رۋمىنيانىڭ پلوەشتي قالاسىنداعى يليە وانە اتىنداعى ستاديونىندا وتكەن كەزدەسۋدە جەرلەستەرىمىز قارسىلاستارىنا 1:3 ەسەبىمەن ەسە جىبەردى. ماتچتىڭ العاشقى 15 مينۋتى تەڭ دارەجەدە ءوتتى. وسى ۋاقىت ارالىعىندا قازاقستاندىق فۋتبولشىلار ءبىر-ەكى رەت رۋمىنيا قۇراماسىنىڭ قاقپاشىسى چيپريان تەتەرۋشانۋدىڭ سەرگەكتىگىن تەكسەرىپ كورگەن بولاتىن. ارادان ەكى مينۋت وتكەندە رۋمىن فۋتبولشىلارى ءبىزدىڭ قاقپامىزدىڭ كىلتىن ىزدەپ كوردى. ويىننىڭ 33-مينۋتىندا كونستانتين بۋدەسكۋ ابزال بەيسەبەكوۆتى قاپى قالدىرىپ, قاقپامىزعا گول سوعىپ كەتتى. ال 38-مينۋتتا بۋدەسكۋ رۋمىنيا قۇراماسىنىڭ ەكىنشى گولىن سالدى. ءسويتىپ, ءبىرىنشى تايم سوڭىنا دەيىن ەسەپ وزگەرگەن جوق.
رۋمىنيا مەن قازاقستان تەكەتىرەسىنىڭ ەكىنشى تايمىن باس جاتتىقتىرۋشىمىز الەكساندر بوروديۋك ويىنشى الماستىرۋمەن باستادى. جالپى ەكىنشى تايمدا ويىنعا جاڭادان قوسىلعان فۋتبولشىلار وينادى دەسەك قاتەلەسپەيتىن شىعارمىز. شابۋىلشى ازات نۇرعاليەۆتىڭ ورنىنا سەرگەي حيجنيچەنكو شىقسا, رومان مۇرتازاەۆتى الەكسەي ششەتكينمەن الماستىردى. ويىنعا جاڭادان قوسىلعان فۋتبولشىلارىمىز قۇرامامىزدىڭ ويىنىن جانداندىرا تۇسكەنىن اتاپ وتكەنىمىز ءجون. دەگەنمەن, 73-مينۋتتا ويىنعا ەكىنشى تايمدا قوسىلعان كلاۋديۋ كەشەريۋ ەسەپتى 3:0-گە جەتكىزدى. ارادان 10 مينۋت وتكەندە ويىننىڭ ەكىنشى بولىگىندە الاڭعا ءبىزدىڭ قۇراما ساپىنان شىققان باۋىرجان تۇرىسبەك رۋمىنياعا سوققان جالعىز گولىمىزدىڭ اۆتورى اتاندى.
ەسكە سالا كەتەيىك, قازاقستان قۇراماسى كەلەسى كەزدەسۋىن 8 قازان كۇنى ەلورداداعى "استانا ارەنا" ستاديونىندا وتكىزەدى.
ءالي بيتورە,
«ەگەمەن قازاقستان» –
بۋحارەستتەن
سۋرەت اۆتورى – ءىلياس وماروۆ
