ءۇش كۇنگە سوزىلاتىن سلەت جۇمىسىندا جاستاردى تولعاندىراتىن ساۋالدار تالقىعا تۇسەدى, ءتۇرلى ترەنينگتەر مەن شەبەرلىك سىنىپتارى, كەزدەسۋلەر, كوشە سۋبمادەنيەتى فەستيۆالى جوسپارلانعان.
قازاقستان جاستار كونگرەسى 2002 جىلى ەلباسى باستاماسىمەن اشىلدى. بۇگىنگە دەيىن «جاسىل ەل» بىرىڭعاي ەڭبەك جاستارى ۇيىمى, «جاس ۇلان جاسوسپىرىمدەر ۇيىمى, «ستۋدەنتتەر اليانسى» سىندى كوپتەگەن ۇيىمدار قۇرىلدى. كونگرەستىڭ اتقارۋشى ديرەكتورى ايدىن ءسابيتوۆ: «بيىل اسكەري-پاتريوتتىق باعىتتى ايرىقشا نازارعا الىپ وتىرمىز, - دەيدى. – «جاس قارۋ» پاتريوتتىق ۇيىمى جۇمىسىن باستادى. تاعى ءبىر جاڭالىق – دۇنيەجۇزىلىك بانكتىڭ گرانتىن جەڭىپ الدىق. اۋىل جاستارىنىڭ باستامالارىن قولداۋدى ماقسات ەتىپ وتىرمىز. جالپى ەلىمىز بويىنشا 106 كونگرەستىك ۇيىم بار».
رەسپۋبليكانىڭ تۇكپىر-تۇكپىرىنەن جايىق جاعاسىنا جينالعان 300-گە جۋىق جاس سلەت جۇمىسىنا بەلسەندى قاتىسىپ, تانىم كوكجيەكتەرىن كەڭەيتپەك. ال ەرتەڭ داريعا نازارباەۆا باستاعان سلەت قاتىسۋشىلارى قر ۇلتتىق گۆاردياسىنىڭ №5546 اسكەري بولىمشەسىنە بارادى. پلەنارلىق ءماجىلىس, تۇنگى الاۋ جانىنداعى بەيرەسمي كەزدەسۋ, وبلىس اكىمى نۇرلان نوعاەۆپەن كەزدەسۋ, اشىق ديالوگ الاڭى سىندى شارالار دا جوسپارلانعان. سلەت "جاڭا دەم» ەكولوگيالىق اكتسياسىمەن قورىتىندىلانادى.
باقىتگۇل باباش,
«ەگەمەن قازاقستان»
اتىراۋ.
