسىنىڭ جالپىۇلتتىق التى نەگىزگى جوبالارىنىڭ ءبىرى سانالاتىن «تۋعان جەر» جوباسىنىڭ الماتى قالاسىندا جۇزەگە اسىرىلۋ بارىسى تالقىلاندى.
عالىمدار, ساياساتتانۋشىلار, عىلىمي ساراپشىلىق قوعامداستىقتىڭ, ساياسي پارتيالاردىڭ, ەتنومادەني بىرلەستىكتەردىڭ, ۇكىمەتتىك ەمەس ۇيىمداردىڭ جانە جاستار ۇيىمدارىنىڭ وكىلدەرى مەن ستۋدەنتتەر قاتىسقان ءىس-شارادا الماتى قالاسى ىشكى ساياسات باسقارماسىنىڭ باسشىسى نۇرلان سىدىقوۆ, ەۋرازيالىق ينتەگراتسيا ينستيتۋتى ديرەكتورىنىڭ ورىنباسارى ناتاليا كالاشنيكوۆا, الماتى قالاسىنداعى «رۋحاني جاڭعىرۋ» جوبالىق كەڭسەسىنىڭ باسشىسى گۇلنار قوڭىروۆا, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ پروفەسسورى, تاريح عىلىمدارىنىڭ دوكتورى احمەت توقتاباي, سوربوننا-قازاقستان ينستيتۋتىنىڭ حالىقارالىق قاتىناستار كافەدراسىنىڭ مەڭگەرۋشىسى, پروفەسسور, ساياسي عىلىمدار دوكتورى جومارت سيمتيكوۆ, «باربانگ» كۇردتەر قاۋىمداستىعىنىڭ پرەزيدەنتى كنياز ميرزوەۆ, «اباي-اقپارات» قوعامدىق قورىنىڭ ۆيتسە-پرەزيدەنتى ايدوس سارىم, ءبىلىم جانە عىلىم مينيسترلىگى عىلىم كوميتەتىنىڭ فيلوسوفيا, ساياساتتانۋ جانە ءدىنتانۋ ينستيتۋتى ديرەكتورىنىڭ ورىنباسارى, فيلولوگيا عىلىمدارىنىڭ دوكتورى, پروفەسسور سەرىك نۇرمۇراتوۆ سىندى زيالى قاۋىم وكىلدەرى مەن قوعام بەلسەندىلەرى ءوز ويلارى مەن ۇسىنىستارىن ورتاعا سالدى.
جيىن بارىسىندا ءسوز العان ەۋرازيالىق ينتەگراتسيا ينستيتۋتى ديرەكتورىنىڭ ورىنباسارى ناتاليا كالاشنيكوۆا اتالمىش ينستيتۋت جۇرگىزىپ جاتقان «رۋحاني جاڭعىرۋ» باعدارلاماسىن تالقىلاۋ بويىنشا ساراپشىلىق كەزدەسۋلەر وڭىرلىك ەرەكشەلىكتەردى ەسكەرە وتىرىپ, باعدارلامانىڭ ىسكە اسىرىلۋ بارىسى تۋرالى ساراپشىلاردىڭ, جۇرتشىلىقتىڭ پىكىرىن جيناقتاپ-قورىتۋعا مۇمكىندىك بەرگەنىن, بۇعان دەيىن رەسپۋبليكالىق جانە وڭىرلىك دەڭگەيدە وسىنداي 8 كەزدەسۋدىڭ وتكەنىن اتاپ ءوتتى. «باعدارلامانىڭ ءتۇپ نەگىزى – ەل پرەزيدەنتى ۇسىنعان 6 جوبانى ىسكە اسىرۋ ارقىلى قوعامدى جىگەرلى جاڭعىرۋ جولىنا ءتۇسىرۋ. اتالمىش التى جوبا – قوعام العا دامۋىنىڭ نەگىزگى كۇشتەرى بولماق. باعدارلامانىڭ ءوزى قوعامدىق سانامىزدى, داستۇرلەردى, قۇندىلىقتاردى, ورتاق تاريح پەن تاريحي جادتى ەسكەرە وتىرىپ, قالىپتاستىرۋ ىسىندە قازاقستاندىق برەندكە اينالىپ وتىر. وسى تۇرعىدان العاندا, «تۋعان جەر» جوباسىنىڭ زيالى ەليتا كوپ شوعىرلانعان الماتىدا دا ىسكە اسىرىلۋى تۋعان ەلىمىزدىڭ ءيميدجىن نىعايتۋعا, ءوز قالامىزعا, ەلىمىزگە دەگەن ماحابباتتى ارتتىرۋعا, جاڭا مۇمكىندىكتەر كوزىنىڭ اشىلۋىنا وڭ اسەرىن تيگىزەتىنى انىق. «رۋحاني جاڭعىرۋ» جوبالارىن ىسكە اسىرۋعا ءاربىر قازاقستاندىق ازامات بەلسەنە اتسالىسسا, ۇلتتىق سانانىڭ نىعايا تۇسەتىنى كامىل», دەدى ناتاليا پاۆلوۆنا.
«رۋحاني جاڭعىرۋ» باعدارلاماسىنىڭ نەگىزگى التى باعىتتاعى جوبالارىن ىسكە اسىرۋ بويىنشا ەلىمىزدىڭ ءار وڭىرىندە قۇرىلعان جوبالىق كەڭسەلەر قاتارىندا الماتى قالاسى جوبالىق كەڭسەسى اشىلعانى بەلگىلى. الماتىلىق جوبالىق كەڭسە باسشىسى گۇلنار قوڭىروۆا «تۋعان جەر» ارنايى جوباسىنىڭ ىسكە اسىرىلۋى تۋرالى بايانداماسىندا اتالمىش مەكەمەنىڭ باستى جۇمىستارىنىڭ ءبىرى – ەل اراسىندا «رۋحاني جاڭعىرۋ» باعدارلاماسىن جۇزەگە اسىرۋ تەتىكتەرىنە قاتىستى تۇسىندىرمە جۇمىستارى جۇرگىزىلەتىنىن اتاپ ءوتتى. كەڭەس قۇرامىنا الماتى قالاسى اكىمدىگىنىڭ 15 قۇرىلىمدىق جانە ۆەدومستۆوارالىق بولىمشەلەرىنىڭ وكىلدەرى جوبالىق ادىستەمەلەردى دامىتا وتىرىپ, ولاردىڭ دۇرىس جۇرگىزىلۋىن باقىلاپ, جوبالىق باسقارما جۇمىستارىنا قاداعالاۋ جاسايتىنىن جەتكىزگەن گۇلنار قالەلقىزى: «125 جوبادان تۇراتىن رەەستر مەن 87,4 ملرد تەڭگەدەن استام قارجىنى قۇرايتىن ءىس-شارالار ءتىزىمى بەكىتىلدى. ولاردىڭ ىشىندە, 900 مىڭعا جۋىق ادام قاتىسقان 50 ءىس-شارا ويداعىداي جۇرگىزىلدى. «رۋحاني جاڭعىرۋ» قوعامدىق سانانى قايتا جاڭعىرتۋ باعدارلاماسىنىڭ نەگىزگى ءبولىمى بولىپ تابىلاتىن «تۋعان جەر» باعدارلاماسى قالاداعى ءبىلىم بەرۋ, ەكولوگيا سىندى كەڭ كولەمدەگى جۇمىستارمەن قاتار, مادەني نىسانداردى, تاريحي ەسكەرتكىشتەردى قالپىنا كەلتىرۋ مەن جالپىۇلتتىق ءپاتريوتيزمدى قالىپتاستىرۋعا باعىتتالعان اۋقىمدى ىستەردىڭ اتقارىلۋىن قاراستىرىپ وتىر», دەدى.
دوڭگەلەك ۇستەل بارىسىندا قالاداعى الەۋمەتتىك نىسانداردى سالۋعا الەۋمەتتىك-قايىرىمدىلىق ءىس-شارالار وتكىزۋگە قولداۋ كورسەتىپ وتىرعان مەتسەناتتاردىڭ ارقاسىندا قالا اۋداندارىندا بىرقاتار مەكتەپتەر مەن ەمحانالار, سپورتتىق نىساندار, تۇرعىن ۇيلەر سالىنعانىن, بۇل يگى ىستەر الداعى ۋاقىتتا دا جالعاسىن تاباتىنىن ايتىپ وتكەن الماتى قالاسى ىشكى ساياسات باسقارماسىنىڭ باسشىسى نۇرلان سىدىقوۆ 2017 جىل – جاستار جىلى دەپ جاريالانعانىن, سوعان بايلانىستى قاراشا ايىنىڭ سوڭىندا مەگاپوليستە جاستاردىڭ جاڭا يدەيالارى مەن ۇسىنىستارىنىڭ اشىق الاڭى رەتىندە جاستار ءسامميتى وتكىزىلەتىنىن جەتكىزدى.
باسقوسۋ قاتىسۋشىلارى «رۋحاني جاڭعىرۋ» باعدارلاماسىن جان-جاقتى تالقىلاۋ, ۇسىنىستار ازىرلەۋ مەن ساپالى تۇردە ىسكە اسىرۋ ءۇشىن وسىنداي سۇحبات الاڭدارى مەن ساراپشىلىق كەزدەسۋلەردىڭ جۇمىسى ماڭىزدى ەكەنىن اتاپ ءوتتى.
ميرا بايبەك,
«ەگەمەن قازاقستان»
الماتى
