ءىس-شاراعا قاتىسقان ەنەرگەتيكا ءمينيسترى قانات بوزىمباەۆتىڭ سوزىنە ساي, كەڭەستىڭ جۇمىسى ەڭ اۋەلى يادرولىق ونىمدەردى بەيبىت ماقساتتا قولدانۋعا باعىتتالعان. ۆەدومستۆو باسشى مۇنداي فورۋمداردىڭ يادرولىق مەديتسينا جانە اۋىلشارۋاشىلىعىنا جاڭا ادىستەمەلەردى ەنگىزۋگە كومەكتەسەتىنىن ايتادى. سونداي-اق, مينيستر جيىننىڭ يادرولىق قارۋدى تاراتپاۋعا جانە يادرولىق تەحنولوگيالاردىڭ وزىق ۇلگىلەرىن مەڭگەرۋگە تيگىزەر پايداسىنا توقتالىپ, قازاقستاننىڭ اتوم ەنەرگياسىن بەيبىت تۇردە قولداناتىنىن مالىمدەدى.
«قازاقستان ازيالىق يادرولىق كووپەراتسيا فورۋمىنىڭ قۇرامىنا 2010 جىلدان بەرى مۇشە. سودان بەرى ەلىمىز ۇيىم جۇمىسىنا بەلسەنە قاتىسىپ كەلەدى. ءبىز اتوم ەنەرگياسىن بەيبىت ماقساتتا قولدانۋ بويىنشا الەمدەگى قوعامداستىقتارمەن ارىپتەستىك ورناتۋعا مۇددەلىمىز», – دەدى ق.بوزىمباەۆ.
سونىمەن قاتار, جۋرناليستەرگە بەرگەن سۇحباتىندا ەنەرگەتيكا ءمينيسترى ەلىمىزدەگى ۋران ءوندىرىسىنىڭ دامۋ باعىتىنا توقتالدى. ونىڭ ايتۋىنشا, قازىرگى تاڭدا قازاقستان الەمدە ۋران ءوندىرۋ بويىنشا كوش باستاپ تۇرسا, «قازاتومپروم» كومپانياسى مەن ونىڭ ەلىمىزدەگى ارىپتەستەرى شىعارعان راديواكتيۆتى ەلەمەنتى الەمدىك نارىقتىڭ 40 پايىزىن قۇرايدى. ق.بوزىمباەۆ كەلەشەكتە قازاقستان اتوم ستانتسيالارىندا قولداناتىن ءونىمدى وزىمىزدە شىعارۋعا تالپىناتىنىن ۋادە ەتتى.
كەڭەس جۇمىسىنا قاتىسقان جاپونيا اتوم ەنەرگياسى جونىندەگى كوميسسياسى توراعاسى يوشياكي وكا اتوم ەنەرگياسىن بەيبىت ماقساتتا پايدالانۋدىڭ تيىمدىلىگىن ءسوز ەتە كەلە, يادرولىق تەحنولوگيا مەن ەلەكتروستانتسيالاردان جاپونيانىڭ باس تارتپايتىنىن جەتكىزدى.
«بيىلدان باستاپ جاپونيا يادرولىق تەحنولوگيانى قولدانۋ جونىندە جاڭا ستراتەگيا بەكىتتى. بۇل باعىت اتالعان سالاعا قاتىستى ەلدەگى نەگىزگى قۇجات بولىپ سانالادى. جاپونيا يادرولىق تەحنولوگيانىڭ قاۋىپسىزدىگىن نىعايتۋ مەن حالىق اراسىندا ءتۇسىندىرۋ جۇمىستارىن جۇرگىزەدى. اتوم ەنەرگياسىن بەيبىت ماقساتتا قولدانۋدىڭ ادامزاتقا تيگىزەر پايداسى مول ەكەنىنە سەنىمدىمىن. سوندىقتان, استانادا ءوتىپ جاتقان فورۋم جارقىن بولاشاققا جول اشاتىنى انىق», – دەدى ي.وكا.
بيىلعى كەڭەس جۇمىسىن ەنەرگەتيكا مينيسترلىگى, جاپونيا اتوم ەنەرگياسى جونىندەگى كوميسسياسى جانە جاپونيا مينيسترلەر كابينەتىنىڭ حاتشىلىعى ۇيىمداستىرىپ وتىر. شاراعا فورۋمعا مۇشە 12 ەلدەن ارنايى مەيماندار كەلگەن. جالپى, ۇيىم 2000 جىلى اتوم ەنەرگياسى جونىندەگى كوميسسياسىنىڭ باستاماسىمەن ازيا جانە تىنىق مۇحيتى ەلدەرى اراسىندا يادرولىق جانە رادياتسيالىق تەحنولوگيانى ءتيىمدى پايدالانۋ جونىندە ارىپتەستىك ورناتۋ ماقساتىندا قۇرىلدى.
اباي اسانكەلدى ۇلى,
«ەگەمەن قازاقستان»
