اتا-انالار مەن وقۋشىلاردى كانيكۋلدار مەرزىمىنىڭ قىسقارۋى مۇمكىن دەگەن وي مازالاپ وتىر. 5 كۇندىك وقۋ اپتاسىنا كەلەر بولساق, ونىڭ ەنگىزىلۋى ءۇشىن مينيسترلىك تاراپىنان بارلىق جاعداي جاسالدى. بۇل تۇستا ەرەكشە اتاپ وتەر جايت – وقۋ جىلىنىڭ ۇزاقتىعى وزگەرمەي, ۇيرەنشىكتى ءتارتىپ ساقتالىپ وتىر. وقۋ جىلى ەش وزگەرىسسىز, قىركۇيەكتە باستالىپ, ادەتتەگىدەي 25 مامىر كۇنى اياقتالماق. ءبىلىم جانە عىلىم مينيسترلىگىنىڭ «ورتا ءبىلىم بەرۋ ۇيىمدارىندا 2017-2018 وقۋ جىلىنىڭ باستالۋىن, ۇزاقتىعىن جانە كانيكۋل كەزەڭدەرىن ايقىنداۋ تۋرالى» بۇيرىعى ماۋسىم ايىندا شىقتى. وندا وقۋ جىلىنىڭ ۇزاقتىعى مەكتەپالدى دايىندىق سىنىپتارىندا – 32 وقۋ اپتاسى, 1- سىنىپتاردا – 33 وقۋ اپتاسى, 2-11 سىنىپتاردا 34 وقۋ اپتاسى دەپ بەلگىلەنگەن.
كانيكۋلدار ۇزاقتىعى دا وزگەرمەيدى. 1-11 سىنىپتاردا كۇزگى كانيكۋل – 7 كۇن, قىسقى – 10 كۇن, كوكتەمگى – 13 كۇن. مەكتەپالدى دايارلىق سىنىپتارىندا كۇزگى كانيكۋل – 7 كۇن, قىسقى – 14 كۇن, كوكتەمگى – 15 كۇن, سونداي-اق, بۇلدىرشىندەر ءۇشىن 1-7 اقپان كۇندەرى ارالىعىندا 7 كۇندىك قوسىمشا كانيكۋل بەلگىلەندى.
وقۋ جۇكتەمەسى ازايا ما؟
ءيا, بالالار جۇكتەمەسىن ازايتۋ باعىتىندا دا جۇيەلى جۇمىس جۇرگىزىلىپ كەلەدى. ەستەرىڭىزدە بولسا, بىلتىر اتا-انالار قوعامداستىقتارى مەن ساراپشىلاردىڭ ۇسىنىستارى بويىنشا ءۇي تاپسىرمالارىنىڭ كولەمى ازايتىلعان بولاتىن.
مينيسترلىك ءۇي تاپسىرمالارىن ورىنداۋ بويىنشا مەتوديكالىق ۇسىنىمداردى بەكىتتى. دەمەك, ءۇي تاپسىرمالارىن ورىنداۋعا جۇمسالاتىن ۋاقىت, بۇرىنعى جاعدايمەن سالىستىرعاندا ۇشتەن ءبىر بولىككە قىسقارماق.
ءۇي تاپسىرماسىن ورىنداۋ ۋاقىتى 2-سىنىپتا 50 مينۋتتان, 3-4 سىنىپتاردا – 70 مينۋتتان, 5-6 سىنىپتاردا – 90 مينۋتتان, 7-9 سىنىپتاردا - 110 مينۋتتان, 10-11 سىنىپتاردا 130 مينۋتتان اسپاۋى ءتيىس.
ءۇي تاپسىرمالارى مەرەكە كۇندەرىنە جانە كانيكۋل كەزدەرىندە بەرىلمەيدى. تەك كوركەم ادەبيەتتى وقۋعا, جوبالىق جۇمىستاردى ورىنداۋعا, ماتەماتيكانى تەرەڭدەتىپ وقۋعا ارنالعان ەسەپتەردى شىعارۋعا, سونداي-اق, 1-سىنىپ وقۋشىلارىنىڭ 2-ءشى جارتىجىلدىقتان باستاپ وقۋ داعدىلارىن جاقسارتۋعا قاتىستى تاپسىرمالار عانا ەرەكشە جاعدايلار رەتىندە قاراستىرىلعان.
سونىمەن قاتار, جاڭا وقۋ جىلىنان باستاپ ساباق ۇزاقتىعى 40 مينۋت بولماق. مۇنداي ءتارتىپ نازارباەۆ زياتكەرلىك مەكتەپتەرىندە قالىپتاسقان. دەمەك, 40 مينۋتتىق ساباق كەستەسىندە كۇنىنە 30 مينۋت ۋاقىت «بوسايدى». سوندىقتان, قوسىمشا ساباق قوسىلعان جاعدايدىڭ وزىندە وقۋشىلار مەكتەپتە ادەتتەگىدەن تەك 10 مينۋت ارتىق وتكىزىپ, جۇكتەمەسى ايتارلىقتاي وزگەرمەيدى.
5 كۇندىك وقۋ اپتاسى جاعدايىندا وقۋ باعدارلامالارى وزگەرىسكە ۇشىراي ما؟ بۇل جاعداي بارلىق مەكتەپتەر مەن سىنىپتارعا قاتىستى ما؟
وقۋ باعدارلامالارى مەن ءاربىر ءپاندى مەڭگەرۋگە بولىنگەن ساعاتتار سانى وزگەرمەيدى. جاڭا سانيتارلىق ەرەجەلەر بو-يىنشا مەكتەپتەردىڭ 1-11 سىنىپتارىندا 5 كۇندىك وقۋ اپتاسىن ەنگىزۋگە رۇقسات بەرىلەدى. بۇل جالپى ورتا ءبىلىم بەرەتىن جانە دارىندى بالالارعا ارنالعان مامانداندىرىلعان مەكتەپتەردىڭ بارلىعىنا دا قاتىستى. مەكتەپتەردەگى وقۋ جۇكتەمەسىنىڭ كولەمىن 5 كۇندىك وقۋ اپتاسىنا ءبولۋ وڭاي. گيمنازيالار مەن ليتسەيلەردەگى جاعداي ءبىرشاما كۇردەلىرەك.
بۇگىنگى جالپى ءبىلىم بەرەتىن مەكتەپتەردەگى ۇلگىلىك وقۋ جوسپارلارىنا سايكەس, 1-11 سىنىپتارداعى اپتالىق وقۋ جۇكتەمەسىنىڭ ماكسيمالدى شاماسى 24 ساعاتتان 39 ساعاتقا دەيىنگى مولشەردە. جاڭا سانيتارلىق ەرەجەلەردە وسىنداي جۇكتەمە قاراستىرىلعان.
ال كۇندەلىكتى جۇكتەمەنى, باسقاشا ايتقاندا – كۇنىنە قانشا ساباق بولۋ كەرەكتىگىن, ءار مەكتەپ ءوز مۇمكىندىكتەرى مەن جاعدايىن ەسكەرە وتىرىپ, وزدىگىنەن بەلگىلەيدى. ارينە, ساباق كەستەسى اتا-انالار كوميتەتىمەن كەلىسىلۋى ءتيىس. بۇل دا مەكتەپتەردە قۇرىلىپ جاتقان قامقورشىلىق كەڭەستەرىنىڭ, جالپى قوعامنىڭ وكىلەتتىلىگى مەن جاۋاپكەرشىلىگىنىڭ جىلدان جىلعا ارتىپ كەلە جاتقانىنىڭ بەلگىسى.
5 كۇندىك وقۋ اپتاسىن ەنگىزۋ بالالار سەنبى كۇنى وقىمايدى دەگەن ءسوز بە؟
5 كۇندىك وقۋ اپتاسىن ەنگىزۋدىڭ نەگىزگى ءمانى – بالالارعا 2 كۇندىك دەمالىس بەرۋ. مينيسترلىك بۇل ءۇشىن بارلىق قاجەتتى جاعدايلار مەن مۇمكىندىكتەردىڭ بولۋىن قامتاماسىز ەتەدى. ءبىزدىڭ ويىمىزشا, مينيسترلىك ءار مەكتەپتىڭ ساباق كەستەسىن بەلگىلەپ, بەكىتۋگە ارالاسپاۋى ءتيىس. بۇل ماسەلەنى ءاربىر مەكتەپ وزدىگىنەن شەشەدى. مىسالعا, مەكتەپتە بارلىق ساباقتار ءبىر اۋىسىممەن وتكىزىلسە نەمەسە مەكتەپ كولەمى مەن كابينەتتەر سانى 5 كۇندىك وقۋ اپتاسىن ەكى اۋىسىمدا جۇرگىزۋگە مۇمكىندىك بەرسە, وندا مەكتەپ باسشىلىعى قامقورشىلىق كەڭەسپەن نەمەسە اتا-انالار كوميتەتىمەن كەلىسىپ, جاڭا تارتىپكە كوشۋدى تاڭداي الادى. مەكتەپتەردىڭ باسىم كوپشىلىگىنىڭ «بەسكۇندىكتى» تاڭداۋ مۇمكىندىكتەرى بار. وقۋ پروتسەسى ءۇش اۋىسىمدا جۇرگىزىلىپ جاتقان مەكتەپتەردىڭ مۇنداي تارتىپكە كوشە الماسى تۇسىنىكتى.
جوعارىدا ايتىلعانداي, گيمنازيالار مەن ليتسەيلەردە 5 كۇندىك وقۋ اپتاسىن ەنگىزۋ كۇردەلىرەك ماسەلە. مۇنداي مەكتەپتەردە نەگىزگى جۇكتەمەدەن بولەك گيمنازيالىق جانە ليتسەيلىك كومپونەنتتەر بولادى. ەلىمىزدەگى 7100 مەكتەپتىڭ 300-گە جۋىعى گيمنازيا مەن ليتسەيلەر. ونداعى باستاۋىش سىنىپتاردا 5 كۇندىك وقۋ اپتاسىن ەنگىزۋ مۇمكىندىگى بار. جوعارى سىنىپتار جاعدايىنا كەلەر بولساق, گيمنازيا-ليتسەيلەردە ۇيىرمەلىك جانە جوبالىق جۇمىستار كولەمىنىڭ ءبىرشاماسىن سەنبى كۇندەرىنە جۇرگىزۋگە ءماجبۇر بولادى. مۇنداي جاعدايدا ءبىز سەنبى كۇندەرىنە كۇردەلى پاندەردى قويماي, ماسەلەن, دەنە شىنىقتىرۋ, باستاپقى اسكەري دايىندىق بويىنشا ساباقتار مەن ۇيىرمەلىك جۇمىستار, بايقاۋلار مەن ەكسكۋرسيالار وتكىزۋدى ۇسىنامىز. بۇل تۇستا كەيبىر پاندەر بويىنشا ساباقتاردىڭ مۋزەيلەر مەن باسقا دا تاريحي, مادەني نىسانداردا وتكىزۋ قاجەتتىگىن ەسكەرسەك, كەيبىر ساباقتاردى مەكتەپتەن تىس جەرلەردە وتكىزۋ مۇمكىندىگى بار ەكەندىگىن ۇمىتپاعان ءجون.
