وسى ماقساتتى نەگىزگە الا وتىرىپ, الماتىدا دۇنيەجۇزىلىك تۋريستىك ۇيىم مەن «Visit Almaty» تۋريستىك اقپاراتتىق ورتالىعى اراسىنداعى جارتىجىلدىق كەلىسىم-شارت اياسىندا الماتى كلاستەرلەرىندەگى ۇلى جىبەك جولى ءتۋريستىنىڭ بەينەسىن زەرتتەۋ باعدارلاماسىنىڭ باستالۋىنا قاتىستى ءباسپاسوز ءماسليحاتى ءوتتى. ءىس-شارا بارىسىندا الماتى قالاسى تۋريزم جانە سىرتقى بايلانىستار باسقارماسىنىڭ باسشىسى ەرلان جايلاۋباي مەن دۇنيەجۇزىلىك تۋريستىك ۇيىمنىڭ جىبەك جولى باعدارلاماسىنىڭ ساراپشىسى نيكولاۋس گولفينوپۋلوس جۋرناليستەرگە جوبانىڭ ماقساتى مەن مىندەتتەرى جايلى كەڭ كولەمدە بايانداپ بەردى.
– اتالعان زەرتتەۋ الماتى قالاسى اكىمدىگىنىڭ تاپسىرىسى بويىنشا دتۇ-مەن بىرگە جۇرگىزىلۋدە جانە ايماقتاعى ءتۋريزمنىڭ دامۋىندا, قازاقستانداعى تۋريزم يندۋسترياسىنىڭ ۇلكەن مۇمكىندىكتەرىن اشۋدا وتە زور ماڭىزى بار. زەرتتەۋ ناتيجەلەرىندە الماتى قالاسىنا كەلگەن ءتۋريستىڭ قالىپتى بەينەسىن, قالامىزدىڭ تۋريستىك ەرەكشەلىكتەرىن, ۇلكەن تۋريستىك اعىمدى قابىلداي الاتىن مۇمكىندىگىن, شەتەلدىك قوناقتار تاراپىنان قاناعاتتانۋ دەڭگەيىن, سونىمەن قاتار الماتى قالاسىن ۇلى جىبەك جولىنىڭ تانىمال برەندى رەتىندە قالاي پايدالانۋعا بولاتىنىن بىلەتىن بولامىز. اتالعان جوبا قازاقستاندا العاش رەت جۇرگىزىلىپ وتىر, سوندىقتان ءبىز دۇنيەجۇزىلىك تۋريستىك ۇيىمعا العىس بىلدىرەمىز. جوبا ويداعىداي ىسكە اسسا الماتى تۋريستەردىڭ قالاسىنا اينالماق – دەيدى Visit Almaty تۋريستىك اقپاراتتىق ورتالىعىنىڭ باسشىسى اسەل نۋركەباەۆا.
جوبانىڭ نەگىزگى ماقساتى مەگاپوليستىڭ تۋريستىك الەۋەتىن ارتتىرىپ ءتۋريزمنىڭ كەڭگە قانات جايۋىنا جاعداي جاساۋ. ول ءۇشىن شەت مەملەكەتتەن كەلگەن ساياحاتشىلارعا ءتۋريزمنىڭ بارلىق تالاپتارىنا ساي ساپالى قىزمەت كورسەتۋ قاجەت. سەرىكتەستىك اياسىندا دۇنيەجۇزىلىك تۋريستىك ۇيىم الماتىعا كەلەتىن ءتۋريستىڭ بەينەسىن تولىقتاي زەرتتەپ, قالاداعى ءتۋريزمنىڭ دامۋىنا جانە ساراپتاما جۇيەسىنە نەگىز قالاپ بەرەدى. سونىمەن بىرگە اتالعان ۇيىم جاڭا جۇمىس ورىندارىنىڭ پايدا بولۋ مۇمكىندىكتەرىن, الماتى قالاسىنىڭ تۋريزم سالاسىنداعى تابىسىنىڭ ءوسۋىن باعالايتىن بولادى.
الماتى قالاسى تۋريزم جانە سىرتقى بايلانىستار باسقارماسىنىڭ باسشىسى ەرلان جايلاۋبايدىڭ ايتۋىنشا, Visit Almaty جانە دۇنيەجۇزىلىك تۋريستىك ۇيىمنىڭ بىرىككەن زەرتتەۋ جۇمىستارى قالا اكىمشىلىگىنە الماتى قالاسى جانە وبلىسىنىڭ ءتۋريزمىن دامىتۋ جانە قازاقستاندىق تۋريستىك نارىقتىڭ حالىقارالىق نارىقتا باسەكەگە قابىلەتتىلىگىن العا جىلجىتىپ, الماتى قالاسىنىڭ دەمالىس پەن تۋريزمگە قولايلى قالا رەتىندەگى ءپوزيتيۆتى ءيميدجىن قالىپتاستىرۋعا, ماركەتينگتىك ستراتەگيالاردى جوسپارلاپ, ىسكە اسىرۋعا مۇمكىندىك بەرەدى.
باسقوسۋ بارىسىندا تۇيگەنىمىز, الماتىنىڭ اسەم كوركىن تاماشالاۋعا كەلگىسى كەلەتىن تۋريستەر سانى وتە كوپ. تەك, ولارعا قىزمەت كورسەتۋ ساپاسىن زامانۋ ستاندارتتار دەڭگەيىنە كوتەرىپ, اقپاراتتىق ناسيحات جۇمىستارىن ءبىر جۇيەگە كەلتىرۋ قاجەت. ماماندار الماتىنىڭ كوپكە تانىمال مەدەۋ, شىمبۇلاق سياقتى كورىكتى جەرلەرىمەن شەكتەلىپ قالماي, الداعى ۋاقىتتا ەلىمىزدىڭ باي-ءداستۇرى مەن تاعىلىمدى تاريحىنان سىر شەرتەتىن تۋريستەرگە ارنالعان جاڭا دەمالىس نىساندارىنىڭ بوي كوتەرەتىنىن ايتتى.
ارمان وكتيابر,
«ەگەمەن قازاقستان»
