كاسىپقوي بوكسقا اۋىسۋداعى باستى ماقساتى تۋرالى
«جالپى مەنىڭ جۇدىرىقتاسۋ مانەرىم اۋەسقوي بوكسقا قاراعاندا, كاسىپقوي بوكسقا جاقسى كەلەدى» , دەپ اڭگىمەسىن باستادى وتانداسىمىز. جانىما دا اۋەسقوي بوكستان گورى كاسىپقوي بوكس جاقىنىراق. ەندى كاسىپقوي بوكستا باعىمدى سىناپ, ەلىمىزدىڭ اتاق-داڭقى مەن ابىرويىن اسقاقتاتۋدى كوزدەيمىن. بۇل شەشىمدى اياق-استىنان قابىلداعان جوقپىن. قازاق ايتادى عوي: جەتى رەت ويلاپ, ءبىر رەت كەس دەپ, سول سەبەپتى بۇل شەشىم مەن ءۇشىن دۇرىس دەپ ويلايمىن. قازاقستان تاريحىنداعى كاسىپقوي بوكستان ەڭ جاس الەم چەمپيونى اتانۋدى جانە WBC, WBO, WBA جانە IBF تۇجىرىمدارىنىڭ بەلبەۋىن ۇتۋدى كوزدەيمىن. اللا قالاسا, بۇل بەلەستەردىڭ ءبارىن باعىندىراتىنىما سەنەمىن», دەيدى سادريددين.
جاستار اراسىندا الەم چەمپيونى
«كاسىپقوي بوكسقا اۋىسۋداعى باستى سەبەپتەرىمنىڭ ءبىرى دە وسى. سونداي-اق 69 كەلى سالماق دارەجەسىندەگى الەمنىڭ ەڭ ۇزدىك بوكسشىلارى قازاقستاندا ەكەنى بارىنە بەلگىلى. قازاق باۋىرلارىممەن شارشى الاڭدا جان تالاسىپ جۇدىرىقتاسقانشا, كاسىپقوي بوكستاعى تاجىريبەمدى جەتىلدىرىپ, بەلبەۋلەرگە تالاسۋعا ءبىر قادام بولسا دا جاقىنداي بەرەيىن دەپ شەشتىم», دەدى ول.
پروموۋتەرلىك كومپانيالاردىڭ ۇسىنىسى جايلى
«قازىر امەريكالىق The Heavyweight Factory كومپانياسىمەن كەلىسىمشارت ءجۇرىپ جاتىر. ازىرگە قول قويعان جوقپىن. ەكى جاقتى ماسەلەلەردى تولىق شەشكەن كەلىسىمگە قول قويىپ, جاتتىعۋىمىزدى بىردەن باستاپ كەتەمىز. 4 جىلعا سوزىلعان كەلىسىمشارت بويىنشا وسى ۋاقىت ارالىعىندا مەندە WBC, WBO, WBA جانە IBF تۇجىرىمدارىنىڭ چەمپيوندىق اتاعىنا تالاسۋىنا مۇمكىندىگىم بار. اللا قالاسا, وسى جىلدىڭ اياعىنا دەيىن العاشقى جەكپە-جەگىمدى دە وتكىزىپ قالۋىم مۇمكىن» دەيدى سادريددين احمەدوۆ. سونداي-اق وتاناسىمىز مەنەدجەرى لۋيس ورتيس سىندى الەمگە تانىمال بىلعارى قولعاپ شەبەرلەرىمەن بىرگە جۇمىس ىستەگەن, تانىمال پروموۋتەر ريككارو ريتستسو ەكەنىن دە اتاپ ءوتتى.
ەڭ ۇزدىك جاس بوكسشى
ايتا كەتەيىك, سادريددين احمەدوۆ 69 كەلىدە ەل نامىسىن قورعايتىن قازاقستانداعى ۇزدىك بىلعارى قولعاپ شەبەرلەرىنىڭ ءبىرى. وتانداسىمىز 2016 جىلى جاستار اراسىندا وتكەن الەم چەمپيوناتىندا ءۇش قارسىلاسىن نوكاۋتپەن ۇتىپ, ەل قورجىنىنا جالعىز التىن جۇلدەنى سالعان بولاتىن. احمەدوۆ شارشى الاڭدا 251 جەكپە-جەك وتكىزىپ, 241 رەت قارسىلاسىنان باسىم بولعان. سونداي-اق سادريددين بوكستان شىمكەنتتە وتەتىن ەل چەمپيوناتىنىڭ 69 كەلىدەگى باستى فاۆوريتتەرىنىڭ ءبىرى سانالعان ەدى.
