قۇجاتتاردىڭ ءبىرى يتاليالىق «بيونەت» كومپانياسىمەن بىرلەسىپ, تۇرمىس قالدىقتارىن وڭدەيتىن زاۋىت سالۋعا ارنالعان. جوبانىڭ قۇنى – شامامەن 100 ملن دوللار. بۇل دەرەكتەردى ۇكىمەت ۇيىندە وتكەن ءباسپاسوز ءماسليحاتىندا «Kazakh Invest» ۇك» اق باسقارما توراعاسىنىڭ ورىنباسارى ءبىرجان كانەشەۆ ايتتى.
«بيىل ەكسپو-2017 كورمەسىنىڭ ۇيىمداستىرىلۋى بىزگە تاپتىرماس مۇمكىندىك الاڭى بولدى. ونى ىسكە اسىرۋ ءۇشىن ارنايى پاۆيلون تۇرعىزىلدى, وندا ينۆەستيتسيالار جانە دامۋ مينيسترلىگى مەن استانا قالاسى اكىمدىگىنىڭ وكىلدەرى ارەكەتتەگى جانە الەۋەتتى شەتەلدىك ينۆەستورلارمەن كەزدەسۋلەر وتكىزدى. ونىمەن قوسا, «Kazakh Invest» پاۆيلونىنىڭ بازاسىندا الەۋەتتى ينۆەستورلاردىڭ استانا حالىقارالىق قارجى ورتالىعى, «Astana Innovations», «نازارباەۆ ۋنيۆەرسيتەتى» جانە ۇلتتىق كومپانيالار وكىلدەرىمەن كەزدەسۋلەرى ۇيىمداستىرىلدى.
كورمە بارىسىندا 150-دەن استام جيىن وتكىزدىك. «Kazakh Invest» كومپانياسى مۇمكىندىكتى بارىنشا پايدالاندى. شاراعا قاتىسقان ەلدەردىڭ وكىلدەرىمەن كەزدەسىپ, ەلىمىزدىڭ ينۆەستيتسيا سالاسىنا قانداي قولداۋ كورسەتىلىپ جاتقانىن تۇسىندىردىك. سونىمەن قاتار باسقا پاۆيلونداردا وتكەن بيزنەس كونفەرەنتسيالارعا, باسقوسۋلارعا قاتىسىپ, قوسىمشا 100-دەن استام جيىنعا اتسالىستىق. ناتيجەسىندە 22 قۇجات راسىمدەلدى», دەدى ول. ءبىرجان بيسەكەن ۇلىنىڭ ايتۋىنشا, بۇدان بولەك اقش, نيدەرلاندى, شۆەيتساريا, موناكو, تۇركيا, قىتاي سياقتى قازاقستاننىڭ قازىرگى ءىرى ينۆەستورلارىمەن كەلىسسوزدەر جۇرگىزىلىپ, ءوزارا ىنتىماقتاستىق باعىتتارى ايقىندالعان. ينۆەستورلار تاراپىنان ءبىراز ۇسىنىستار ايتىلسا, ونىڭ بارلىعى پىسىقتالۋ ۇستىندە.
ءبىرجان كانەشەۆ قول جەتكىزىلگەن ۋاعدالاستىقتار اياسىنداعى ماڭىزدى جوبالارعا توقتالدى. «سالماعى باسىم 4 جوبانى اتاپ وتكىم كەلەدى. سەبەبى, ولاردى ىسكە قوسۋعا مۇمكىندىك بار. مىسالى, «گەنديگرۋپپ» كومپانياسى تەمىرتاۋ قالاسىنداعى سۋتەگى ءوندىرىسى بويىنشا زاۋىتقا ينۆەستيتسيا سالدى. جوبانىڭ قۇنى ناقتى انىقتالماعان. شامامەن 150 ملن دوللاردى قۇرايدى. سونىمەن قاتار يتاليانىڭ «بيونەت» كومپانياسى تۇرمىس قالدىقتارىن وڭدەيتىن زاۋىت سالۋدى ۇسىندى. بۇل – وتە ماڭىزدى جوبا», دەگەن باسقارما توراعاسىنىڭ ورىنباسارى الداعى ۋاقىتتا پولشانىڭ «Polpharma» كومپانياسى وتاندىق فارماتسەۆتيكا كومپانياسىنا قارجى سالۋدى جوسپارلاپ وتىرعانىن جەتكىزدى. 1935 جىلى ىرگە قالاعان بۇل ۇيىم قازىرگى تاڭدا ورتالىق جانە شىعىس ەۋروپا, كاۆكاز, ورتالىق ازيا نارىقتارىندا كوش باستاپ تۇر.
«Polpharma» ەلىمىزدەگى ءدارى-دارمەك سالاسىنا رەينۆەستيتسيا جاساماق نيەتتە. بۇل سالانى دا بىزگە دامىتۋ قاجەت. ويتكەنى, قازىرگى تاڭدا قازاقستاندىق فارماتسيا سالاسىندا حالىقارالىق دەڭگەيدە اككرەديتاتسيادان وتكەن عىلىمي-زەرتتەۋ لابوراتورياسى جوق. سونداي-اق, ءبىز «Ingave Kazakhstan» كومپانياسىمەن دە بايلانىس ورناتا بەرەمىز. سوڭعىسى استانا قالاسىنداعى «smart» جوبالارعا قاتىستى. جالپى, كەلىسىمشارتتار اياسىندا مۇناي جانە حيميا, فارماتسەۆتيكا, IT-تەحنولوگيا, ماشينا قۇراستىرۋ سالالارىنا باسىمدىق بەرىلەدى», دەدى «Kazakh Invest» ۇلتتىق كومپانياسىنىڭ وكىلى. ونىڭ مالىمەتىنشە, ۇلتتىق كومپانيا مەن «Engave Kazakhstan» اراسىندا ءوزارا تۇسىنىستىك تۋرالى مەموراندۋم جاسالعان. كەلىسىم اياسىندا «استانا قوعامدىق كولىكتەرى جولاۋشىلارىن اقپاراتتاندىرۋدىڭ مۋلتيمەديالىق جۇيەسى» ينۆەستيتسيالىق جوباسى جەتىلدىرىلەدى.
اسحات رايقۇل,
«ەگەمەن قازاقستان»
