وتىرىستى ورتالىق سايلاۋ كوميسسياسىنىڭ (وسك) توراعاسى بەرىك يماشەۆ اشىپ, جۇرگىزىپ وتىردى. وسك توراعاسى ءماسليحات دەپۋتاتتارىندا وزدەرىنىڭ وكىلەتتىگىن مەرزىمىنەن بۇرىن توقتاتۋ ديناميكاسىنىڭ ءوسۋى كورىنىس بەرگەنىن ايتتى. بۇل ماسەلەگە ساياسي پارتيالار نازار اۋدارعانىن قالايمىز, ويتكەنى مۇنداي ءۇردىس دەپۋتاتتىق كورپۋسقا دەگەن سەنىمدى تومەندەتىپ, كانديداتتاردىڭ سايلاۋشىلارعا بەرگەن ۋادەلەرىنىڭ ورىندالماۋىنا سوقتىرادى, دەدى ول.
ءبىرىنشى ماسەلە بويىنشا باياندامانى وسك قىزمەتىن قامتاماسىز ەتۋ ءبولىمىنىڭ مەڭگەرۋشىسى ماقساتقان اناپين جاسادى. ونىڭ ايتۋىنا قاراعاندا, 29 قازاندا ەلىمىزدىڭ 15 ايماعىنداعى 105 سايلاۋ وكرۋگىندە شىعىپ قالعان دەپۋتاتتاردىڭ ورنىنا جاڭا كانديداتتاردى سايلاۋ بولادى ەكەن. تەك استانا قالالىق ءماسليحاتىندا عانا شىعىپ قالعاندار بولماعاندىقتان سايلاۋ بولمايدى. سونىڭ ىشىندە 22 وبلىستىق, 19 قالالىق جانە 64 اۋداندىق ماسليحاتتارعا جاڭا دەپۋتاتتار سايلاناتىن بولادى. جاڭا سايلاۋدا اقتوبە وبلىسىندا – 14, پاۆلودار وبلىسىندا – 13, قوستاناي وبلىسىندا – 12, الماتى وبلىسىندا – 11 ۇمىتكەر داۋىسقا تۇسەتىن بولادى. بۇلار – كانديداتتار بارىنشا كوپ تۇسەتىن ايماقتار, ال جامبىل جانە اقمولا وبلىستىق ءماسليحاتتارىنا سايلاناتىندار 2-3-تەن عانا.
سايلاۋ ناۋقانىنىڭ بارىسىندا 370 ۇمىتكەر ۇسىنىلىپ, سونىڭ ىشىندە 93 ۇمىتكەر وبلىستىق ماسليحاتقا, قالالىق ماسليحاتتارعا 72 جانە اۋداندىق ماسليحاتتارعا 205 كانديدات تىركەلگەن. تىركەلگەندەردىڭ 251-ءى, ياعني 74,9 پايىزى ەرلەر, 84-ءى, ياعني 25,1 پايىزى ايەلدەر. ۇمىتكەرلەردىڭ ورتاشا جاسى 45-تە بولعان. تىركەلگەن ۇمىتكەرلەردىڭ 85,4 پايىزىنىڭ جوعارى ءبىلىمى بار. سونىڭ ىشىندە 98 ادام مۇعالىم, 61 ينجەنەر-تەحنيكالىق قىزمەتكەرلەر, 37-ءسى زاڭگەرلەر جانە ت.ب.
بايانداماشىنىڭ ايتۋىنا قاراعاندا, ءماسليحات دەپۋتاتتارىنىڭ ءوز وكىلەتتىكتەرىن دوعارۋىنىڭ نەگىزگى سەبەبى تۇرعىن مەكەنىن اۋىستىرۋدا ەكەن. الايدا كەيبىر وبلىستاردا وسىنداي ۇردىستەردىڭ تىم جيىلەپ كەتكەندىگى الاڭداتادى. ماسەلەن, بۇل جاعداي پاۆلودار وبلىسىندا باسقا ايماقتارمەن سالىستىرعاندا وتكىرىرەك. سوندىقتان اۋماقتىق سايلاۋ كوميسسيالارى ۇسىنىلعان ۇمىتكەرلەردىڭ جاقىن ۋاقىتتاردا تۇراتىن مەكەنىن اۋىستىرىپ, كوشىپ كەتپەيتىندىگىنە دە نازار اۋدارۋى كەرەك دەگەن ويلار ايتىلدى.
سونىمەن قاتار وتىرىستا ءماسليحات دەپۋتاتتارىنىڭ كۋالىگىنە ەنگىزىلگەن وزگەرىستەر بەكىتىلدى.
جاقسىباي سامرات,
«ەگەمەن قازاقستان»
