جارىستىڭ التىنشى كۇنى تاەكۆوندوشى قىزىمىز جانسەل دەنيز 73 كيلو سالماق دارەجەسىندە سىنعا ءتۇسىپ, التىن جۇلدە ءۇشىن بولعان باسەكەدە وڭتۇستىككورەيالىق لي دا بيننەن 11:34 ەسەبىمەن جەڭىلىپ قالدى.
ۋنيۆەرسيادانىڭ كۇمىس جۇلدەگەرى فينالعا دەيىن سيۋزان روزە بارنەتت (چيلي), يانا شنايدەر (گەرمانيا) جانە ميتسي تولەدونى (مەكسيكا) جارىس جولىنان شىعاردى. ال جارتىلاي فينالدا تۇركيالىق سيۋدە بۋلۋتتان باسىم تۇسكەن بولاتىن.
ال بۇرناعى كۇنى قازاقستاننىڭ تاەكۆوندودان ەرلەر اراسىنداعى قۇراماسى جارتىلاي فينالدا رەسەي كومانداسىنان 10:18 ەسەبىمەن جەڭىلىپ, قولا جۇلدەنى قاناعات ەتتى. ءبىزدىڭ كوماندانىڭ قۇرامىندا نۇرسۇلتان ماماەۆ, سۇلتان قاليبەك ۇلى جانە سمايىل دۇيسەباي ونەر كورسەتتى.
جازعى ۋنيۆەرسيادا سىنىنداعى جالپىكوماندالىق ەسەپتە جاپونيا اتلەتتەرى 74 مەدالمەن (29 التىن, 18 كۇمىس جانە 27 قولا) كوش باستاپ كەلەدى. ەكىنشى ورىنعا تابان تىرەگەن وڭتۇستىك كورەيا قۇراماسىنىڭ ەنشىسىندە 69 جۇلدە بار (26, 18, 25). ال ازىرگە ۇزدىك ۇشتىكتى تۇيىندەگەن تايۆان قۇراماسى 55 مەدال جەڭىپ الدى. ونىڭ 17-ءسى التىن, 22-ءسى كۇمىس جانە 16-سى قولا مەدال.
قازاقستاندىق ستۋدەنتتەر ازىرگە 3 التىن, 4 كۇمىس جانە 6 قولا جۇلدەمەن (بارلىعى – 13) 15-ءشى ورىندا كەلەدى.
قايرات ءابىلدا,
«ەگەمەن قازاقستان»
