ءسوز قۇدىرەتى شەكسىز

كەشە ازەربايجان استاناسىندا تۇركى تىلدەس جۋرناليس­تەر­دىڭ مەديا-فورۋمى وتكىزىلىپ, وعان قازاقستان, ازەربايجان, ءتۇر­كيا, وزبەكستان, قىرعىزستان, تۇركىمەنستان جۋرناليستەرىمەن قاتار, رەسەي فەدەراتسياسى قۇرامىنداعى باشقۇرت, تاتار, مالقار, ساحا, تىۆا, قاراشاي, التاي بۇقارالىق اقپارات قۇ­رالدارىنىڭ وكىلدەرى جانە مولدوۆادان – گاگاۋىز, يراكتان – كەكرۋك تۇرىكتەرى, ۋكراينادان – قىرىم تاتارلارى, كوسوۆو, ماكەدونيا, گرەكيانىڭ باتىس فراكياسىنان, سولتۇستىك كيپر­دەن, بولگاريادان تۇركى تىلدەس قالامىن قارۋ ەتكەن جۋرناليستەر قاتىستى. بىلتىرعى جىلى تۇرىك جەرىندە العاش جينالعان تۇركى تىلدەس جۋرناليستەردىڭ باكۋ قالا­سىن­دا­عى بۇل ەكىنشى فورۋمى. جەر-جەر­دەن 200 دەلەگاتتىڭ باسىن قوسقان فورۋم ءوز جۇمىسىن تاڭەر­تەڭ­گىلىك گەيدار اليەۆتىڭ ەسكەرتكىشىنە گۇلدەستە قويۋدان باستالدى. ال فورۋم بەتاشارى ازەر­باي­جان ءانۇرانى ورىندالىسىمەن ءتۇرىلىپ, بارلىق قاتىسۋشىلار اۋەلى تۇركيانىڭ ۆان ولكەسىندەگى ءزىلزالادان قۇربان بولعانداردى ءبىر ءمينوت ۇنسىزدىكپەن ەسكە الدى. تاريح, ءتىل, ءتول ەرەكشەلىكتەرى جانە مادەنيەت ورتاقتاستىعىنا نەگىزدەلگەن ورتاق قۇندىلىقتارى بار تۇركى دۇنيەسىنىڭ داۋىسى بي­ىلعى جىلى تاۋەلسىزدىكتەرىنىڭ 20 جىلدىقتارى مەرەكەلەنىپ جاتقان قازاقستان, ازەربايجان, وزبەك­ستان, تۇركىمەنستان, قىرعىزستان مەن تاۋەلدىلىك قامىتىن موينىنا ءىلىپ كورمەگەن تۇركيا مەملە­كە­تى­نىڭ ءتۇبى ءبىر, ءتۇبىرى ءبىر ەكەندىكتەرىن ايقىن ۇعىنىپ, ينتەگراتسيا­لا­نۋى ناتيجەسىندە جارقىن شىعا باستادى. جاقىندا عانا الماتى قالاسىندا وتكەن تۇركى كەڭەسىنىڭ ءبىرىنشى سامميتىندە قابىلدانعان دەكلاراتسيادا مۇشە مەملەكەتتەردەگى بۇقارالىق اقپارات قۇرال­دا­رى تۇركى كەڭەسى جانە ونىڭ ءتيىستى ورگاندارى تۋرالى حالىقتى ءجيى اقپاراتتاندىرۋدا ماڭىزدى ءرول اتقارا الاتىنىن اتاپ ءوتىپ, وسى ورايدا, «تۇركى تىلدەس مەملەكەت­تەر­دىڭ مەديا تۇعىرناماسىنىڭ» قۇرىلۋىن قوشتاسا, مەديا-فورۋم وسى يگىلىكتى ويدىڭ ءىس جۇزىندە جالعاسۋىنىڭ كورىنىسى بولدى دەسەك, ارتىق ايتقاندىق ەمەس. شىنىندا دا تۇركى الەمىندە تالقىلاناتىن دا, كوتەرىلەتىن دە ماسەلەلەر جەتكىلىكتى. سول سەبەپتەن دە فورۋم جۇمىسى «جاھان­دان­عان الەمدەگى تۇركى تىلدەس مە­ديا-فاكتورى: ەرەكشەلىكتەر جانە ورتاق قۇندىلىقتار» ماسە­لەسىنە ارنالىپ, تالقىلانعان تاقىرىپتار «تۇركى الەمىندەگى مەديا: وزىندىك ەرەكشەلىكتەر, قىز­مەت اياسى جانە مۇمكىن­دىكتەر», «تۇركى تىلدەس مەديا ىنتىماقتاستىعىمەن ونىڭ بو­لا­شاقتا بىرلەسۋدەگى قادام­دارى», «تۇركى تىلدەس ەلدەر مەن قاۋىمداستىقتارداعى الەۋمەت­تىك مەديا: ولاردى جاقىنداس­تىرۋداعى عالامتور مۇمكىندىك­تەرى», ت.س.س تاقىرىپتارعا ارنالدى. جۋرناليستەردى باكۋگە جيىپ, ورتاق ماقساتقا جۇمىلۋعا شا­قىرعان فورۋمدى ۇيىمداستى­رۋشى ازەربايجان ءباسپاسوز كە­ڭەسىنىڭ توراعاسى افلاتۋن اماشەۆ, ازەربايجان پرەزيدەنتى يلحام اليەۆتىڭ فورۋم جۇ­مىسىنا ساتتىلىك تىلەگەن قۇتتىق­تاۋىن جەتكىزگەن پرەزيدەنت اكىمشىلىگىنىڭ قوعامدىق-ساياسي ماسەلەلەر ءبولى­مىنىڭ باسشىسى ءالي گاسانوۆ, ەلىمىزدەگى بيلىك باسىنداعى پارتيا جانىنداعى «نۇر مەديا» حولدين­گىنىڭ باس ديرەكتورى قايسار جاناحانوۆ, تۇركيانىڭ ءباسپاسوز جانە اق­پارات تاراتۋ اگەنتتىگىنىڭ باس ديرەكتورى مۇرات كاراكايا ءوز سوزدەرىندە تۇركى تىلدەستەردىڭ ءبىر-بىرىمەن ۇعىنىسا, جاقىنداي ءتۇ­سۋىندە وسىنداي شارالاردىڭ اتقا­راتىن جۇگى مول ەكەندىگىن ايتىپ, مەملەكەتتەر مەن ولار­داعى ءتۇبىرى ءبىر حالىقتاردىڭ, جەكە ازامات­تاردىڭ اراسىندا سەنىم مەن تۇسىنىستىك ورناۋىنداعى بۇقارا­لىق اقپارات قۇرالدارى­نىڭ ءرولى ەرەكشە ەكەندىگىنە باسا ءمان بەرە سويلەدى. راسىندا دا, جاراتقان يەنىڭ ادام بالاسىنا تارتقان باعا جەتپەس سىيى – ءتىل ارقىلى ەل مەن ەلدى, ۇلت پەن ۇلتتى, حالىق پەن حالىقتى جا­قىنداستىرۋعا دا, الىستاتۋعا دا, تىپتەن جاۋلاس­تىرۋعا دا بو­لادى. ءسوز قۇدىرەتى ورنىمەن پايدا­لانساڭ جاسامپاز, ءبىر ۇلت قانا ەمەس, بۇكىل ادامزات بالا­سىنىڭ يگىلىگىنە قىزمەت ەتە الادى. فورۋمعا جان-جاقتان جەتكەن دەلەگاتتار ويلارىن ور­تاعا سالىپ, تۇركى الەمىندەگى ورتاق پروبلەمالاردى ءسوز ەتىپ, مىنبەرگە كوتەرىلگەن شەشەندەر جي­نالعاندار نازارى­نا ءوز ەلدەرىندە ءتىل اياسىندا تۋعان قيىن­دىقتارىمەن دە ءبولىستى. مەديا-فورۋم جالعاسۋدا. انار تولەۋحانقىزى, «ەگەمەن قازاقستان» – باكۋدەن.