اكادەميا باسشىسى دارحان قىدىرالىنىڭ توراعالىعىمەن وتكەن جيىندا «ورتاق تۇركى تاريحى» ماقۇلداندى. ارنايى جۇمىس توبىنا كىرگەن ماماندار اكادەميادا 3 كۇن بويى وقۋلىقتىڭ جوباسىن جان-جاقتى تالقىلاپ, قاجەتتى تۇزەتۋلەر ەنگىزىپ, مازمۇنىن تولىقتىردى. ساراپشىلار تۇركى تىلدەس مەملەكەتتەردىڭ ءبىلىم مينيسترلەرىنىڭ IV جيىنىندا قابىلدانعان شەشىمدەردى نەگىزگە الدى.
وتىرىستا دارحان قىدىرالى تۇركى حالىقتارىنا جاڭا تاريح كىتابىن جاساۋعا ات سالىسقان ساراپشىلارعا العىسىن ءبىلدىردى.
«بۇگىنگى وتىرىستا ىرگەلى ماسەلەنى ورىندادىق. ءۇش كۇندىك جۇمىس بارىسىندا اكادەمياعا مۇشە ەلدەردەن كەلگەن وكىلدەر كىتاپتىڭ ءاربىر ءسوزىن تالقىلاپ, ورتاق كىتاپ جاساپ شىقتى», ‒ دەدى اكادەميا پرەزيدەنتى د.قىدىرالى.
ەجەلگى تۇركى حالىقتارىنىڭ XV عاسىرعا دەيىنگى تاريحىن قامتىعان وقۋلىق 7 بولىمنەن تۇرادى. وندا ءتۇبى ءبىر تۇركى حالىقتارىنىڭ ەگجەي-تەگجەيلى تاريحى قامتىلعان. جاڭا تاريح كىتابى 8-سىنىپ وقۋشىلارىنا وقىتىلماق. وقۋلىقتىڭ جوباسى 2018 جىلى قىرعىزستاندا وتەتىن تۇركى كەڭەسى مەملەكەتتەرى باسشىلارىنىڭ VI سامميتىندە ۇسىنىلادى.
ايتا كەتۋ كەرەك, تالقىلاۋعا تۇركى كەڭەسىنە مۇشە مەملەكەتتەر – ازەربايجان, قازاقستان, قىرعىزستان مەن تۇركيانىڭ ءبىلىم جانە عىلىم مينيسترلىكتەرىنىڭ وكىلدەرى, تۇركى كەڭەسى مەن حالىقارالىق تۇركى اكادەمياسىنىڭ ساراپشىلارى, سونداي-اق تاريحشى عالىمدار قاتىستى.
جۇمىس توبى تالقىلاۋدىڭ قورىتىندىسى بويىنشا ارنايى حاتتاما قابىلدادى. جيىنعا قاتىسۋشىلار تۇركى اكادەمياسىنىڭ جۇمىسىن جوعارى باعالادى.
