فوتو: بەرىكحان تايجىگىت; ۆيدەو: اۋىل تۇرعىندارى
مۇنى كورگەن ەلدى مەكەننىڭ تۇرعىندارى اڭ-تاڭ. اڭ-تاڭ بولماعاندا قايتسىن, ۇزىندىعى 10, ەنى 5 مەترگە جۋىق جەردى الدەكىم تىك كوتەرىپ, ويىپ الىپ, 1 مەتردەي جەرگە جىلجىتىپ قويسا.
«بۇل – ادام بالاسىنىڭ قولىنان كەلە قوياتىن ءىس ەمەس. اۋىل سىرتىنداعى جازىق الاڭقايعا كەلىپ, ءىز سالعانداردىڭ بوگدەعالامشارلىقتار ەكەندىگىنە داۋ جوق», دەيدى اۋىل تۇرعىندارى.
ادام ايتسا نانعىسىز بۇل وقيعا بوزاي اۋىلىنان 12 شاقىرىم جەردە بولعان كورىنەدى. اۋىلدىڭ جىگىتتەرى ويىپ الىنعان جەردى بەينەكامەراعا ءتۇسىرىپ, ۇزىندىعىن, ەنىن, قالىڭدىعىن مۇقيات ولشەپ شىعىپتى. رومب ءتارىزدى ەتىپ ويىلعان جەردىڭ ۇزىندىعى – 12, ەنى – 5 مەتر, قالىڭدىعى 40 سانتيمەتر شاماسىندا ەكەن. ويىلىپ الىنىپ, جىلجىتىلعان جەردىڭ جوعارعى بولىگى كادىمگىدەي توپىراقتىڭ ۇستىنە شىعىپ جاتىر. استىندا قول سياتىنداي قۋىس تا بار. ويىلعان جەردىڭ جانىنان ۇزىندىعى 20 مەترگە جۋىق سىزىق سەكىلدى جارىقتى كورۋگە بولادى.
«مەنى تاڭعالدىرىپ تۇرعانى, وسىدان ءۇش-ءتورت كۇن بۇرىن كەلىپ بەينەكامەراعا تۇسىرگەنىمىزدە «رومبىنىڭ» اۋماعى كولەمدىلەۋ ەدى. ەندى قاراسام, ون سانتيمەتردەي جارىق سىزىق كادىمگىدەي كومىلىپ بارادى», دەدى وسى اۋىلداعى مەكتەپتىڭ تاريح ءپانىنىڭ مۇعالىمى ادىلبەك بايموللاەۆ تەلەفون ارقىلى تىلدەسكەنىمىزدە.
تىلسىم وقيعا بولعان اۋماق بوزاي اۋىلىنىڭ تۇرعىنى ەرلان اباەۆقا تيەسىلى شابىندىق جەر ەكەن. جىگىت اعاسى قازىلعان جەرگە اۋەلدە ءجوندى ءمان بەرمەگەنىن ايتادى.
«وتكەندە قالىڭ ءشوپتىڭ ورتاسىنان الدەكىمدەردىڭ جەردى قازىپ كەتكەنىن كورىپ قىنجىلعانىم راس. كەيىن جىگىتتەر ايتقاندا, كەلىپ, كورىپ, ءوز كوزىمە ءوزىم سەنبەدىم. جالپى, بۇل جەر سارىوبا دەپ اتالادى, تاريحى دا تەرەڭدە جاتىر», دەيدى ول. تاريح دەگەننەن شىعادى, كەزىندە ءدال وسى اۋىلدا گۇلعايشا اتتى اتاقتى ەمشى بولعان دەسەدى. ەمشىگە ەلىمىزدى قويىپ, كەڭەس وداعىنىڭ تۇكپىر-تۇكپىرىنەن جانىنا شيپا ىزدەگەن ادامدار اعىلىپ كەلىپ جاتادى ەكەن. «بوزاي ماڭىنا بوگدەعالامشارلىقتاردىڭ سول تۇستا كەلگەنى جايىندا دەرەكتەر دە بار», – دەيدى اۋىل تۇرعىندارى. ەندەشە, مۇنى بوگدەعالامشارلىقتاردىڭ بوزايعا جاساعان ەكىنشى «ساپارى» دەيمىز بە؟ الدە...
