جيىندا «Kahramaa» كاسىپورنىنىڭ وكىلدەرى ەلدەگى ەنەرگيانى ۇنەمدەۋ جانە سۋ رەسۋرستارىن ساقتاۋ سالاسىنداعى جۇمىس ناتيجەلەرىن ۇسىندى. ماسەلەن, 2015 جىلدان باستاپ وندا سۋ تۇتىنۋدى 35 پايىزعا, ال ەلەكتردى 20 پايىزعا قىسقارتقان. مەملەكەتتىڭ تابيعي رەسۋرستاردى ساقتاۋ تۋرالى جاڭا زاڭىنا سايكەس, «Kahramaa» بىرقاتار تەحنولوگيالاردى ازىرلەۋدە, ولاردىڭ اراسىندا عيماراتتاردى ەنەرگيامەن قامتاماسىز ەتۋگە ارنالعان كۇن ساۋلەسى قۋاتىن پايدالانۋ, سۋمەن جىلىتۋ جوبالارى بار. سونداي-اق, سۋ جىلىتقىش, توڭازىتقىش, مۇزداتقىش جانە كىرجۋعىش ماشينالارى ءۇشىن ەلەكتر ەنەرگياسى ونىمدىلىگىنىڭ ەڭ تومەنگى ستاندارتىن ەنگىزىلۋدە.
فورۋمدا قاتار ۋنيۆەرسيتەتى بىرەگەي ستاديوننىڭ جوسپارىن تانىستىردى. وندا 2022 جىلى فيفا فۋتبول ويىندارىنان الەم چەمپيوناتىن وتكىزۋ جوسپارلانۋدا. وسى شاراعا وراي بوي كوتەرەتىن نىسانعا سالقىنداتۋدىڭ يننوۆاتسيالىق جۇيەسى ەنگىزىلمەك. وندا ارنايى تەحنولوگيا سالقىن جەلدى ستيمۋلياتسيالاۋ جانە اۋا سەرگىتكىشتەردى قولدانىپ, سپورتشىلار مەن كورەرمەندەر ءۇشىن قولايلى تەمپەراتۋرانى ساقتاپ تۇرۋعا مۇمكىندىك بەرەدى.
قاتار ۋنيۆەرسيتەتىنىڭ پروفەسسورى, دوكتور ساۋد گحاني الەم چەمپيوناتى وتەتىن نىسانداردىڭ قۇرىلىسشىلارى قانداي جاعدايدا جۇمىس ىستەپ جاتقانىن دا اڭگىمەلەدى. «وقۋ ورنى عالىمدارى 35-40 گرادۋستىق ىستىقتا 15 گرادۋستىق تەمپەراتۋرانى ۇستاپ تۇراتىن سالقىنداتۋ تەحنولوگياسىن ويلاپ تاپتى. بۇل ويىنعا ەل قازىناسىنان جوعارى دەڭگەيدە قارجى بولىنۋدە. الەمدىك دودادا وينايتىن قازاقستان قۇراماسىنا دا ساتتىلىك تىلەيمىن», دەدى دوكتور.
جيىن بارىسىندا قازاقستاندىق بيزنەسمەندەر قاتارلىق «جاسىل» تەحنولوگيا جوبالارىنا قىزىعۋشىلىق تانىتىپ, ىسكەرلىك بايلانىس ورناتۋعا ۋاعدالاستى.
قازاقستان مەن قاتار ماڭىزدى ەكونوميكالىق ارىپتەستەر بولىپ تابىلادى. بىلتىر ەكى ەل اراسىنداعى تاۋار اينالىمى 746,5 مىڭ اقش دوللارىن قۇرادى. ونىڭ ىشىندە ەكسپورت 647,6 مىڭ دوللار بولسا, يمپورت – 98,9 مىڭ دوللار.
اسحات رايقۇل,
«ەگەمەن قازاقستان»
