قامكوڭىل جانداردىڭ قونىس تويى

وبلىستا مۇمكىندىگى شەكتەۋلى جانداردى تۇرعىن ۇيمەن قامتاماسىز ەتۋگە ايرىقشا كوڭىل بولىنۋدە. اسىرەسە, سال اۋرۋلارىنا شالدىعىپ, قول ارباعا تاڭىلعان ازاماتتار ءۇشىن ارنايى پاندۋستارمەن جابدىقتالعان تۇرعىن ءۇي سالۋ جوباسى ەلىمىزدە تۇڭعىش رەت ءبىزدىڭ وبلىستا عانا جۇزەگە اسىرىلىپ وتىر دەسەك, شىندىقتان الشاق كەتپەسپىز. سونىڭ ايقىن ءبىر مىسالى, جاقىندا پاي­دالانۋعا بەرىلگەن «بولاشاق» شاعىن اۋدانىن­داعى 40 پاتەرلى توعىز قاباتتى تۇرعىن ءۇي بولىپ تابىلادى. بۇل سوڭعى ءۇش جىلدا مۇگەدەك جان­دارعا ارنايى سالىنعان ەكىنشى تۇرعىن ءۇي. ءمۇم­كىندىگى شەكتەۋلى جانداردىڭ قۋانىشىن بولىسۋگە وبلىس اكىمى ارحيمەد مۇحام­بەتوۆتىڭ ءوزى كەلدى. ءوڭىر باسشىسى قول ارباعا تاڭىلعان قامكوڭىل ازاماتتاردى قۋانىشتارىمەن قۇتتىقتاپ, جىلى لەبىز, ىستىق ىقىلاسىن ءبىلدىردى. – ەل تاۋەلسىزدىگىنىڭ 20 جىلدىعىنا تارالعىلى تارتۋلارمەن كەلىپ وتىرمىز. ەلباسى نۇرسۇلتان نازارباەۆتىڭ تاۋەلسىزدىكتىڭ 20 جىلدىعى قارسا­ڭىندا حالىقتىڭ وزدەرىن الەۋمەتتىك جاعىنان قورعالعانىن, بارلىق جۇمىستاردىڭ ولاردىڭ تۇرمىسىن جاقسارتۋعا باعىتتالعانىن سەزىنەتىندەي شارۋالار ىستەۋ جونىندە تاپسىرماسى ورىندالۋدا. ەلباسىنىڭ تىكەلەي باستاماسىمەن بىرقاتار الەۋ­مەتتىك باعدارلامالار جۇزەگە اسىرىلۋدا, مۇمكىن­دىگى شەكتەۋلى جاندار قۇقىقتىق جاعىنان قورعالدى. قازىر وبلىستا مۇمكىندىگى شەكتەۋلى جاندارعا ءدارى-دارمەك تەگىن بەرىلەدى, قولاربامەن, ورتوپەديالىق جابدىقتارمەن قامتاماسىز ەتۋ جاقساردى, ولار قوعامدىق كولىكتە تەگىن جۇرەدى, كوممۋنالدىق تولەمدەر ءۇشىن وتەماقى تولەنەدى. سونىڭ ايقىن دالەلى – سال اۋرۋلارىنا ارنايى سالىنعان وسى تۇرعىن ءۇي بولىپ تابىلادى. بۇل باعىتتاعى جۇمىس جالعاسىن تابادى. ءبىز مۇگەدەك جانداردىڭ قوعامدا وزدەرىن دەنى ساۋ ازاماتتارمەن تەڭ سەزىنۋلەرى ءۇشىن بارلىق جاعدايدى جاسايمىز,– دەدى اكىم. مۇمكىندىگى شەكتەۋلى ادامدارعا ارنالعان وسى ۇيدە ولارعا قولايلى جاعداي تۋعىزىلعان. ىشكە قولارباسىمەن كىرۋ ءۇشىن پاندۋس جاسالدى. ءبىر توننا جۇك كوتەرەتىن ليفت جۇمىس ىستەيدى. ءبىرىنشى قاباتتا قولاربا قوياتىن بولمە بار. سونداي-اق, وسى قاباتتا ورتوپەديالىق, اياق كيىم جوندەۋ شەبەر­حانالارى , تىگىن تسەحى جانە باسقا مۇگەدەك جاندارعا قاجەتتى جۇمىس ورىندارى اشىلاتىن بولادى. ولاردا كەمىندە جيىرمادان استام مۇمكىن­دىگى شەكتەۋلى ازامات جۇمىس ىستەيدى. ءسويتىپ, جەرگىلىكتى بيلىك «ءبىر وقپەن ەكى قوياندى» بىردەن اتىپ الدى دەۋگە بولادى. مۇگەدەك جانداردى جايلى تۇرعىن ۇيمەن قامتاماسىز ەتە وتىرىپ, ولارعا جۇمىس ىستەپ, كۇنكورىس جاساۋعا جاعداي تۋعىزىلدى. مۇمكىندىگى شەكتەۋلى جاندار وبلىس اكىمى ارحيمەد مۇحامبەتوۆتىڭ قولىنان سۋ جاڭا پاتەر كىلتتەرىن الىپ, قۋانىشقا كەنەلدى. 40 پاتەرلى وسى تۇرعىن ءۇيدى «كونتاكت» جشس سالدى. وعان بيۋدجەتتەن 332,9 ميلليون تەڭگە ءبولىندى. پاتەرلەر كەڭ, بالكوندارىنىڭ ءوزى قولاربا­مەن قوزعالۋعا قولايلى ەتىپ جوبالانعان. سالتاناتتى ساتتە ءسوز العان «اقتوبە قالاسىن­داعى سال اۋرۋلارىنا شالدىققان ازاماتتاردىڭ قۇقىعىن قورعاۋ قوعامى» قوعامدىق بىرلەستىگىنىڭ ءتورايىمى قۇرالاي بايمەنوۆا, پاتەرلى بولعان الىبەك ەلەۋ­سىزوۆتىڭ اناسى ءزامزا شالاباەۆا وسىنداي شىنايى قامقورلىقتارى, كومەكتەرى ءۇشىن ەلباسىنا, ءوڭىر باسشىسىنا شىن جۇرەكتەن العىس­تارىن جەتكىزدى. وبلىس اكىمى ارحيمەد مۇحامبەتوۆ ەكى بولمەلى پاتەرگە قول جەتكىزگەن ءبىرىنشى توپتاعى مۇگەدەك ءسابيت مۇحيتوۆتىڭ وتباسىندا بولىپ, پاتەردىڭ جايلىلى­عىنا كوز جەتكىزدى, قۋانىشتارىن ءبولىستى. ەكى بالاسىمەن اناسىنىڭ قولىندا تۇراتىن ازامات­تىڭ قۋانىشىندا شەك جوق. بۇدان سەگىز جىل بۇرىن جول اپاتىنان سال بولىپ قالعان جارىمجان بالاسى مەن ەكى نەمەرەسىن قايتسەم جەتكىزەمىن دەپ شىبىن جانىن شۇبەرەككە ءتۇيىپ جۇرگەن سابەش انانىڭ ەسىنە ارتتا قالعان قيىندىقتار ءتۇستى مە, كوزىن جاۋلىعىنىڭ ۇشىمەن سۇرتكىلەپ قويادى. سەگىز جىل بويى جايلى پاتەردىڭ ازابىن تارتۋ وڭاي ەمەس, ارينە. سەمەيدە اسكەري قىزمەتىن وتەپ, يادرولىق سى­ناقتىڭ زاردابىنان ەكى اياعىنان بىردەي ايىرىلعان قۋات بۇلدىقوۆ تا ون جىل ءۇي كەزەگىندە تۇرىپ, ەكى بولمەلى پاتەرگە قول جەتكىزىپتى. بۇعان دەيىن جاتاق­حانادا تۇرىپ كەلگەن وعان العان پاتەرى حان سارايى­نان كەم ەمەس. ول دا تولقۋلى. دەگەنمەن, بۇل قۋا­نىشتىڭ كوز جاسى ەكەنىن تۇسىندىك ءبىز. ساتىبالدى ءساۋىرباي. اقتوبە وبلىسى.