سويتسەك, قازاقستاندىقتار ۇيالى تەلەفونعا, SMS پەن ينتەرنەتكە بۇرىنعىعا قاراعاندا كوبىرەك تولەيتىن بولىپتى. بۇل تۋرالى ۇيالى بايلانىستىڭ 1200 ابونەنتىنىڭ اراسىندا ساۋالداما جۇرگىزگەن 4Service Group كومپانياسى حابارلاپ وتىر.
زەرتتەۋلەر ناتيجەسىندە شىعىندارى 1000-نان 2000-عا دەيىن جانە 2000-نان 3000-عا دەيىنگى ارالىقتى قۇرايتىندار ۇلەسى تيىسىنشە 7 جانە 5 پايىزعا ارتقانى انىقتالعان. ۇلەستىڭ قايتا بولىنىسكە ءتۇسۋى شىعىندارى 1000 تەڭگەدەن اسپايتىنداردىڭ ەسەبىنەن ورىن العان, ال ول وپەراتور قىزمەتى قۇنىنىڭ وسكەندىگىمەن تۇسىندىرىلەتىن كورىنەدى.
ۇيالى بايلانىس رىنوگىنداعى كليەنتتىك «يادرو» بايلانىستىڭ وسى ءتۇرى ءۇشىن ايىنا 1000 تەڭگەدەن 2000 تەڭگەگە دەيىن جۇمسايدى ەكەن. Tele2-دە مۇنداي پايدالانۋشىلار ۇلەسى ەڭ كوپ بولىپ شىققان, ياعني 69 پايىز. ال Altel, Activ جانە Beeline-دا ابونەنتتەردىڭ 47-52 پايىزى شامامەن 1000-2000 تەڭگە شىعىن شىعارادى. ابونەنتتەرىنىڭ 55 پايىزىنىڭ شىعىندارى ايىنا 2000 تەڭگەدەن اساتىن Kcell ەڭ «قىمبات» وپەراتور بولىپ تابىلادى ەكەن.
اي سايىن 6 گب-دان استام ينتەرنەت-ترافيك قولداناتىن ابونەنتتەردىڭ ۇلەسى 1 گب-دان از ينتەرنەت-ترافيك قولداناتىنداردىڭ ۇلەسىن 8 پايىزعا قىسقارتا وتىرىپ 5 پايىزعا ءوسىپ شىققان. وسىلايشا بۇگىنگى كۇنى Altel كليەنتتەرىنىڭ 52 پايىزى 6 گب-دان استام ۇيالى مالىمەتتەردى قولداناتىن بولسا, Tele2 مەن Activ-تە بۇل كورسەتكىش تيىسىنشە 41 جانە 33 پايىزدى قۇرايدى ەكەن.
بۇگىنگى كۇنى وپەراتورلاردىڭ بارلىعى دەرلىك سۇرانىسقا يە 1000-2000 تەڭگەلىك باعا دياپازونىندا نەعۇرلىم كوبىرەك تاريفتەر جاساۋعا تىرىسادى, دەپ اتاپ كورسەتىلگەن زەرتتەۋدە. Altel «Expert» تاريفتىك تۇرعىدا كۇن جانە ءتۇن دەپ بولمەستەن بارىنشا ۇلكەن قىزمەت كولەمىن كورسەتىپ كەلەدى. بىراق قىزمەتتىڭ ەڭ قىمبات ءتۇرى دە وسى بولىپ تابىلادى.
ساۋالداما كورسەتكەندەي, قۇنى شامامەن 1200 تەڭگە تۇراتىن Tele2-ءنىڭ ۇسىناتىن تاريفتىك جوسپارى مەيىلىنشە ۇنەمدى جانە ءتيىمدى بولىپ ەسەپتەلەدى ەكەن. ماسەلەن, «پروستو ستارت» تاريفتىك جوسپارىنىڭ باعاسى ايىنا 1190 تەڭگە عانا. سونىمەن بىرگە وعان 600 SMS قوسىلعان, بۇل وزگەلەرمەن سالىستارعاندا سانى جاعىنان ەڭ كوبى بولىپ سانالادى.
ال ترافيكتىڭ بازالىق كولەمى 5 گب بولسا, وزگە وپەراتورلارعا قوڭىراۋ شالۋ ءليميتى ايىنا 80 مينۋت بولىپ وتىر. 400 مب ينتەرنەت-ترافيك ءۇشىن كۇنىنە 27 تەڭگە بەلگىلەۋ ارقىلى Tele2 جىلدىق پاكەتتىڭ ەڭ تومەنگى باعاسىن ۇسىنۋدا. 1 مب ءۇشىن Activ, Kcell (0,06 تەڭگە/مب) جانە Tele2 (0,07 تەڭگە/مب) ەڭ تومەنگى باعا ۇسىنسا, Beeline (0,11 تەڭگە/مب) وپەراتورى ەڭ جوعارى باعانى ۇسىنىپ وتىر.
جىل ىشىندە ۇيالى بايلانىستىڭ بۇل سياقتى ابونەنتتەرىنىڭ سانى تاعى دا 4 پايىزعا ارتقان. بۇل تۇرعىدا «سيمكاسىن» 5 جىلدان استام ۋاقىتتان بەرى وزگەرتپەي كەلە جاتقان Kcell كوش باستاۋشى بولىپ تابىلادى. 2016 جىلدىڭ ءتيىستى كەزەڭىمەن سالىستىرعاندا ونىڭ كليەنتتەرىنىڭ «يادروسى» 16 پايىزعا كوبەيگەن.
ال, Activ وپەراتورىندا بۇگىندە مۇنداي كليەنتتەر 80 پايىزدى قۇرايدى, Beeline-دا 75 پايىز. Tele2 ابونەنتتەرىنىڭ نەگىزگى بولىگى بايلانىس وپەراتورىنىڭ قىزمەتىن 1 جىلدان 3 جىلعا دەيىنگى ارالىقتا عانا پايدالانادى, بۇل 2016 جىلدىڭ ءتيىستى كەزەڭىمەن سالىستىرعاندا 2 پايىزعا تومەن.
سونداي-اق زەرتتەۋ ناتيجەلەرى بارلىق وپەراتورلاردىڭ 75 پايىزدان استام كليەنتتەرىنىڭ «كونبىس» (وپەراتور اۋىستىرۋدى ويلاستىرماعان) ەكەنىن كورسەتكەن. داۋىستىڭ ەستىلۋى مەن ءموبيلدى ينتەرنەت ساپاسىنىڭ تومەندىگى, قىزمەت باعاسىنىڭ جوعارىلىعى, قىزمەت كورسەتۋ ساپاسى جانە باسقا سەبەپتەر ابونەنتتەردىڭ باسەكەلەس رەسپوندەنتتەرگە اۋىسۋىنا باستى سەبەپكەر بولىپ وتىر.
ءسوز سوڭىندا ەلىمىزدىڭ ۇيالى بايلانىس رىنوگىندا باسەكەلەستىكتىڭ ءالى دە كوڭىلدەگىدەي ەمەس ەكەنىن ايتا كەتۋ قاجەت. جوعارىدا كەلتىرىلگەن تسيفرلاردان اڭعارعانىمىزداي, وپەراتورلار اراسىنداعى باعا ايىرماسى سونشالىقتى ۇلكەن ەمەس, شامامەن العاندا ول 200 تەڭگە دەڭگەيىندە عانا. كليەنتتەردىڭ وپەراتور اۋىستىرۋعا اسىقپاۋىنىڭ ءبىر سىرى دا وسىندا جاتسا كەرەك.
ءبىزدىڭ بىلۋىمىزشە, وركەنيەتتى ەلدەردە ۇيالى تەلەفونمەن كادىمگى اتس-قا جالعانعان تەلەفونعا قوڭىراۋ شالا بەرۋگە بولادى, ياعني تاريف وعان مۇمكىندىك بەرەدى. ال, بىزدە ۇيالى تەلەفونىڭمەن ۇيىڭدەگى تەلەفونعا قوڭىراۋ سوعىپ 5-10 مينۋت سويلەسسەڭ بالانسىڭداعى اقشادان جۇرداي بولاسىڭ. سوندىقتان قازاقستاندا ۇيالى تەلەفونمەن تەك ەكىنشى ۇيالى تەلەفونعا عانا باتىل تۇردە قوڭىراۋ شالا الاسىڭ. ونىڭ وزىندە دە وپەراتورلاردىڭ ورتاق بولعانى ءتيىمدى. ويتپەگەن كۇندە ارتىق شىعىن شىعاراتىنىڭا ەش كۇمان جوق.
بارشامىز دا «قىزىعى» مەن «شىجىعىنا» تويماي جۇرگەن ۇيالى بايلانىس قىزمەتىنە قاتىستى كەيبىر كەرەك دەرەكتەر مىنە, وسىنداي.
