ەلباسى كەشە پارلامەنتتە سويلەگەن سوزىندە دە, سوت باقىلاۋىن كەڭەيتۋگە, ادۆوكاتۋرانىڭ ءرولىن جانە سوتتاعى ءسوز جارىسپالىلىعىن ارتتىرۋعا بايلانىستى پروبلەمالارعا ەرەكشە نازار اۋداردى.
سۋديالار كورپۋسى مەملەكەت باسشىسى جاريالاعان رەفورمالاردى تولىق قولدايدى. ۆەدومستۆوارالىق جۇمىس توبى اياسىندا ءبىز كۇدىكتىلەردى سوتقا دەيىن قاماۋدا ۇستاۋ مەرزىمىن 72 ساعاتتان 48 ساعاتقا دەيىن قىسقارتۋ, بارلىق جاسىرىن تەرگەۋ ءىس-قيمىلدارىن سوتتىڭ سانكتسيالاۋى سياقتى ماڭىزدى باستامالاردى ەنگىزدىك.
گەرمانيا, ەستونيا, ۇلىبريتانيا جانە گرۋزيا ءتارىزدى ەلدەردىڭ وزىق سوت تاجىريبەسىن زەردەلەپ, تىڭ ءىس-قيمىلدارعا ازىرلەنۋدەمىز.
بۇعان قوسا, ۇلت جوسپارى شەڭبەرىندە جوعارعى سوتتىڭ جانىنان قۇرىلعان حالىقارالىق كەڭەستىڭ ۇسىنىمدارى وتە ماڭىزدى. كەڭەس مۇشەلەرى ادۆوكاتۋرا ينستيتۋتىن دامىتۋ شارالارىنا قاتىستى وزدەرىنىڭ ويلارىن ۇسىنىپ وتىر.
سوت كادرلارىنا قاتىستى دا اۋقىمدى جۇمىس جۇرگىزىلۋدە. بەس جىلدا كەمىندە ءبىر رەت بارلىق سۋديالاردىڭ بىلىكتىلىگى تەكسەرىلەتىن بولدى. سۋديالار سوت تورەلىگى اكادەمياسىنىڭ بازاسىندا وزدەرىنىڭ بىلىمدەرىن ءاردايىم ارتتىرىپ وتىرادى. سوت ادىلدىگىن جۇزەگە اسىرۋدىڭ بۇكىل پروتسەسى اقپاراتتىق جۇيەگە تىركەلدى. مۇنىڭ ءبارى زاڭ ۇستەمدىگىن ءىس جۇزىندە قامتاماسىز ەتۋگە بەيىمدەلگەن زاماناۋي جاڭالىقتار دەپ ايتۋعا لايىق.
ەلباسى جاريالاعان بۇگىنگى رەفورمالاردا وتە وزەكتى جانە دە ازاماتتاردىڭ كونستيتۋتسيالىق قۇقىقتارىنىڭ قورعالۋ كەپىلىن ودان ءارى كۇشەيتەتىن بولادى.
پرەزيدەنت ەلىمىزدى ەكونوميكالىق ىنتىماقتاستىق جانە دامۋ ۇيىمى (ەىدۇ) ەلدەرىنىڭ ەڭ وزىق حالىقارالىق ستاندارتتارىنا جەتەلەيتىن ايقىن ءارى ناقتى تەتىكتەردى بەلگىلەپ بەردى.
قايرات ءمامي,
جوعارعى سوت توراعاسى
