مىنە, وسىعان وراي ماڭىزدى ماسەلە – سوت تورەلىگىنىڭ تيىمدىلىگىن, اشىقتىعىن جانە قولجەتىمدىلىگىن ارتتىرۋعا باعىتتالعان «سوت تورەلىگى سەكتورىن ينستيتۋتتىق نىعايتۋ» جوباسىن ودان ءارى ىسكە اسىرۋ, سوتتارعا جاڭا اقپاراتتىق تەحنولوگيالاردى ەنگىزۋ جانە سوت تورەلىگى اكادەمياسىن دامىتۋ جايى جوعارعى سوتتىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى نۇرسەرىك ءشارىپوۆ پەن دۇنيەجۇزىلىك بانكتىڭ جوبا جەتەكشىسى, مەملەكەتتىك سەكتور بويىنشا جەتەكشى مامان ۆاليد ماليكپەن كەزدەسۋىندە جان-جاقتى تالقىلاندى.
جوبا شەڭبەرىندە, جوعارىدا ايتقانىمىزداي, سوتتى اكىمشىلەندىرۋ ماسەلەلەرىنە ايرىقشا نازار اۋدارىلىپ وتىر. ماسەلەن, دۇنيەجۇزىلىك بانك ءبولىپ وتىرعان قاراجات ەسەبىنەن سوتتاردا قاناتقاقتى جوبا رەتىندە جەكە كەڭەسشىلەر بىرلىكتەرى (كەڭەسشى, سۋديا كومەكشىسى, ۇيلەستىرۋشى) ەنگىزىلدى. ەندى بۇدان شىعاتىن ناتيجەلەردى ەسكەرە كەلە, ەلىمىزدىڭ سوتتارىندا اتالعان لاۋازىمداردى ەنگىزۋدىڭ قاجەتتىلىگى تۋرالى شەشىم قابىلداناتىن بولادى. قازىرگى تاڭدا جوباعا استانا قالاسىنىڭ مامانداندىرىلعان اۋدانارالىق ەكونوميكالىق سوتى مەن سارىارقا اۋداندىق سوتى قاتىسۋدا.
كەزدەسۋدەن كەيىن دۇنيەجۇزىلىك بانكتىڭ دەلەگاتسياسىنا جوعارعى سوتتىڭ احۋالدىق ورتالىعىنىڭ جۇمىسى تانىستىرىلدى. ول تىكەلەي رەجىمدە ءىستى قاراۋدىڭ پروتسەستىك مەرزىم كورسەتكىشتەرىن مونيتورينگىلەۋگە, سوت وتىرىستارىندا اۋديوبەينەتىركەۋ قۇرىلعىلارىنىڭ جۇمىسىن باقىلاۋعا, سوت ستاتيستيكاسىن قولدانۋعا, سوتتى قۇرمەتتەمەۋ جاعدايى مەن سوت پروتسەستەرىنە قاتىسۋشىلارعا تونگەن قاۋىپتى تەز انىقتاۋعا مۇمكىندىك بەرەدى.
سونىمەن قاتار دۇنيەجۇزىلىك بانك دەلەگاتسيا وكىلدەرىنىڭ اتالعان جوبا جۇزەگە اسىرىلاتىن سوتتارعا بارۋى جوسپارلانۋدا. كەزدەسۋگە دۇنيەجۇزىلىك بانك جوباسىن ىسكە اسىراتىن ماماندار, جوعارعى سوتتىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ قۇرىلىمدىق بولىمشەلەرىنىڭ باسشىلارى جانە سوت توراعالارى مەن سۋديالار قاتىستى.
