ۇلتتىق اكادەميالىق كىتاپحانادا وتكەن كوميسسيا وتىرىسىندا مەملەكەتتىك حاتشى پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا بىزگە اشىقتىق پەن ۇزدىك جەتىستىكتەرگە بەيىمدىلىك قاجەتتىگىن ايقىنداپ بەرگەنىن ايتتى.
«مەملەكەت تاراپىنان وتاندىق عىلىم مەن تەحنيكا سالاسىنىڭ دامۋىنا زور ءمان بەرىلىپ كەلە جاتقانىن وزدەرىڭىز بىلەسىزدەر. ەلباسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى بيىلعى جولداۋىندا ەكونوميكانىڭ تەحنولوگيالىق تۇرعىدان جاڭعىرۋىن جەدەلدەتۋ ءۇشىن عىلىمدى تەحنولوگيا مەن يننوۆاتسياعا باعىتتاۋ قاجەتتىگىن اتاپ ءوتتى. زەرتتەۋشى عالىمدار, ءوندىرىس جاڭاشىلدارى, عىلىمي-تەحنيكالىق زيالى قاۋىم وكىلدەرى ەل ەكونوميكاسىنىڭ دامۋىنا, ۇلتتىڭ زياتكەرلىك الەۋەتىن نىعايتۋعا ەلەۋلى ۇلەس قوسىپ جاتىر. ءبىز 2017 جىلعى قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعىن الۋ ءۇشىن ۇسىنىلعان, الدىن الا ىرىكتەۋدەن وتكەن جۇمىستاردى تانىستىرۋ مەن تالقىلاۋ ناتيجەلەرىن قاراستىرامىز جانە ءتىزىمىن بەكىتىپ, قورىتىندى شەشىم قابىلداپ, ەلباسىنا ءوزىمىزدىڭ ۇسىنىسىمىزدى ايتۋىمىز قاجەت», دەدى مەملەكەتتىك حاتشى.
وسى ورايدا گ.ابدىقالىقوۆا ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق عىلىم ءارى تەحنيكا قايراتكەرلەرى ەڭبەگىن قوعام مەن مەملەكەت تاراپىنان جوعارى باعالاۋدى بىلدىرەتىنىن اتاپ ءوتتى.
ايتا كەتەيىك, ەكى جىلدا ءبىر رەت جەتى سىيلىققا دەيىن بەرىلەتىن بۇل سىيلىقتى مەملەكەت باسشىسى تاۋەلسىزدىك كۇنى قارساڭىندا تاپسىرادى دەپ كۇتىلۋدە. بيىلعى جىلى مۇنداي ماراپاتتى الۋ ءۇشىن بارلىعى 24 جۇمىس ءتۇسىپ, الدىن الا ىرىكتەۋدەن سوڭ ەكىنشى كەزەڭگە ونىڭ 11-ءى وتكەن. ءال-فارابي اتىنداعى عىلىم مەن تەحنيكا سالاسىنداعى 2017 جىلعى مەملەكەتتىك سىيلىقتىڭ اقشالاي كولەمى 18,6 ملن تەڭگەنى قۇرايدى. كوميسسيا وتىرىس قورىتىندىسى بويىنشا سىيلىقتى بەرۋ ءۇشىن مەملەكەت باسشىسىنىڭ قاراۋىنا ۇسىنىلاتىن جۇمىستاردىڭ ءتىزىمىن ايقىندادى.
نۇرلىبەك دوسىباي,
«ەگەمەن قازاقستان»
