سوعان وراي قازىر «ەڭبەك» بەكەتىن اۋىستىرۋ جۇمىستارى جۇرگىزىلۋدە. بۇل كەن جۇمىستارىن دامىتۋدىڭ كەلەشەك باعىتى بولىپ سانالادى. كولىك جولدارى سىزباسىن قايتا قۇرۋدىڭ اۋقىمدى جوباسى اتالعان بەكەتتى كوشىرۋ قاجەتتىلىگىن تالاپ ەتەدى. كەن قويمالارىن كارەردىڭ «يۋجنىي» بەتكەيىنە جىلجىتۋ جانە بەكەتتىڭ تەمىرجول جولدارىن بولشەكتەۋ جۇرگىزىلۋدە.
«مۇنداي تۇرلەندىرۋلەر كارەر ونىمدىلىگىن ايتارلىقتاي ارتتىرۋى ءتيىس. جاڭا ورىنداعى «ەڭبەك» بەكەتىنىڭ ەكى تيەۋ تۇيىقتارى ىسكە قوسىلدى, كەلەسى ەكەۋىنىڭ دە 50 پايىزى دايىن. بەس شاقىرىم تەمىرجولدىڭ تەڭ جارتىسى توسەلدى, جەتى باعىتتامالى بۇرمالاردىڭ تورتەۋى جۇمىس ىستەپ تۇر» دەپ ناقتىلادى «سسكوب» اق جول شارۋاشىلىعى جانە عيماراتتار باسقارماسى باس ينجەنەرىنىڭ كۇردەلى قۇرىلىس جانە كۇردەلى جوندەۋ جونىندەگى ورىنباسارى سەرگەي ۆيلگەلم.
تيىمدىلىكتىڭ ناقتى كورسەتكىشتەرى بەكەت تولىق قۋاتىنا كوتەرىلگەندە بەلگىلى بولادى جانە سوندا عانا وزگەرىستىڭ تيىمدىلىگىن باعالاۋعا بولادى. كەنىشتەگى بۇل وزگەرىستەر جيەكتەردى تومەندەتۋ ارقىلى قاشار كارەرىنىڭ «سەۆەرنىي» جانە «ۆوستوچنىي» بەتكەيلەرىنىڭ كەنتاستى ايماعىن دامىتۋعا, كەرتپەشتەردى, قاۋىپسىزدىك بەرمالارىن جوبالىق نورماتيۆتەرگە كەلتىرۋگە جاعداي جاسايدى جانە كەندى ارشۋ مەن دايىنداۋدى قامتاماسىز ەتەدى. تەمىرجولدارىن تولىق تۇرلەندىرگەننەن كەيىن پويىزدار قوزعالىسىنىڭ باعىتى قىسقارادى, كەندى جەتكىزۋگە كەتەتىن ۋاقىت ۇنەمدەلەدى.
ءنازيرا جارىمبەت,
«ەگەمەن قازاقستان»
قوستاناي وبلىسى, رۋدنىي قالاسى
