سەگىزباەۆتىڭ فۋتبول اكادەمياسى

الماتىدا تۇساۋىن كەستى وڭتۇستىك مەگاپولسيتەگى «الاش» ستاديونىندا قازاق­­تىڭ اتاقتى اياقدوپ شەبەرى تيمۋر سەگىزباەۆ اتىن­داعى فۋتبول اكادەمياسىنىڭ اشىلۋ سال­تا­ناتى بولىپ ءوتتى. قازاق سپورت جانە تۋريزم اكادەمياسىنىڭ قۇرىلتايشى بو­­لۋىمەن اشىلعان بۇل فۋتبول اكادەمياسىنىڭ كەلەشەگى جار­قىن بولعالى تۇر. ويتكەنى, ال­داعى جىلدارى وسى «الاش» ستا­ديونى اۋماعىنان ارنايى جاس فۋتبولشىلارعا ارناپ سپورتتىق مەكتەپ-ينتەرنات قۇرىلىسى باس­تالماقشى. وندا قازاقستاننىڭ تۇكپىر-تۇكپىرىنەن جينالعان جەت­كىنشەكتەر شەت ەلدەردەن كەلگەن تاجىريبەلى جاتتىقتىرۋشى­لار­دان ءتالىم الاتىن بولادى. فۋتبول اكادەمياسىنىڭ اشى­لۋ سالتاناتىندا سويلەگەن قازاق سپورت جانە تۋريزم اكادەميا­سىنىڭ رەكتورى قايرات زاكەريانوۆ ءوزى باسقاراتىن وقۋ ورنىنىڭ قازاق فۋتبولىن كوتەرۋ جولىندا اتقارىپ جاتقان ءبىرشاما ەڭبەگىن اتاپ ءوتتى. ۇلىبريتانيا, برازيليا, تۇركيا سەكىلدى سپورتتىڭ وسى ءتۇرى دامىعان ەلدەردەن ءتا­جىريبەلى ماماندار الدىرىلعا­لى جاتقاندىعى, تيمۋر سەگىز­باەۆ­تىڭ داڭقىمەن قازاقتىڭ كو­ك­ورىم جاستارىن فۋتبول سپورتىنا كوپ­تەپ تارتۋ جوسپارلانىپ وتىر­عان­دىعى اتالدى. كسرو سپورت شەبەرى, قازاق كسر-ءىنىڭ ەڭبەك سىڭىرگەن جاتتىق­تىرۋشىسى, قازاقستاننىڭ بىرنەشە مارتە چەمپيونى, داڭقتى فۋتبولشى تيمۋر سەگىزباەۆ 1961 – 1971 جىلدار ارالىعىندا «قايرات» كومانداسى قۇرامىندا ويناعانى بەلگىلى. مىنە, سول كەزدە «قايراتتىڭ» تۋى بيىك جەلبىرەپ, جانكۇيەر بىتكەننىڭ ەسىن العان بولاتىن. ودان كەيىن سەگىزباەۆ قىزىلوردانىڭ «ءاۆتوموبيليسى» مەن قاراعاندىنىڭ «شاحتەرىندە» باپكەرلىك قىزمەت ەتتى. شەت ەل اسىپ, يەمەن حالىق رەسپۋبليكاسىنىڭ ۇلتتىق قۇرا­ماسىن جاتتىقتىردى. وزىمىزگە كەلىپ ۇلتتىق فۋتبول فەدەرا­تسيا­سىنىڭ پرەزيدەنتى بولدى. ت.سەگىزباەۆ اتىنداعى فۋتبول اكادەمياسىنىڭ اشىلۋ سال­تا­نا­تىندا «قايراتتىڭ» ارداگەر وي­ىن­­شىسى, بەلگىلى سپورت ءجۋرناليسى دياس وماروۆ جيىلعان كوپ­شى­لىك­كە, جاس فۋتبولشىلارعا ءوزى­نىڭ ءار­ىپ­تەسى جايلى جاقسى ەستەلىك اي­تىپ بەردى. قازاقستان مەن بەلورۋسسيا كەزدەسۋىندە «قاي­رات­تىڭ» داڭقىن شىعارعان قوس گول­دى دا سوققان وسى سەگىزباەۆ ەدى, سپورت­سۇيەر قاۋ­ىم ونى «تيمۋر جانە ونىڭ كومانداسى» دەپ بۇكىل كە­ڭەس ودا­عىنىڭ كوگىنە كوتەردى. ەندى, مىنە, قازاق ەلى ءوزىنىڭ داڭق­تى ۇل­ىن ءدا­رىپتەپ, كوزى تىرىسىندە فۋت­بول اكا­دە­مي­يا­سىن اشۋ ارقى­لى قۇرمەت كور­سە­تىپ وتىر, دەدى د.وماروۆ. بۇل كۇنى «الاش» ستا­ديو­نى­نىڭ جاسىل الاڭىندا قازاق سپورت جانە تۋريزم اكادەميا­سى­نىڭ مۇ­عا­لىمدەرىنەن قۇرالعان فۋتبول كو­مانداسى «قايراتتىڭ» تانىمال ارداگەرلەرىمەن دوستىق كەزدەسۋ وتكىزدى. قانات ەسكەندىر. الماتى. ––––––––––––––– سۋرەتتى تۇسىرگەن بەرسىنبەك سارسەنوۆ.