ورتالىق ساياباقتا قالا اكىمى ەرماك ءسالىموۆ زاۋىتتار مەن كاسىپورىنداردا جۇمىس ىستەيتىن ەڭبەكقور وتباسىلارعا سىي-سىياپات تاپسىردى. ماسەلەن, نۇراحمەتوۆتەر وتباسى «سەمەي ينجينيرينگ» اق-ىندا 52 جىل بويى جۇمىس ىستەيدىم ەكەن. ءتىپتى ولاردىڭ نەمەرەلەرى وسى كاسىپتى اتادان بالاعا مۇرا ەتىپ العان. ال ورىس ۇلتىنىڭ وكىلدەرى, سلۋحاي وتباسى «قازپوليگراف» جشس-ىندە جۇمىس ىستەگەندىكتەرىنە 97 جىل بولىپتى. وسىلايشا قالاداعى ورتالىق ساياباقتا قالا كۇنىن اتاپ ءوتۋ شاراسى كۇن سۋىقتىعىنا قاراماستان قىزىپ جاتتى. بىراق تا, وسىندا اشىق كينوتەاتر اشىلادى دەپ كۇتىلگەنمەن بۇل اۋا-رايىنىڭ قولايسىزدىعىنا وراي ءبىراز كەيىنگە شەگەرىلدى. ويتكەنى قار جاۋىپ كەتتى. ال قالالىق مادەنيەت ۇيىندە الاشتىڭ 100 جىلدىعىنا ارنالعان «الامان ايتىس» ءوتتى. قالالىق «اربات» كوشەسىندە سۋرەتشىلەر مەن مۇسىنشىلەر قالا كوشەلەرىن بەينەلەگەن جەكە تۋىندىلارىن حالىق نازارىنا ۇسىندى.
ارباتقا جالعاس قالانىڭ 72 كۆارتال اۋدانى وڭ جاعالاۋدىڭ ورتالىق بولىگىنە جاتادى. مۇنداعى «رەۆوليۋتسيونەرلەر الاڭىندا» قالاداعى ايتۋلى №3 مەكتەپتىڭ ۇجىمى كورمە ۇيىمداستىرىپ, قالا تۇرعىندارىن قولونەر تۋىندىلارىمەن ەرەكشە ءتانتى ەتتى.
-ءبىزدىڭ مەكتەپ ورنالاسقان 72 كۆارتال اۋماعى ۇنەمى جاڭالىقتاردىڭ جارشىسى, نەبىر قىزىقتى شارالاردىڭ ورداسى دەۋگە بولادى,-دەدى مەكتەپ ديرەكتورىنىڭ تاربيە ءىسى جونىندەگى ورىنباسارى ءاليا مەيرامعاليقىزى,-ءبىزدىڭ جانىمىزدان مىنە, ءاليحان بوكەيحانوۆتىڭ ەسكەرتكىشى اشىلدى. الاشوردا ۇكىمەتىنىڭ 100 جىلدىعىن اتاپ وتۋدەمىز. سوعان وراي, مەكتەپ ۇجىمى ءبىر اۋىزدان باسشىمىز نۇرجان احمەتقاليەۆتىڭ باستاماسىمەن سەمەي قالاسىنىڭ 299 جىلدىق مەرەيتويىنا ەرەكشە اتسالىسۋدى ءجون كوردىك. قاراپ وتىرساڭىزدار استانا قالاسىنداعى بايتەرەك, ۇكىمەت ءۇيى, الاش ارىستارى ءاليحان بوكەيحانوۆ, احمەت بايتۇرسىنوۆ, جۇسىپبەك ايماۋىتوۆ, ماعجان جۇماباەۆتاردىڭ فوتوسۋرەتتەرىن دە حالىق نازارىنا ۇسىنىپ وتىرمىز.
-ءبىز بۇگىن قالا كۇنىن اتاپ وتۋدەمىز, بۇل قالانىڭ تاعدىرى تاريحقا تولى,-دەدى قالاداعى قادىرمەندى ءارى ۇلگىلى ۇستازداردىڭ ءبىرى بايان نۇرعاليەۆا,-الەمگە ابايداي ۇلى ادامدى سىيلاعان, وسى توپىراقتا شاكارىم مەن مۇحتار دانالار ومىرگە كەلگەن. مەن ءوز وقۋشىلارىما ءبىزدىڭ سەمەيدە ابايدىڭ دوسى ەۆگەني ميحاەليس, شوقان ءۋاليحانوۆتىڭ جولداسى فەدور دوستوەۆسكيلەر دە ءومىر ءسۇرىپ, وسى قالادا وزدەرىنىڭ نەبىر تاماشا تۋىندىلارىن جازعاندىقتارىن ۇنەمى ايتىپ وتىرامىن. سەمەي قالاسى وركەنيەتتىڭ, وزىق مادەنيەتتىڭ قالاسى. قالا كۇنى قۇتتى بولسىن دەمەكپىن!
ەرتىس جاعالاۋىندا اق حالاتتى ابزال جاندار, دارىگەرلەر دە ءان سالىپ, بي بيلەپ ءوز ونەرلەرىن ورتاعا سالدى. وسىندا اكەلىنگەن «يۋنيس» ش ۇلىق-ناسكي فابريكاسىنىڭ ونىمدەرىن قالا جۇرتشىلىعى جاپپاي ساتىپ الدى. ال «سەماز» جشس-ءىنىڭ تراكتورلارى مەن سيليكات زاۋىتىنىڭ ءتۇرلى-ءتۇستى كىرپىشتەرى دە كەلۋشىلەردىڭ كوزايىمىنا اينالدى.ءبىزدىڭ قالامىزدا دا وسىنداي ىرگەلى ءوندىرىس ورىندارى ۇلعايىپ, جاندانىپ كەلە جاتقاندىعىنىڭ كورسەتكىشىندەي بولدى. حالىق وسى ءوندىرىس ونىمدەرىندەگى «Made in Semey» دەگەن جازۋدى كورىپ, ريزاشىلىقتارىن جەتكىزدى. ال ساياجاي تۇرعىندارى دا مەرەكەدەن قالىس قالمادى. «شىعىس» ساياجايىنىڭ تۇرعىنى نۇربول ايشۋاقوۆ مەرەكەگە 15 كيلوگرامدىق اسقاباق اكەلىپتى. كەشكە قاراي كونتسەرتتىك باعدارلاما ۇيىمداستىرىلدى. قالا كۇنى ءتۇن ورتاسىنا دەيىن مەرەكەلەندى.
راۋشان نۇعمانبەكوۆا, سۋرەتتەر اۆتوردىكى
سەمەي قالاسى.
