بۇل بەدەلدى ءارى ىقپالدى فورۋم 2008 جىلدان بەرى وتكىزىلىپ كەلەدى. اتالمىش فورۋم يننوۆاتسيالاردى دامىتۋ مەن العا جىلجىتۋ, ءوزارا تاجىريبە جانە عىلىمي جەتىستىكتەرمەن الماسۋ, سونداي-اق جاھاندىق ەكونوميكانىڭ وزەكتى ماسەلەلەرىن شەشۋ جولدارىن ىزدەستىرۋ سالالارىندا ەلدەر اراسىنداعى ىنتىماقتاستىق پەن ارىپتەستىكتى كەڭەيتۋگە باعىتتالعان.
قازۇۋ رەكتورىنىڭ «بىرلەسكەن عىلىمي ءبىلىم بەرۋ جوبالارى – ء«بىر بەلدەۋ – ءبىر جول»» باستاماسىن دامىتۋدىڭ نەگىزى» اتتى بايانداماسى فورۋمعا قاتىسۋشىلاردىڭ ۇلكەن قىزىعۋشىلىعىن تۋدىردى. ع.مۇتانوۆ مەملەكەت باسشىسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا العا قويىلعان مىندەتتەردى جۇزەگە اسىرۋعا نەگىزدەلگەن ۋنيۆەرسيتەتتىڭ جەتىستىكتەرى, حالىقارالىق ىنتىماقتاستىعى جانە جوبالارى تۋرالى ايتىپ ءوتتى.
قازاقستاننىڭ جەتەكشى ۋنيۆەرسيتەتىنىڭ باسشىسى عىلىمي-يننوۆاتسيالىق جوبالاردى بىرلەسىپ جۇزەگە اسىرۋ جانە IT-تەحنولوگيالار سالاسىنداعى سەرىكتەستىك جاڭا جىبەك جولىن دامىتۋدا دا ماڭىزدى ءرول اتقاراتىنىن اتاپ ءوتتى. قازۇۋ جاڭا جىبەك جولى ۋنيۆەرسيتەتتەرى اليانسىنىڭ ۇيلەستىرۋ كوميتەتىنىڭ مۇشەسى رەتىندە عالامدىق حالىقارالىق باستامالار اياسىندا ءبىلىم, عىلىم جانە يننوۆاتسيا سالاسىنداعى ىنتىماقتاستىقتى تەرەڭدەتۋدى كوزدەگەن جوبالارعا قاتىسۋدا.
«قازۇۋ ەلباسى نۇرسۇلتان نازارباەۆتىڭ يدەياسىن ىسكە اسىرا وتىرىپ, جاڭا جىبەك جولى ۋنيۆەرسيتەتتەرى اليانسىنىڭ حالىقارالىق IT-تەحنوپاركىن قۇرۋ باستاماسىن ۇسىندى. «Silicon Valley» مودەلى نەگىزىندە جاسالاتىن تەحنوپارك الەمنىڭ تۇكپىر-تۇكپىرىنەن كاسىپكەرلەر مەن ينۆەستورلاردى تارتاتىن بىرەگەي الاڭعا اينالىپ, IT-تەحنولوگيالاردى دامىتۋدا بىردەن-ءبىر درايۆەر رەتىندە قىزمەت ەتەتىن بولادى. ونىڭ نەگىزىن قحر ۇكىمەتى گرانتى بويىنشا بەرىلەتىن سۋپەركومپيۋتەر قۇرايدى. بۇگىننىڭ وزىندە اتالمىش مەملەكەتارالىق جوبا شەڭبەرىندە قازۇۋ-دە سۋپەركومپيۋتەرلىك جانە بۇلتتى ەسەپتەۋلەر ورتالىعىن اشۋ جۇمىستارى جۇرگىزىلۋدە», دەدى عالىم مۇتانوۆ فورۋمدا سويلەگەن سوزىندە.
رەكتوردىڭ ايتۋىنشا, قازىرگى ۋاقىتتا قحر عىلىم اكادەمياسىنىڭ قاشىقتىقتان زوندتاۋ جانە تسيفرلى جەر ينستيتۋتىمەن (RADI) بىرگە قازۇۋ-دە عىلىمي-زەرتتەۋ ورتالىعى قۇرىلۋدا. قازاقستاندىق عالىمدار ناقتى ۋاقىتتاعى زوندتاۋ دەرەكتەرىن قاجعاردا (قحر) ورنالاسقان قابىلداۋ ستانساسىنان الاتىن بولادى. بۇل قورشاعان ورتانىڭ جاي-كۇيى, تابيعي رەسۋرستارى, اۋىل شارۋاشىلىعى, توتەنشە جاعدايلارىنا جىلدام مونيتورينگ جاساۋعا جانە باقىلاۋعا مۇمكىندىك بەرەدى, سونداي-اق «عارىشتىق تەحنيكا جانە تەحنولوگيالار» ماماندىعى بويىنشا ءبىلىم الاتىن ستۋدەنتتەرگە تاجىريبەدەن ءوتۋ ءۇشىن بازا بولادى. سونىمەن بىرگە جاقىن ارادا قازۇۋ وسى جوبامەن بىرىكتىرىلەتىن نانوسپۋتنيكتى وربيتاعا شىعارۋدى جوسپارلاپ وتىر.
فورۋم الاڭىندا قازۇۋ رەكتورى قىتايدىڭ بىرقاتار جەتەكشى ۋنيۆەرسيتەتتەرى مەن عىلىمي جانە ءبىلىم بەرۋ ورتالىقتارىنىڭ وكىلدەرىمەن ىنتىماقتاستىق ماسەلەلەرى جانە بىرلەسكەن جوبالاردى جۇزەگە اسىرۋ بويىنشا كەزدەسۋلەر وتكىزدى.
«ەگەمەن-اقپارات»
