«ستانساعا پويىز توقتايدى» دەگەننەن-اق وندا تۇراتىن تەمىرجولشىلار مارە-سارە بولىپ قالادى. بۇل پويىز كۇندەلىكتى ءارلى-بەرلى ءوتىپ جاتاتىن جولاۋشىلار نەمەسە جۇك پويىزى ەمەس, «سالاماتتى قازاقستان» پويىزى. كوۆىلنايا ستانساسىنا پويىز توقتايدى دەگەننەن ورىنباسار قالىباەۆا اپايدىڭ دا قۋانىشىندا شەك بولمادى. جۇمىستا جۇرگەندە ورتالىققا بارىپ, دەنساۋلىعىن تەكسەرتۋدىڭ ءبىر ءساتى كەلە قويمادى. قازىر زەينەت دەمالىسىندا بولسا دا, كۇندەلىكتى تىرشىلىك قامى, مال بار, جان بار دەگەندەي, ۇيدەن شىعا المايدى. قوستانايعا بارسا, ءار دارىگەردىڭ ەسىگىن قاعىپ جۇرگەندە, بىرنەشە كۇن جاتىپ قالادى. ال «سالاماتتى قازاقستان» پو-يىزىندا دارىگەرلەر ءسۇت ءپىسىرىم ۋاقىتتا ادامداردى تىڭداپ, ءتۇرلى اپپاراتتارىمەن تەكسەرىپ, ەمىن جازىپ بەرىپ تە ۇلگەرەدى. ورىنباسار سەرىكجانقىزى دا «سالاماتتى قازاقستان» پويىزىنداعى دارىگەرلەردىڭ بارلىعىنا قارالدى, ءىش قۇرىلىسىن اپپاراتتارعا ءتۇسىردى, مازالايتىن اۋرۋىن ايتتى. دارىگەرلەرى قانداي بىلىكتى, قاراپايىم, كىشىپەيىل دەسەيشى. مازالايتىن ناۋقاسىنا بايلانىستى ورىنباسار قالىباەۆانى نەۆروپاتولوگ دارىگەر گۇلنار يبەنتاەۆا قابىلداپ, وستەوحوندروز اۋرۋىنىڭ نەدەن بولاتىنىن, ودان قالاي ەمدەلۋ كەرەكتىگىن, قانداي دارىلەر قابىلداۋ قاجەتتىگىن ءتۇسىندىردى.
– «سالاماتتى قازاقستان» پويىزىنىڭ دارىگەرلەرىنە وتە ريزامىن. گۇلنار شاباليقىزىنىڭ بىلىكتىلىگىنە, قاراپايىم مادەنيەتتىلىگىنە العىسىم شەكسىز. راسىن ايتسام, ستانسا ءبىر بۇيىردە جاتقاندىقتان, سوناۋ اۋدان ورتالىعىنا, قوستانايعا بارا بەرەتىن مۇمكىندىگىمىز از. دارىگەردىڭ ايتقان ەمىن جاسايمىن, ءازىر اۋرۋحاناعا جاتۋعا قاجەتتىلىك جوق ەكەنىن ءتۇسىندىردى, – دەپ ريزاشىلىعىن ءبىلدىردى و.قالىباەۆا. وعان پويىزدىڭ توقتايتىنىن ەستىپ كەلىپ تۇرعان بەرىك باقىتجانوۆ تا قوسىلدى.
– اۋىلداعىلارعا وسىلاي كوڭىل ءبولىپ وتىرعان ەلباسىنا, ۇكىمەتىمىزگە ريزامىز. اۋىل شالعاي بولعاندىقتان باس اۋىرىپ, بالتىر سىزداسا دا جۇگىرىپ ورتالىققا بارا بەرمەيمىز. الداعى ۋاقىتتا «سالاماتتى قازاقستان» پويىزى شالعايداعى ەلدى مەكەندەردى بارىنشا كوپ قامتىسا دەگەن تىلەك بار, – دەدى بەرىك ايتباي ۇلى.
پويىزدا گينەكولوگ, نەۆروپاتولوگ, كارديولوگ, حيرۋرگ, وفتالمولوگ, پەدياتر, وتولارينگولوگ, ستوماتولوگ, رەنتگەنولوگ, ەندوسكوپيست, ۋزي سەكىلدى ون بەس مامان بار.
– ءبىزدىڭ اۋرۋحانا ماماندارى مامانداندىرىلعان الەۋمەتتىك پويىزدار جۇمىسىنا جىل سايىن قاتىسىپ ءجۇر. تاجىريبەسى مول, بىلىكتى ماماندار قىزمەتىنە تۇرعىندار ريزا. دارىگەرلەر پويىزدا دەمالىسسىز جۇمىس ىستەيدى, ولار تەمىرجولشىلار مەن شالعاي اۋىلداردىڭ تۇرعىندارىن كوبىرەك قامتۋدى باستى ماقساتى ەتىپ وتىر. مەديتسينالىق كومەكتىڭ بارلىعى اقىسىز كورسەتىلەدى. ءوزىنىڭ دەنساۋلىعى ءۇشىن الاڭدايتىن, بىراق وبلىس ورتالىعىنداعى ەمحانالارعا بارۋعا مۇمكىندىگى جوق ازاماتتار تەكسەرىلۋىنە, دارىگەرلەرگە ءوزىن تولعاندىرعان سۇراقتار قويۋىنا بولادى, – دەيدى قوستاناي تەمىر جول اۋرۋحاناسى باس دارىگەرىنىڭ ورىنباسارى ءمارزيا ەسقازينا.
ء نازيرا جارىمبەت,
«ەگەمەن قازاقستان»
قوستاناي
