ءوڭىر باسشىسى ە. توعجانوۆتىڭ قاتىسۋىمەن باسقۇدىق اۋىلىندا «مۇحامبەت» مەديتسينالىق ورتالىعى اشىلدى. نىسان جەكە كاسىپكەردىڭ قارجىسىنا سالىنعان. جوبا قۇنى 130 ملن. تەڭگە. ورتالىق 21 ادامدى تۇراقتى جۇمىسپەن قامتىپ وتىر, دەپ حابارلادى ماڭعىستاۋ وبلىسى اكىمىنىڭ ءباسپاسوز قىزمەتى egemen.kz تىلشىسىنە.
سونىمەن قاتار ماڭعىستاۋ اۋىلىندا اۋماعى 1 گەكتار بولاتىن ۇن-جارما كومبيناتى ىسكە قوسىلدى. جوبا قۇنى 315 ملن. تەڭگە. مۇندا 30 ادامعا جاڭا جۇمىس ورنى اشىلدى.
مۇنايلى اۋدانىنىڭ بالالارى ءۇشىن 100 ورىندىق «مۇراگەر» بالاباقشاسى پايدالانۋعا بەرىلدى. مەكتەپكە دەيىنگى مەكەمەنى سالۋعا جەكە كاسىپكەر 65 ملن. تەڭگە جۇمساعان. جاڭا نىسان 20 ادامدى جۇمىسپەن قامتيدى.
مەرەكەگە وراي اشىلعان كەلەسى نىسان - «ماڭگىلىك ەل» مونۋمەنتى. ماڭعىستاۋ اۋىلىنىڭ ورتالىعىنداعى مونۋمەنت جاس ۇرپاقتى ەلىن قۇرمەتتەۋگە, وتكەنىن قادىرلەۋگە, وتانسۇيگىشتىككە تاربيەلەيدى.
سونداي-اق, اۋدان جاستارىنىڭ بوس ۋاقىتىن ءتيىمدى پايدالانىپ, بۇقارالىق سپورتتى دامىتۋ ماقساتىندا سپورت الاڭى پايدالانۋعا بەرىلدى.
نىسانداردىڭ اشىلۋىنان سوڭ اۋداننىڭ 10 جىلدىعىنا وراي سالتاناتتى جيىن ءوتتى. مۇندا مۇنايلى اۋدانىنىڭ جەتكەن جەتىستىكتەرى سارالانىپ, بولاشاق جوسپارى ايقىندالدى. شارا بارىسىندا اۋداننىڭ الەۋمەتتىك-ەكونوميكالىق دامۋىنا قوسقان ەلەۋلى ۇلەستەرى ءۇشىن بىرقاتار ازاماتتار ماڭعىستاۋ وبلىسى اكىمدىگىنىڭ العىسىمەن ماراپاتتالدى.
مۇنايلى اۋدانى - ەلىمىز تاۋەلسىزدىك العاننان كەيىن قۇرىلعان العاشقى اۋدان. 2007 جىلى ەلباسىنىڭ جارلىعىمەن اشىلدى. 10 جىل بۇرىن مۇندا حالىق سانى 53 مىڭ بولسا, بۇگىندە 148 مىڭ ادامعا جەتىپ وتىر. قازىرگى تاڭدا مۇندا ونداعان مەكتەپتەر مەن بالاباقشالار جانە مەديتسينالىق ورتالىقتار سالىندى. اۋىل شارۋاشىلىعى مەن كاسىپكەرلىك سالاسى دا قارقىندى دامۋ ۇستىندە. حالىق سانى مەن ەكونوميكالىق الەۋەتى جاعىنان مۇنايلى اۋدانى وبلىس بويىنشا الدىڭعى قاتاردا.
- رۋحاني جاڭعىرۋدى باستى قاعيداسىنا اينالدىرعان اۋدان تۇرعىندارى مەن رۋحتى ءورىمتال جاستارىمىز اۋداننىڭ كوركەيۋىنە, ەلىمىزدىڭ وركەندەپ, ورلەي تۇسۋىنە زور ۇلەسىن قوسىپ كەلەدى. الداعى ۋاقىتتا حالىق يگىلىگىنە اينالاتىن, كورەرگە كوز سۇيىنەتىن اۋقىمدى جوبالار اۋدان كولەمىندە جۇزەگە اسا بەرەدى. جاستارىمىز بەن بولاشاق ۇرپاقتارىمىز وسى ونەگەلى ىستەرىمىزدى جالعاستىرادى دەپ سەنەمىن. مۇنايلى اۋدانىنىڭ 10-جىلدىق مەرەكەسى قۇتتى بولسىن, - دەدى ەرالى توعجانوۆ ءوزىنىڭ قۇتتىقتاۋ سوزىندە, دەلىنگەن حابارلامادا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
