IT-كۆارتالدىڭ باستى مىندەتى – بىرلەسكەن جۇمىستان سينەرگەتيكالىق ناتيجەنى الۋ ءۇشىن تەحنولوگيالىق كومپانيالاردى بىرىكتىرۋ. قازىرگى تاڭدا قر-داعى IT-كومپانيالاردىڭ 60%-دان استامى الماتىدا جۇمىس جاسايدى. IT-كومپانيالاردى ءبىر الاڭدا شوعىرلاندىرۋ وتاندىق مامانداردىڭ بىلىكتىلىگىن كوتەرۋگە, كۇردەلى جوبالاردى جۇزەگە اسىرۋعا جانە ۇزاق مەرزىمدى شارتتاردى جاساسۋعا مۇمكىندىك بەرمەك.
«يننوۆاتسيالىق تەحنولوگيالار پاركى» دەربەس كلاستەرلىك قورى (Almaty Tech Garden برەندىمەن قىزمەت جاسايدى) IT-كۆارتالدى قۇرۋ تۋرالى باستاماسىن ەلدەگى اقپارات جانە كوممۋنيكاتسيا سالاسىن دامىتۋ جانە ەلدى تسيفر جۇيەسىنە كوشىرۋ مىندەتىن ءتيىمدى جۇزەگە اسىرۋ ماقساتىندا قر ۇكىمەتىنىڭ قولداۋىمەن جۇزەگە اسىرۋدا.
«جىبەك جولى» بيزنەس ورتالىعىندا ورنالاسقان IT-كۆارتال 17000 شارشى مەتر اۋماقتى الىپ جاتىر. ۇستىمىزدەگى جىلدىڭ سوڭىنا دەيىن وندا 10 IT-كومپانيا جانە 15 ستارتاپ جايعاسپاق. 2018 جىلى 20 IT-كومپانيانى جانە 50 ستارتاپتى تارتۋ كوزدەلىپ وتىر. IT-كۆارتال دامىعان سايىن ونىڭ الاڭىن كەڭەيتۋ ءۇشىن حالىقارالىق اقپاراتتىق تەحنولوگيالار ۋنيۆەرسيتەتىمەن بىرلەسە جەكە كامپۋستى سالۋ مۇمكىندىگى قاراستىرىلىپ قويعان.
IT-كۆارتالدىڭ باستى ارتىقشىلىعى – رەزيدەنتتەردىڭ IBM, ARM, Autodesk, 1س سىندى باسقا دا مامانداندىرىلعان زاماناۋي پلاتفورمالارعا قول جەتكىزە الاتىندىعىندا. سونىمەن قاتار, «يننوۆاتسيالىق تەحنولوگيالار پاركى» ارنايى ەكونوميكالىق ايماعىنىڭ ەكساۋماقتىلىق تۋرالى شارتتارىنا سايكەس كەلەتىن كومپانيالار الەۋمەتتىك سالىقتان, جەر سالىعىنان, كورپوراتيۆتىك كىرىس سالىعىنان, م ۇلىك سالىعىنان بوساتۋ سىندى سالىقتىق جەڭىلدىكتەر مەن ارتىقشىلىقتارعا يە بولادى. قازىرگى تاڭدا ەكساۋماقتىلىق قاعيداسىنا سايكەس «يننوۆاتسيالىق تەحنولوگيالار پاركى» اەا-نىڭ ارتىقشىلىقتارىنا يە بولعان الماتىداعى 45 كومپانيا IT-كۆارتالعا قاتىسۋعا مۇمكىندىگى بار. IT-كۆارتال اۋماعىندا يننوۆاتسيالىق ستارتاپتاردىڭ شوعىرلانۋى ونىڭ دامۋىنا ۇلكەن قوزعاۋ سالماق. ۇستىمىزدەگى جىلدىڭ قازانىندا Almaty Tech Garden حالىقارالىق Startup Kazakhstan باعدارلاماسىن ىسكە قوسقالى وتىر. ونىڭ قاتىسۋشىلارى IT-كۆارتالدا ورنالاسپاق. Startup Kazakhstan - وتاندىق ستارتاپتاردى دامىتىپ, شەتەلدىك ستارتاپتاردى ەلگە تارتۋعا باعىتتالعان تۇڭعىش اۋقىمدى قازاقستاندىق باعدارلاما. ول Almaty Tech Garden جانە GVA Capital-GVA Alatau Fund-تىڭ ورتاق ۆەنچۋرلىق قورى ارقىلى قارجىلاندىرىلاتىن بولادى. ستارتاپتارعا قۇيىلاتىن ينۆەستيتسيالاردىڭ كولەمى 100 000 دوللارعا دەيىن جەتەدى. 2020 جىلعا دەيىن 500-گە تارتا يننوۆاتسيالىق ستارتاپ قارجىلاندىرىلىپ, جوعارى تەحنولوگيالىق, ەكسپورتقا باعدارلانعان 50 كومپانيا ينكۋباتسيالانادى. وتكەن ايدا Almaty Tech Garden GVA ۇيىمىمەن بىرلەسىپ, كرەمني القابىندا تۇڭعىش رەسمي تەحنولوگيالىق وكىلدىگىن اشتى. وسىلايشا Startup Kazakhstan قاتىسۋشىلارىنىڭ دامۋىن جەدەلدەتۋ (دايارلاۋ) شارالارى ءىشىنارا كرەمني القابىندا (اقش) جۇرگىزىلەتىن بولادى.
سونىمەن قاتار, قور بالامالى قارجىلاندىرۋ كوزدەرى, سونىڭ ىشىندە تسيفرلىك توكەندەر ارقىلى ستارتاپتارعا كومەكتەسۋدى جوسپارلاپ وتىر. كەيدە ICO نەمەسە «Initial Coin Offering» دەپ اتالاتىن بۇل تسيفرلىك توكەندەر – قازىر بۇكىل الەمدە تانىمالدىعى قارقىندى تۇردە دامىپ كەلە جاتقان بلوكچەين تەحنولوگياسى نەگىزىندە ينۆەستيتسيالاردى تارتۋدىڭ جاڭا ءادىسى. Startup Kazakhstan قاتىسۋشىلارىن ICO-عا شىعۋعا دايىنداۋ ءۇشىن ICO-ينكۋباتوردى ىسكە قوسۋ جوسپارلانعان.
«جەتەكشى يننوۆاتسيالىق ورتالىقتارمەن ىنتىماقتاسۋ ستارتاپ ەكوجۇيەسىن دامىتۋدىڭ نەگىزى بولىپ تابىلادى. كرەمني القابىندا وكىلدىكتىڭ ىسكە قوسىلۋى يننوۆاتسيالىق ورتانى دامىتۋعا, وزىق تەحنولوگيالارعا سۇرانىسى جوعارى جاھاندىق جەلىگە بىرىككەن شەتەلدىك ستارتاپتاردى تارتىپ, قازاقستاندىق ستارتاپتاردى وقىتۋعا ەسىك اشىپ وتىر», - دەدى Global Venture Alliance باسقارۋشى سەرىكتەسى لەيرد كاگان.
Almaty Tech Garden-ءنىڭ «استانا» حالىقارالىق قارجى ورتالىعىمەن ءوزارا ارەكەتتەسۋى وسى شارالاردى جۇزەگە اسىرۋ كەزىندە ۇلكەن دەمەۋ جاساماق. 20 قىركۇيەك كۇنى استانادا Almaty Tech Garden, احقو جانە GVA بلوكچەين تەحنولوگياسىنا ارنالعان ەكوجۇيەنى قۇرۋ سالاسىندا ىنتىماقتاسۋ جونىندە مەموراندۋمعا قول قويدى. وسىعان قوسا, اقىلدى تەحنولوگيالاردى دامىتۋ ورتالىعى قۇرىلاتىن بولادى. ول IBM-مەن بىرلەسكەن «زياتكەرلىك جۇيەلەر», EcoDomus جانە Autodesk-پەن بىرلەسكەن «BIM+ زەرتحاناسى», بريتاندىق IntelliSense.io كومپانياسىمەن بىرلەسكەن «تسيفرلىك ونەركاسىپ» سىندى ءۇش ورتالىقتان تۇراتىن بولادى.
«IT-كۆارتالدى اشۋ ارقىلى ءبىز IT-كومپانيالارعا ورتاقتاسىپ, سينەرگەتيكالىق ناتيجەگە جەتۋگە مۇمكىندىك بەرەتىن جايلى ينفراقۇرىلىمدى قالا ىشىندە جاساپ بەرىپ وتىرمىز. ءبىز وسى الاڭدى باعدارلاماشىلارعا, يننوۆاتورلارعا, جاڭا يدەيالار, وزىق تەحنولوگيالار مەن تىڭ شەشىمدەردى جاساۋمەن اينالىساتىن جاسامپاز تۇلعالارعا ۇسىنىپ وتىرعانىمىزعا قۋانىشتىمىز. سونىمەن بىرگە, ءبىز «يتپ» اەا نەگىزىندە ماشينا جاساۋ, جاڭا ماتەريالدار, گەولوگيالىق بارلاۋ سىندى اۋىر ونەركاسىپتەردى يننوۆاتسيالىق تۇرعىدا دامىتۋعا باعىتتالعان ەكوجۇيەنى دامىتۋدامىز. كەزەڭ-كەزەڭىمەن ارەكەت ەتە وتىرىپ, ءبىز يندۋستريا 4.0, جاڭا ماتەريالدار جانە ماشينا جاساۋ سىندى باعىتتارعا ارنالعان بىلىكتىلىك ورتالىقتارىن قالىپتاستىرىپ جاتىرمىز. سونداي-اق, اەا بازاسىندا گەولوگيالىق كلاستەردى قۇرۋ مۇمكىندىگى پىسىقتالىپ, جەر قويناۋىن پايدالانۋشى ءىرى ينۆەستورلاردى تارتۋ باعىتىندا جۇمىس جۇرگىزىلۋدە. وسىلايشا «يپت» اەا ەكونوميكانىڭ نەگىزگى سالالارىن تسيفرلەندىرۋ جونىندەگى مىندەتتى جۇزەگە اسىرۋعا ارنالعان باستى قورلاردىڭ بىرىنە اينالۋى ءۇشىن قاجەتتى بىلىكتىلىكتەر مەن جاعدايلار جاسالۋدا», - دەپ اتاپ ءوتتى Almaty Tech Garden باس ديرەكتورى سانجار كەتتەبەكوۆ.
ارمان وكتيابر,
«ەگەمەن قازاقستان»
الماتى
