بۇل كۇن ءبىزدىڭ مەملەكەتىمىزدىڭ دەموكراتيالىق نەگىزدەرىنىڭ مىزعىماستىعىن, ادام قۇقىقتارى مەن بوستاندىقتارىنىڭ سالتاناتىن, ەلىمىزدىڭ بولاشاعى ءۇشىن ارقايسىمىزدىڭ ازاماتتىق بورىشىمىز بەن جاۋاپكەرشىلىگىمىزدى سەزىنۋدى بىلدىرەدى. قوعامداعى بىرلىك پەن كەلىسىمنىڭ ارقاسىندا ءبىز قاۋىپسىز ءومىر ءسۇرىپ, ەڭبەك ەتەمىز, وتباسىن قۇرىپ, بالالاردى تاربيەلەپ, بولاشاعىمىزعا جوسپار قۇرا الامىز. كونستيتۋتسيا بارلىق قۇقىقتىق جۇيەنىڭ نەگىزى بولا وتىرىپ, قازاقستاننىڭ تۇراقتى جانە دايەكتى دامۋىن قامتاماسىز ەتەدى. ول ءار ادامنىڭ, بۇكىل قوعامنىڭ شىعارماشىلىق الەۋەتىن ىسكە اسىرۋعا كەڭ مۇمكىندىكتەر اشادى. ەلىمىزدىڭ تاۋەلسىزدىك جىلدارىندا قول جەتكىزگەن تابىستارى, سونداي-اق ءبىزدىڭ الدىمىزعا قويعان جوسپارلارىمىز بەن مىندەتتەرىمىزدىڭ اۋقىمى ءبىزدىڭ كونستيتۋتسيامىزدىڭ جاسامپازدىق الەۋەتىن بەينەلەيدى.
2017 جىل قوعامىمىزدىڭ جان-جاقتى تەرەڭ جاڭعىرۋىنا تىڭ سەرپىن بەردى. ول ءححى عاسىردا ءبىزدىڭ حالقىمىزدىڭ جاھاندىق باسەكەگە قابىلەتتىلىگىن قامتاماسىز ەتۋگە باعىتتالعان. بۇگىنگى تاڭدا مەملەكەت, قوعام, ءاربىر ازامات ءۇشىن باستى مىندەتتەرىنىڭ ءبىرى اۋەلى سانانىڭ جاڭعىرۋى بولىپ تابىلادى. ءبىزدىڭ رەفورمالارىمىزدىڭ تابىستى جۇزەگە اسىرىلۋى رۋحاني جاڭعىرۋعا, سونداي-اق ۇلتتىق بىرلىگىمىز بەن تاتۋلىعىمىزدى نىعايتۋعا تىكەلەي بايلانىستى. سانانىڭ اشىقتىعى مەن وزگەرىستەرگە دايىن بولۋ, باسەكەگە قابىلەتتىلىك پەن پراگماتيزم, ءبىلىمدى بولۋعا ۇمتىلۋ جانە وزگەلەردەن ۇيرەنۋ قابىلەتى, حالقىمىزعا ءتان اسىل قاسيەتتەردى ساقتاۋ جانە ۇرپاقتار ساباقتاستىعىن قامتاماسىز ەتۋ رۋحاني جاڭعىرۋدىڭ ناتيجەسى بولۋى ءتيىس.
قىمباتتى قازاقستاندىقتار!
وسى ايتۋلى مەرەكە كۇنى سىزدەرگە زور دەنساۋلىق, باقىت, قۇت-بەرەكە تىلەيمىز! ءار شاڭىراقتا بىرلىك پەن كەلىسىم, ىرىس پەن ىنتىماق ورناسىن, بۇل مەرەكە ەلىمىزدىڭ بولاشاعى مەن وتانىمىزدىڭ يگىلىگى جولىنداعى ماقساتتارعا قول جەتكىزۋگە كۇش-جىگەر بەرىپ, سەنىمدىلىك ۇيالاتادى! ەلىمىزدىڭ ىرگەسى امان, كەلەشەگى كەمەل بولسىن!
قازاقستان حالقى اسسامبلەياسىنىڭ كەڭەسى
