«اتانعانىم مىرزاتاي – ەل ارقاسى»
اتىراۋدا وتكەن مەملەكەت جانە قوعام قايراتكەرى مىرزاتاي جولداسبەكوۆتىڭ شىعارماشىلىق كەشى وسىلاي اتالدى. بار عۇمىرىن ەل يگىلىگىن ەسەلەۋگە ارناپ كەلە جاتقان ايتۋلى تۇلعانى قۇرمانعازى اتىنداعى مادەنيەت سارايىنا جينالعان اتىراۋ جۇرتى قوشەمەت كورسەتىپ قارسى الدى.
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا مۇنايلى ايماقتا مادەني شارالارعا ايرىقشا كوڭىل ءبولىنىپ كەلەدى. تەك اتىراۋدىڭ عانا ەمەس, كۇللى قازاق ەلىنىڭ ماقتانىشىنا اينالعان, ومىرلەرى ونەگەگە تولى قوعام قايراتكەرلەرى, اقىن-جازۋشىلار مەن ونەر يەلەرىنىڭ شىعارماشىلىق كەشتەرى ءجيى ۇيىمداستىرىلىپ ءجۇر. وسى باعدارلاما اياسىندا فيلولوگيا عىلىمدارىنىڭ دوكتورى, اكادەميك مىرزاتاي جولداسبەكوۆ تە اتىراۋعا كەلىپ, ەلمەن جۇزدەستى.
«قازاق رۋحانياتىنىڭ ابىزى, مەملەكەت قايراتكەرى مىرزاتاي جولداسبەكتوۆتىڭ ءومىرىن, تاعدىر تاۋقىمەتىن ءبىر ادامداي كوتەرگەنىن, قاجىماي-تالماي, جاسىماي بۇگىنگە جەتكەنىن بەينەفيلم ارقىلى باعامدادىق. «سوعىس بالالارى» دەپ اتالعان بۋىن ادەبيەت پەن مادەنيەتكە ءوز قولتاڭبالارىن قالدىردى. سول ءبىر قيىندىقتىڭ نەشە سۇلەيىن كورىپ وسكەن بالالار بۇگىندە عۇلامالار مەن ابىزدارعا اينالدى. ەلدىڭ دامۋىنا ءوز ۇلەستەرىن قوستى. مىرزاتاي اعامىز – ۇستاز رەتىندە دە, قوعام قايراتكەرى رەتىندە دە وسكەلەڭ ۇرپاق تاربيەسىنە ءوز ۇلەسىن قوسقان ادام. ورحون-ەنيسەي كونە جازۋلارىن زەرتتەپ, ۇلتتىق قۇندىلىقتاردى ساقتاۋ جولىندا ەڭبەك ەتتى. مىرزاتاي اعاعا قاراپ بوي تۇزەگەن ازاماتتار كوپ. اعامىز ەلباسى نۇرسۇلتان نازارباەۆپەن بىرگە تاۋەلسىزدىكتى باياندى ەتۋ جولىندا ايانباي قىزمەت جاسادى,» دەدى شىعارماشىلىق كەشكە قاتىسقان وبلىس اكىمى نۇرلان نوعاەۆ.
ادەبي-مۋزىكالىق شارانى جىرشى اماندىق كومەكوۆ ارناۋ ايتىپ باستادى. مىرزاتاي جولداسبەكوۆتىڭ عالىم, قايراتكەر ەكەنىن ەل بىلەدى, كۇيشىلىگى بولەك ءبىر ونەر. «قوسباسار» مەن «دۇنيە شىركىن» كۇيلەرىن قازاقستاننىڭ ەڭبەك سىڭىرگەن ءارتىسى تۇرار الىپباەۆ ورىندادى. ءانشى ارداق بالاجانوۆا كەنەن ازىرباەۆتىڭ «مىرزاتايعا» دەگەن ءانىن شىرقاپ, كەشتىڭ كوركىن كەلتىردى.
قازاقستاننىڭ يران مەن پاكىستانداعى توتەنشە جانە وكىلەتتى ەلشىسى قىزمەتىندە جۇرگەن كەزىندە جازعان «توتىقۇس» ءانى دە «جىگىتكە جەتى ونەر دە از» دەگەن بابالار دانالىعىن ەسكە تۇسىرەدى. «دۇنيە-اي», «بايتەرەك» سىندى اندەر دە وسى كەشتە اۋەلەدى.
«ازامات بولىپ قالىپتاسۋىم, اتاعىم مەن داڭقىمنىڭ شىعۋى — ەلدىڭ اقەدىل كوڭىلىنىڭ ارقاسى,- دەدى مىرزاتاي جولداسبەكوۆ. -مەنىڭ اندەرىم مەن كۇيلەرىم — ءومىرىمنىڭ ايناسىنداي. جان تولعانىسىنان دۇنيەگە كەلگەن شىعارمالارىم ەلدىڭ كوڭىلىنەن شىقسا, باقىت دەگەن سول.»
باقىتگۇل باباش,
«ەگەمەن قازاقستان»
اتىراۋ
