قازىر ايماقتاعى 791 مەكتەپكە دەيىنگى مەكەمەدە 53 مىڭداي بالعىن تاربيە الادى. سالاعا قۇيىلعان جەكە ينۆەستيتسيا 70,8% قۇراپ وتىر. ءتيىمدى ارىپتەستىك تەتىگىن قولدانۋ ارقاسىندا «بالاپان» باعدارلاماسى مەرزىمىنەن بۇرىن ورىندالدى. ەندى الدا 3 جاسقا دەيىنگى بۇلدىرشىندەر مەن وڭىردەگى مۇمكىندىگى شەكتەۋلى مىڭ جارىمداي بالعىندى بوبەكجايمەن قامتۋ مىندەتى تۇر. مۇگەدەكتىگى بار بالالاردىڭ تەك 24%-ى عانا ينكليۋزيۆتى بالاباقشالارعا تارتىلعان. بۇل ماسەلە 2020 جىلعا قاراي تولىعىمەن شەشىلەدى دەپ جوسپارلانىپ وتىر.
- ءبىزدىڭ الداعى مىندەتىمىز جەكەمەنشىك بالاباقشالاردىڭ ۇلەسىن ارتتىرا وتىرىپ, ءبىر جانە ءۇش جاس ارالىعىنداعى بالالاردى بوبەكجايلارمەن قامتۋ جانە دامۋى شەكتەۋلى بالالاردى مەكتەپكە دەيىنگى ءبىلىم بەرۋ ۇيىمدارىندا ينكليۋزيۆتى ءبىلىم بەرۋدى قامتۋدى ماقسات ەتىپ قويدىق. قازىر 320 ورىندىق, 280 ورىندىق 3 جەكەمەنشىك بالاباقشانىڭ قۇرىلىسى جۇرگىزىلۋدە. سونىمەن قاتار, مەملەكەتتىك بالاباقشالار جەلىسى دە داميدى, - دەدى وبلىستىق ءبىلىم باسقارماسىنىڭ باسشىسى باقىتجان سايلىباەۆ.
