قر جەڭىل اتلەتيكا فەدەراتسياسىنىڭ ءباسپاسوز قىزمەتى حابارلاۋىنشا, جارىستىڭ ەكىنشى كۇنىندە ايەلدەر اراسىندا ءۇش قارعىپ سەكىرۋدەن قازاقستان نامىسىن 2012 جىلعى وليمپيادا چەمپيونى ولگا رىپاكوۆا مەن 2017 جىلعى ازيا چەمپيونى ماريا وۆچيننيكوۆا قورعادى. رىپاكوۆا ءوز كەزەگىندە 14, 32 مەترگە سەكىرىپ جەڭىسكە جەتتى. وۆچيننيكوۆانىڭ كورسەتكىشى - 13,21 مەتر بولدى. قولا جۇلدەگە 18 جاسقا دەيىنگى جاستار اراسىنداعى الەم چەمپيوناتىنىڭ جەڭىمپازى قىتايلىق تان كيچجاو يە بولدى.
وسىلايشا, ولگا رىپاكوۆا اشحابادتا ءوتىپ جاتقان ازيا ويىندارىن ەكى التىنمەن اياقتادى. ول 18 قىركۇيەك كۇنى ۇزىندىققا سەكىرۋدەن دە ەشكىمگە دەس بەرمەگەن ەدى.
شىعىس قازاقستان وبلىسىنىڭ تاعى ءبىر تۋماسى ەلينا ميحينا 400 مەترگە جۇگىرۋدەن توپ جارىپ, قازاقستان قۇراماسىنىڭ وسى جارىستاعى بەسىنشى التىنىن ەنشىلەدى.
ميحينا فينالدىق كەزەڭدى 53, 37 سەكۋندتا جۇگىرىپ ءوتتى. كۇمىس جۇلدەگە ۆەتنامدىق تحي حانگ نگۋەن قول جەتكىزدى. ونىڭ ۋاقىت كورسەتكىشى - 54, 41 سەكۋند.ۇزدىك ۇشتىكتە تايلاندتان كەلگەن اتچيما ەنگ-چۋان (54, 45 س) بار.
- ماعان قولداۋ بىلدىرگەن جانداردىڭ بارلىعىنا العىس بىلدىرەمىن. اشحابادتا چەمپيون اتانۋ ءۇشىن قولىمنان كەلگەننىڭ ءبارىن جاسادىم. قۋانىشىما وراي, التىن مەدالعا يە بولدىم. مەنىڭ وسى جەتىستىگىمە ەڭبەك سىڭىرگەن جەكە باپكەرىم ليۋبوۆ نيكيتەنكوعا قانداي ماقتاۋ ايتسا دا جاراسادى. ناعىز ءوز ءىسىنىڭ مامانى. سول كىسىگە ەرەكشە راحمەتىمدى ايتقىم كەلەدى. ەندى كوماندالىق ەستافەتا بار. ەل مەرەيىن ءوسىرىپ, تاعى ءبىر مەدال جەڭىپ الۋعا تىرىسامىز, - دەيدى جارىستان كەيىن ەلينا ميحينا.
19 قىركۇيەك جەڭىسكە جەتكەندەردىڭ قاتارىندا 60 مەترگە جۇگىرگەن ۆيكتوريا زيابكينا دا بار. ول ازياداعى ەڭ ۇزدىك سپرينتەر ەكەنىن تاعى ءبىر مارتە دالەلدەدى. جارتىلاي فينالدا ەكىنشى بولعانىمەن, فينالدىق كەزەڭدە وزىنە باسەكەلەس جوق ەكەنىن بايقاتتى. زيابكينا بۇل قاشىقتىقتى 7,32 سەكۋندتا جۇگىرىپ ءوتتى. ەكىنشى ورىنعا ۆەتنامدىق لە تۋ چين (7,36 س) تۇراقتاسا, قولا جۇلدە تاعى ءبىر قازاقستاندىق اتلەت ولگا سافرونوۆاعا بۇيىردى. سوڭعىسى جارتىلاي فينالدا سەگىزىنشى ورىندا قالىپ قويعان ەدى. بىراق فينالدا سافرونوۆا بار كۇشىن سالىپ, قازاقستان قورجىنىنا تاعى ءبىر جۇلدەنى سىيلادى. ودان بولەك قولا جۇلدەگە ەرلەر اراسىندا 400 مەترگە جۇگىرگەن ميحايل ليتۆيندە يە بولدى. فينالدا ليتۆين وسى تۋرنيردەگى ەڭ ۇزدىك ناتيجەسىن كورسەتتى - 46,51 سەكۋند.
اشحابادتاعى ازيا ويىندارىنىڭ العاشقى ەكى جارىس كۇنىنىڭ قورىتىندىسى بويىنشا قازاقستان جەڭىل اتلەتتەرى 10 مەدالمەن (6 التىن,1كۇمىس, 3 قولا) جالپى كوماندالىق ەسەپتە ءبىرىنشى ورىندا تۇر. ايتا كەتەيىك, جارىستىڭ العاشقى كۇنىندە يۆان يۆانوۆ (يادرو سەرپۋ),ولگا رىپاكوۆا (ۇزىندىققا سەكىرۋ), سەرگەي گريگورەۆ (سىرىقپەن سەكىرۋ) چەمپيون اتانعان بولاتىن. ال 60 مەترگە توسقاۋىلدار ارقىلى جۇگىرگەن اناستاسيا ۆينوگرودوۆا قولا مەدال ەنشىلەدى.
ەستەرىڭىزگە سالا كەتەيىك, وسىعان دەيىن قازاقستان قۇراماسى جالپى ەسەپتە 6 التىن, 6 كۇمىس, 10 قولا مەدالمەن ءۇشىنشى ورىنعا كوتەرىلگەنىن حابارلاعان بولاتىنبىز. ال كوش باسىندا 43 التىن, 28 كۇمىس, 18 قولا مەدال جەڭىپ العان تۇرىكمەن سپورتشىلارى كەلە جاتسا, 7 التىن, 4 كۇمىس, 15 قولا مەدال ەنشىلەگەن يران سپورتشىلارى ەكىنشى ورىندا كەلەدى.
