«تەرگەۋ ءجۇرىپ جاتىر. امان قالعان قازاقستاندىق جۇرگىزۋشى كۋاگەر رەتىندە جاۋاپ بەرۋدە, سوندىقتان تاعى بىرنەشە كۇن رەسەيدە بولادى. ول اۋىر جاراقات العان جوق», دەپ مالىمدەدى ءباسپاسوز قىزمەتىنەن.
ءسىم, سونداي-اق, قازا تاپقان جۇرگىزۋشىنىڭ دەنەسى قازاقستانعا جاقىن ارادا جەتكىزىلەتىنىن حابارلادى.
«قازىرگى تاڭدا قازاقستاندىق ديپلوماتتار مارقۇمنىڭ تۋعان-تۋىسقاندارىمەن بايلانىستا, ۇيىمداستىرۋشىلىق ماسەلەلەر شەشىلىپ جاتىر», - دەپ ءتۇسىندىردى ءسىم-نەن.
ەستەرىڭىزگە سالا كەتسەك, جول اپاتى 6 قازان كۇنى جەرگىلىكتى ۋاقىتپەن 03:39-دا پوكروۆ تەمىرجول ستانساسىندا بولدى. الدىن الا مالىمەتتەر بويىنشا, اۆتوبۋس جۇرگىزۋشىسى قىزىل شامدى ەلەمەي, تەمىرجول وتكەلىنە شىعىپ كەتكەن. سالدارىنان سانكت-پەتەربۋرگ – تومەنگى نوۆگورود باعىتىندا كەلە جاتقان پويىزعا سوعىلدى. اپات سالدارىنان كەم دەگەندە 17 ادام قازا تاپتى.
«سوڭعى مالىمەت بويىنشا, رەسەيدىڭ ۆلاديمير وبلىسىنداعى جول اپاتى كەزىندە جولاۋشىلار اۆتوبۋسىندا وزبەكستاننىڭ 55 ازاماتى مەن ەكى جۇرگىزۋشى – قازاقستان ازاماتتارى بولعان, ولاردىڭ ءبىرى كوز جۇمدى, ەكىنشىسى پوكروۆ قالاسىنداعى ۋاقىتشا ورنالاستىرۋ پۋنكتىندە», - دەپ جازعان ەدى قر ءىىم رەسمي وكىلى ءانۋار جايناقوۆ Facebook-تەگى پاراقشاسىندا.
