قازىرگى كۇنى تسيفرلاندىرۋ ماسەلەسى دەنساۋلىق ساقتاۋ سالاسىندا دا وتە وزەكتى ەكەنى ءمالىم. وسىعان وراي دەنساۋلىق ساقتاۋ ءمينيسترى ەلجان ءبىرتانوۆ بۇگىنگى تاڭدا ەلىمىزدىڭ دەنساۋلىق ساقتاۋ جەلىسىن 6 030 نىسان قۇرايتىنىن, سونىمەن قاتار قالالار مەن اۋدان ورتالىقتارى دەڭگەيىندە ينتەرنەتكە 100 پايىز قوسىلعانىن, دەگەنمەن شالعايدا ورنالاسقان ەلدى مەكەندەردە ينتەرنەتكە قولجەتىمدىلىككە قاتىستى ءالى دە شەشىلمەگەن ماسەلەلەر بار ەكەنىن مالىمدەدى. قازاقستاندا 166 اۋداندىق جانە اۋىلدىق اۋرۋحانا مەن ەمحانا بار, ولاردىڭ 85 پايىزى جەلىگە قوسىلعان, ال 50-دەن 800-گە دەيىنگى ادام تۇراتىن ەلدى مەكەندەردە مەدپۋنكتەردىڭ ينتەرنەت جەلىسىنە قوسىلۋى 4 پايىزدى قۇرايدى.
وسىلايشا, دەنساۋلىق ساقتاۋ جۇيەسىندە جەلىگە قوسىلماعان نىساندار سانى 3 715-ءتى قۇرايدى. سونداي-اق ۇسىنىلعان جوبا اياسىندا كەڭ جولاقتى ينتەرنەتكە 1 700 نىساندى قوسۋ جوسپاردا بار. وسىعان وراي قالعان نىسانداردى قوسۋ ءۇشىن بايلانىستىڭ وزگە تاسىلدەرىن, سونىڭ ىشىندە تەلەفون وپەراتورلارى قىزمەتتەرىن قاراستىرۋ كوزدەلگەن.
بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا اۋىلدىق ەلدى مەكەندەردى كەڭ جولاقتى ينتەرنەت جەلىسىنە قوسۋدى قامتاماسىز ەتۋ جوباسى قارالعان بولاتىن.
دينارا بىتىك,
«ەگەمەن قازاقستان»
