مەملەكەت باسشىسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا 2025 جىلدان باستاپ لاتىن الىپبيىنە كوشۋگە كىرىسۋىمىز كەرەكتىگىن جانە بولاشاقتا بارلىق سالاداعى ءىس-قاعازدار مەن وقۋلىقتار دا وسى قارىپپەن جازىلۋى ءتيىس ەكەنىن قاداپ ايتتى.
پرەزيدەنتىمىز لاتىن الىپبيىنە كوشۋدىڭ ناقتى جولدارىن ايتىپ, وسى ماسەلە زيالى قاۋىم اراسىندا كەڭىنەن تالقىلانۋى قاجەت ەكەنىن العا تارتتى. سوندىقتان كۇن تارتىبىندە وتكىر تۇرعان, بۇگىندە قوعامدا قىزۋ تالقىلانىپ جاتقان لاتىن الىپبيىنە كوشۋ ماسەلەسىنە بايلانىستى وي قوزعاۋ ءۇشىن عالىمداردى, كوپتى كورگەن كوزى اشىق, كوكىرەگى وياۋ ازاماتتاردىڭ قاتىسۋىمەن حالىقارالىق «جاناشىر» قورى كەشەندى شارالاردى جۇزەگە اسىرىپ كەلەدى.
ءدىن ىستەرى جانە ازاماتتىق قوعام مينيسترلىگىنىڭ قولداۋىمەن «ازاماتتىق باستامالاردى قولداۋ ورتالىعى» كوممەرتسيالىق ەمەس اكتسيونەرلىك قوعامىنىڭ گرانتتىق باعدارلاماسىنىڭ اياسىندا «حالىقتىڭ ۇلتتىق-مادەني بىرلىگىن ساقتاۋداعى زيالىلاردىڭ ءرولى» تاقىرىبىنداعى جوبا اياسىندا ءوتىپ جاتقان دوڭگەلەك ۇستەلدەر مەن كونفەرەنتسيالاردا, كوللەدجدەر مەن مەكتەپتەردەگى كەزدەسۋلەردە حالىقتىڭ لاتىن قارپىنە كوشۋ جونىندەگى پىكىرلەرىن بىلۋدەمىز.
شارالاردىڭ قاتىسۋشىلارىنا ارنالعان ساۋالنامالاردا دا وسى تاقىرىپتارداعى پىكىرلەرىن ءبىلدىرۋ سۇرالعان. وتكىزىلگەن شارالاردىڭ ناتيجەسى كورسەتكەندەي, قاتىسۋشىلاردىڭ 80-90 پايىزى لاتىن ارپىنە كوشۋدى قولدايتىندىقتارىن بىلدىرۋدە.
بۇگىنگى تاڭدا كيريلليتسا جازۋىن الەمنىڭ 12 مەملەكەتى عانا پايدالانادى ەكەن. ال قالعان مەملەكەتتەردىڭ كوبى لاتىن ءالىپبيىن قولدانادى. دەمەك, بۇل كەڭ تارالعان جازۋ. بۇگىندە الەمنىڭ ءار تۇكپىرىندە 5 ميلليونعا جۋىق قازاق تۇرادى. ونىڭ 80 پايىزى لاتىن ءالىپبيىن قولدانادى. ياعني, ءبىز بولاشاقتا لاتىن الىپبيىنە كوشسەك, سول قازاقتارمەن جاقىنداسا تۇسەمىز. بۇل – سىرتتاعى اعايىننىڭ كوپتەن كۇتكەن ارمانى.
ءبىز, قازاقستاندىقتار كوپشىلىك بولىپ لاتىن الىپبيىنە كوشۋگە ءازىر ەكەنىمىزدى كورسەتىپ, وسىنداي ماڭىزدى قادامعا بارۋعا اۋىزبىرشىلىك تانىتقانىمىز ءجون دەپ بىلەمىز.
جاڭىل اپەتوۆا,
حالىقارالىق «جاناشىر» قورىنىڭ پرەزيدەنتى
