– كوماندامىز جاس بولسا دا, ء«ا» دەگەننەن ەل چەمپيوناتى مەن كۋبوك جارىستارىندا جاقسى قىرىنان تانىلدى. بيىل قۇرامنىڭ تەڭ جارتىسىنا جۋىعى جاڭالانىپ, جاستارمەن تولىقتى. ماسەلەن, «استانا» حوككەي كلۋبىنان 19 جاستاعى شابۋىلشى ءامىر الىباەۆ قابىلداندى. كوماندا نامىسىن سايدىڭ تاسىنداي ىرىكتەلگەن 28 حوككەيشى قورعايتىن بولادى. يلگيز نۋريەۆ, دميتري يسماگيلوۆ, دەنيس ستاسيۋك سەكىلدى تاجىريبەلى ويىنشىلارعا ارقا سۇيەيمىز.
قازاقستان چەمپيوناتىنىڭ 2017-2018 جىلعى ماۋسىمىنىڭ سالتاناتتى اشىلۋ راسىمىندە ايماق باسشىسى قۇمار اقساقالوۆ ەكىنشى رەت ەل كۋبوگىنىڭ جەڭىمپازى اتانۋىمىزبەن قۇتتىقتاپ, جەڭىسكە دەگەن سەنىمىمىزدى جىگەرلەندىردى.
– دەسەك تە, جانكۇيەرلەر تەك جەڭىس كۇتىپ, قانشا قولداعانمەن, كوكەيلەرىندە وكىنىش تابى قالعان سياقتى.
– كەز كەلگەن جارىستى كىبىرتىكتەي, قوبالجىعان كوڭىلمەن باستاۋ زاڭدى قۇبىلىس دەر ەدىم. بۇعان دەيىن رۋدنىيدىڭ «گورنياگىنان» 11 رەت باسىم تۇسكەنىمىزبەن, ولار وزىندىك ويىن ورنەگى قالىپتاسقان كوماندا سانالادى. ءبىرىنشى كەزدەسۋدە 3:1 ەسەبىمەن ۇتقانىمىزبەن, ەكىنشى كەزدەسۋدە 1:2 ەسەبىمەن ەسە جىبەرىپ الدىق. بالكىم كوماندالىق ويىن ماشىعى, جەكەلەگەن شەبەرلىكتەر جەتىسپەگەن بولار. ونىڭ ۇستىنە كوماندا كاپيتانى, حالىقارالىق دارەجەدەگى سپورت شەبەرى يلگيز نۋريەۆتىڭ اۋىر جاراقات الىپ, قارىمتا كەزدەسۋگە قاتىسا الماۋى ماتچ تاعدىرىنا اسەر ەتكەن ءتارىزدى. الداعى ۋاقىتتا تاكتيكالىق تۇرعىدان ويلاساتىن ماسەلەلەر جوق ەمەس.
– ەل بىرىنشىلىگىنە 2015 جىلى تۇڭعىش رەت قاتىسىپ, العاشقى ويىندى ەلوردانىڭ «نوماد» كومانداسىنا قارسى وتكىزگەندەرىڭىز, وندا دا يتجىعىسپەن تاراسقاندارىڭىز ەسىمىزدە...
– ءبىر ۇتىلىس, ءبىر ۇتىستى ايتىپ تۇرسىز عوي. ونىڭ الدىندا عانا كوكشەتاۋ قالاسىندا ەلوردانىڭ «استاناسىن», كوكشەتاۋدىڭ «ارلانىن», رۋدنىيدىڭ «گورنياك» جانە قاراعاندىنىڭ «تەمىرتاۋ» كوماندالارىن تىزە بۇكتىرىپ, «جەڭىس كۋبوگى» ماۋسىمالدى ءتۋرنيرىنىڭ جەڭىمپازى اتانعان بولاتىنبىز. قازاقستان چەمپيوناتىن كوتەرىڭكى كوڭىل-كۇيمەن باستاعانمەن, بىردەن ازۋلى قارسىلاسقا تاپ بولدىق. حوككەيشىلەرىمىزدىڭ ەرەكشە تولقىپ تۇرعانى بايقالدى. قانشا ايتقانمەن, ءباسى جوعارى دودادا ءبىرىنشى رەت كۇش سىناسۋ وڭاي ەمەس. تاجىريبەنىڭ ازدىعى ءبىلىنىپ تۇردى. دەگەنمەن, تەڭ تارقاسۋىمىزدىڭ ءوزى نەگە تۇرادى؟!
– العاشقى كۋبوكتى قانجىعاعا بايلاعان كەزدەگى ءساتتى ايتىڭىزشى؟ سولتۇستىكقازاقستاندىق سپورت سۇيەر قاۋىم كوماندانى توبەلەرىنە تىك كوتەرىپ اكەتكەندەي بولدى عوي؟!
– ارينە! ءوز توبىمىزدا وتكىزگەن ءتورت ويىندا دا وزا شاۋىپ, فينالدىق باسەكەدە پاۆلوداردىڭ «ەرتىسىمەن» جولىعىستىق. ماتچ اياقتالۋعا ساناۋلى سەكۋندتار قالعاندا يليا احمەتوۆتىڭ سوققان شايباسى بىزگە جەڭىس سىيلادى. بيىلعى كۋبوك جارىسىنىڭ سوڭعى سايىسىندا قازاقستاننىڭ بىرنەشە دۇركىن جەڭىمپازى اتىراۋدىڭ «بەيبارىسىن» 3:2 ەسەبىمەن ۇتىپ, ەكىنشى رەت جەڭىستىڭ ەڭ بيىك تۇعىرىنا كوتەرىلدىك.
– ۇلتتىق بىرىنشىلىكتىڭ 2015-2016 ماۋسىمىندا قولا مەدالدى جەڭىپ العاندارىڭىزبەن, بيىلعى تۋرنير قورىتىندىسىندا تومەن سىرعىعاندارىڭىزدى قالاي تۇسىندىرەسىز؟
– پلەي-وفف كەزەڭىندە ەلىمىزدىڭ ەكى دۇركىن جەڭىمپازى اتىراۋلىق «بەيبارىسقا» ەسە جىبەرىپ, ءۇشىنشى ورىنعا تابان تىرەۋىمىز قۇرىلعانىنا ءالى جىل تولا قويماعان كوماندانىڭ ەرەن ەرلىگى دەسە دە جاراسادى. ال بيىلعى بىرىنشىلىكتى «بەستىكتە» تۇيىندەۋىمىزدىڭ بار سىرى تاجىريبەلى حوككەيشىلەردىڭ ويىندارعا تولىققاندى قاتىسا الماۋىندا. مىسالى, قورعاۋشى الەكساندر نۋرەك دۇنيەجۇزىلىك ۋنيۆەرسيادانىڭ كۇمىس جۇلدەگەرى اتاندى. شابۋىلشىلار يلگيز نۋريەۆ پەن ماكسيم ۆولكوۆ ازيا ويىندارىنان التىن تاعىپ ورالدى. بۇل – اقتالۋ ەمەس, ماسەلەنىڭ ءمانىسىن ءتۇسىندىرۋ. قۇرامعا لەگيونەرلەرمەن قاتار قازاقستاندىق جانە جەرگىلىكتى جاستار ىرىكتەلىپ الىنعانىن جوعارىدا ايتتىم. العا قويعان ماقساتىمىز بيىك. كوماندالىق تارتىمدى ويىن ورنەگىن كورسەتە وتىرىپ, توپ جارۋ. وعان قاي جاعىنان بولسىن مۇمكىندىگىمىز تولىق جەتەدى.
اڭگىمەلەسكەن
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
