كەشە قازاقستان رەسپۋبليكاسىنىڭ سىرتقى ىستەر مينيسترلىگىندە بۇۇ كۇنىنە جانە ەلىمىزدىڭ تاۋەلسىزدىگىنىڭ 20 جىلدىعىنا ارنالعان دوڭگەلەك ۇستەل بولىپ ءوتتى. اتالعان ءىس-شاراعا مەملەكەتتىك ورگانداردىڭ, ديپلوماتيالىق كورپۋستىڭ جانە بۇۇ جۇيەسىنىڭ وكىلدەرى قاتىستى.
قاتىسۋشىلارعا ارناپ قازاقستاننىڭ سىرتقى ىستەر ءمينيسترى ە.قازىحانوۆ پەن بۇۇ-نىڭ ەلىمىزدەگى رەزيدەنت-ءۇيلەستىرۋشىسى س.تۋلل ءسوز ءسويلەدى. ءوزىنىڭ سوزىندە ە.قازىحانوۆ 1992 جىلدىڭ 2 ناۋرىزىندا بۇۇ باس اسسامبلەياسىنىڭ 46-شى سەسسياسىنىڭ 46/224 شەشىمىندە قازاقستان رەسپۋبليكاسى ءبىراۋىزدان بۇۇ-عا مۇشە بولىپ قابىلدانعانىن اتاپ ءوتتى.
بۇل وقيعا مەملەكەت ءۇشىن ۇلكەن ساياسي ماعىنا بەردى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ وسىعان وراي «بۇل وقيعانىڭ ءمانى باعا جەتكىزگىسىز. ءبىز حالىقارالىق قۇقىقتارداعى ءوزىمىزدىڭ ۇستانىمىمىزدى دالەلدەپ قانا قويماي, الەمدە قاۋىپسىزدىك ورناتۋدىڭ نەگىزگى جۇمىسىندا اتالعان بەدەلدى ۇيىمنىڭ ءمۇددەلەرىن بىرگە قورعاۋعا اتسالىسىپ وتىرمىز», – دەدى.
قازاقستان بۇۇ-عا مۇشە بولعالى بەرى حالىقارالىق قوعامداستىقپەن ىقپالداستىعى ارتا ءتۇستى. ۇيىم اياسىنداعى بارلىق ءىس-شارالارعا ۇلكەن بەلسەندىلىكپەن قاتىسىپ كەلەدى. ىنتىماقتاستىقتى دامىتۋدىڭ باستى قادامدارى رەتىندە پرەزيدەنت ن.ءا.نازارباەۆتىڭ بۇۇ-نىڭ نيۋ-يوركتەگى شتاب-پاتەرىنە رەسمي ساپارلارى مەن بۇۇ باس اسسامبلەياسىنىڭ جۇمىستارىنا قاتىسۋى جانە بۇۇ باس حاتشىلارى كوفي انناننىڭ 2002 جىلى, پان گي مۋننىڭ 2010 جىلى قازاقستانعا جاساعان ساپارلارىن ايتۋعا بولادى. ەلباسىنىڭ بۇۇ مىنبەسىنەن ايتىلعان حالىقارالىق باستامالارى قازىرگى ۋاقىتتا ءساتتى ىسكە اسىرىلۋدا.
دوڭگەلەك ۇستەلدە س.تۋلل قازاقستاننىڭ بۇۇ-مەن 20 جىلعا جۋىق ءونىمدى ءوزارا ىقپالداستىعىنىڭ نەگىزگى ءساتتەرىن, ىنتىماقتاستىقتىڭ بولاشاعىن, سونداي-اق قاتىناستارىمىزدىڭ جاڭا ساپالى دەڭگەيگە ءوتۋ مۇمكىندىكتەرىن اتاپ ءوتتى. جيىن بارىسىندا قازاقستاننىڭ تۇراقتى دامۋىنا بايلانىستى مازمۇندى اڭگىمە ءوربىدى.
