ادەتتەگىدەي, «نۇرلى تاۋ» بيزنەس ورتالىعىنان باستالعان 9 شاقىرىمدىق قاشىقتىقتى قۇرايتىن ۆەلوشەرۋ تۇڭعىش پرەزيدەنت ساياباعىندا اياقتالدى. مارەدە قاتىسۋشىلاردىڭ اراسىندا باعالى سىيلىقتار مەن ۆەلوسيپەد ويناتىلدى. باستى سىيدىڭ يەگەرى شاكارىم اۋباكىروۆ اتاندى.
ء«بىرىنشى رەت قاتىسىپ, ۆەلوسيپەد ۇتقانىما سەنە الار ەمەسپىن. ءوزىم ۆەلوسپورتپەن شۇعىلدانامىن. مەندە بىرنەشە ۆەلوسيپەد بار, سوندىقتان سىيلىعىمدى ءوز باپكەرىمە تابىستايمىن», - دەدى جەڭىمپاز شاكارىم اۋباكىروۆ. ۇيىمداستىرۋشىلار سپورت ارداگەرلەرىنە قۇرمەت كورسەتىپ, سىيلىقتار تابىستادى.
مەرەكەلىك ۆەلوشەرۋگە نازارباەۆ ينتەللەكتۋالدى مەكتەبىنىڭ وقۋشىلارى دا قاتىستى.
ء«بىز وقۋشىلارىمىزدى سالاۋاتتى ءومىر سالتىنا, سپورتقا باۋلۋعا تىرىسامىز. ەكو فەستيۆالگە وسى سەبەپتى قاتىستىق. جالپى, قالا تۇرعىندارىنىڭ ەكولوگيالىق كولىك ءتۇرىن قولدانعانىن قولدايمىز. بۇل فەستيۆال قالا اكىمدىگىنىڭ جانە بىرىككەن ۇلتتار ۇيىمىنىڭ (بۇۇ) قولداۋىمەن وتەدى. بۇۇ مەكتەپتەرىمىزگە جيىرما سپورتتىق ۆەلوسيپەد بەردى. ۆەلوشەرۋگە ءبىرىنشى رەت قاتىسىپ وتىرمىز. ەندى, بالالارىمىز اپتا سايىن ۆەلوسپورتپەن اينالىسادى دەگەن ويدامىن», - دەدى زياتكەرلىك مەكتەبىنىڭ حيميا-بيلوگيا باعىتىنىڭ ديرەكتورى گۇلميرا باقىتبەكقىزى.
ايتا كەتەر جايت, وسى ۆەلوشەرۋ «سپورتتىق الماتى» قالالىق باعدارلاماسىنىڭ قولداۋىمەن 2017-ءشى جىلى جوسپارلانعان 21 ۆەلوشەرۋدىڭ ون توعىزىنشىسى. اتالمىش باعدارلاما مەگاپوليستەگى بۇقارالىق سپورتتى دامىتۋ ماقساتىندا جۇزەگە اسىرىلۋدا.
