ونىڭ ءوزى تەكتەس الەۋمەتتىك مەكەمەلەردەن وزگەشەلىگى – ازاماتتارعا مەملەكەتتىك قىزمەتتى ساپالى ءارى قولجەتىمدى, قولايلى تۇردە كورسەتۋدى ماقسات تۇتۋى. مۇنداعى جۇمىس ء«بىر تەرەزە» قاعيداتىنا نەگىزدەلگەن.بىرەگەي جوبا «100 ناقتى قادام» ۇلت جوسپارى اياسىندا ومىرگە جول تارتتى.
بۇعان ءتان باسىمدىقتار اشىقتىق پەن جاريالىلىققا ارقا سۇيەۋ, سىبايلاس جەمقورلىقتىڭ الدىن الۋ جانە قولجەتىمدىلىك پەن ىڭعايلىلىقتى ءبىرىنشى كەزەككە قويۋ بولىپ وتىر.
«حالىقتىق كەڭسەدە» تۇرعىندار مەملەكەتتىك قىزمەتتى پايدالانۋ ءۇشىن ءتۇرلى ساتىلاردان ءوتىپ اۋرە-سارساڭعا تۇسپەيدى. وتىنىشتەرىن بەرسە جەتكىلىكتى. قالعان ءىستىڭ ءبارى ءوز جونىمەن رەتىن تاۋىپ جۇرە بەرەدى. ويتكەنى مۇنداعى ماماندار حالىقتىڭ تالاپ-تىلەكتەرىن كوپ كەشىكپەي ءتيىستى مەملەكەتتىك ورگاندارعا جولدايدى. قاناتقاقتى جوبانىڭ «حالىقتىق كەڭسە» اتاۋىنىڭ ءبىر توركىنى وسىنداي بولىپ شىقتى. بۇعان دەيىنگى قۇقىقتىق قىزمەتتەر ورتالىعى دا الداعى كەزدە «حالىقتىق كەڭسەمەن» قويان-قولتىق جۇمىس جاساماق.
قىزمەتتەر تىزبەسىن نەعۇرلىم ساپالى ءارى جان-جاقتى كورسەتۋ ءۇشىن جاڭا الەۋمەتتىك قۇرىلىمعا 20 ۇيىمنىڭ كەڭەسشىلەرى مەن ماماندارىن قاتىستىرۋ كوزدەلگەن. مۇندا قىزمەتتىڭ 600-دەن استام ءتۇرى كورسەتىلمەك. اتاپ ايتقاندا, قىزمەتتىڭ ەڭ نەگىزگىلەرىن جەر قاتىناستارى, تۇرعىن ءۇي-كوممۋنالدىق شارۋاشىلىعى, كولىك جانە كوممۋنيكاتسيا, اۋىل شارۋاشىلىعى, ءبىلىم, كاسىپكەرلىكپەن شۇعىلدانۋ جانە قۇرىلىس پەن تۋريزم سالالارى قۇرايدى.
تۇساۋى كەسىلگەنىنە ساناۋلى كۇندەر بولا تۇرسا دا «حالىقتىق كەڭسەنىڭ» قىزمەتىنە دەگەن سۇرانىستار بىردەن ءوسىپ سالا بەردى. بۇل سوزىمىزگە العاشقى كۇننىڭ وزىندە ورتالىققا مىڭداعان ادامداردىڭ كەلگەنى ايقىن ايعاق.
تەمىر قۇسايىن,
«ەگەمەن قازاقستان»
اقتوبە
