سالتاناتتى ءراسىمدى تاماشالاۋعا پرەزيدەنت اكىمشىلىگىنىڭ جەتەكشىسى ادىلبەك جاقسىبەكوۆ, مادەنيەت جانە اقپارات ءمينيسترى ارىستانبەك مۇحامەدي ۇلى جانە استانا اكىمى اسەت يسەكەشەۆ كەلدى.
فەستيۆال شىمىلدىعىن اشقان قالا باسشىسى كەش قوناقتارىنا ساتتىلىك پەن تابىس تىلەدى. سونداي-اق, «استانا داۋىسى» فەستيۆالىندە ەلدىڭ مادەني ومىرىندە وزىندىك ورنى بار بەلگىلى ءانشى قايرات نۇرتاسقا ەستەلىك ءمۇسىن تابىستاپ تۇرىپ, مۇنداي فەستيۆالدەردىڭ ەلارالىق مادەني بايلانىستاردى تەرەڭدەتۋدە ىقپالى زور ەكەنىن اتاپ ءوتتى.
– ەلىمىزدە وسىنداي شارانىڭ وتكىزىلگەنىنە قۋانىشتىمىن. بۇگىن ءتۇرلى مەملەكەتتەردىڭ تانىمال انشىلەرىمەن ءبىر ساحنادا ونەر كورسەتتىم. وسى كەشتە گريگوري لەپسپەن تانىستىم. كۇزگە سالىم جوسپارلاپ وتىرعان جەكە كونتسەرتىمدە بىرگە ونەر كورسەتەمىز,– دەپ كۇلدى قايرات نۇرتاس. – مۇنداي شارالار ءتۇرلى مادەني ىنتىماقتاستىق ورناتۋعا مۇمكىندىك بەرەدى. بۇل – قاجەتتى ءىس, مەن ونى قولدايمىن.
ساحناعا العاشقىلاردىڭ ءبىرى بولىپ شىققان ۋكراينالىق سۆەتلانا لوبودانى كورەرمەن ىستىق ىقىلاسپەن قارسى الدى. مۋز-تۆ 2017 پرەمياسىندا «ۇزدىك ءان» اتالىمى بويىنشا جۇلدەلى ورىن العان «تۆوي گلازا» انىمەن كەشتىڭ اجارىن اشا ءتۇستى. ءۇزىلىس اراسىندا ءانشى فەستيۆالدىڭ ومىرشەڭ بولۋىنا تىلەكتەستىك ءبىلدىردى.
– مەن استانانى جاقسى كورەمىن, جاقىن ارادا استانادا جەكە كونتسەرتىمدى بەرەمىن دەپ ويلايمىن. بارلىق ۇيىمداستىرۋشىلارعا وسىنداي ادەمى شارالار وتكىزۋدى تىلەيمىن, بۇل اسا قاجەت نارسە, – دەدى سۆەتلانا. مۇنىمەن قوسا, ارتيست العاش رەت قازاق ۇلتتىق تاعامدارىنان ءدام تاتقانىن, سونداي-اق, استانادا ۇلتتىق تاعامداردىڭ ەرەكشە مادەنيەتى قالىپتاسقانىن اتاپ ءوتتى.
سالتاناتتى شارا بارىسىندا البانيالىق Arilena Ara, نيدەرلاندى ءارتيسى Eva Simons, شۆەتسيالىق Arash, گرۋزيادان حۆيچا كۆاراتسحەليا, رۋمىنيالىق DJ Sava سىندى جۇلدىزدار ونەرىن ورتاعا سالدى. بەلورۋس ءانشىسى «بيانكانىڭ» «مۋزىكا» كومپوزيتسياسىن كورەرمەن قاۋىم شاتتانا قابىل الدى. ونىڭ ءىزىن الا ساحنا تورىنە تۇركيادان كەلگەن Ilyas Yalcintas, مولداۆيالىق Sunstroke Project جانە اقش وكىلى Polina شىقتى. دۋماندى كەشتىڭ سوڭىن قوناقتار تاعاتسىزدانا كۇتكەن ءانشى گريگوري لەپس قورىتىندىلادى. انشىلەردىڭ ارقايسىسىنا مۋزىكا سالاسىنىڭ دامۋىنا ۇلەس قوسقاندارى ءۇشىن ديپلوم مەن ەستەلىك مۇسىندەر تابىس ەتىلدى.
فەستيۆالدى تاماشالاعان قوناقتار دا ءۇزىلىس اراسىندا ءوز پىكىرلەرىمەن ءبولىسىپ جاتتى. سولاردىڭ اراسىندا كەشتى تاماشالۋعا كەلگەن مۋز-تۆ تەلەارناسىنىڭ باس ديرەكتورى ارمان داۆلەتياروۆ مۋزىكا مەرەكەسىن تارتۋ ەتكەن قالا اكىمدىگىنە العىسىن جەتكىزدى.
– بىرىنشىدەن, قازاقستانعا كەلگەنىمە قۋانىشتىمىن, مۇندا الەم ەلدەرىنىڭ ەڭ ۇزدىك ارتيستەرى باس قوستى. مەن ولاردىڭ ارقايسىسىمەن تانىسىپ, ەستەلىك سۋرەتكە تۇسۋگە نيەتتىمىن. ءتىپتى, رەسەيدە دە مۇنداي دەڭگەيدەگى فەستيۆال وتكەن ەمەس, سول سەبەپتى ۇيىمداستىرۋشىلارعا, قالا اكىمدىگىندە وسىنداي مۋزىكا مەرەكەسىن تارتۋ ەتكەندەرى ءۇشىن العىس ايتامىن. وسى جولى قازاقستانعا مەنىمەن بىرگە ەكى ۇلىم كەلدى, ولار مۇندا بولعان ەمەس. ەكەۋى تاڭەرتەڭنەن بەرى ەكسكۋرسياعا بارىپ, كەيىن تۇنىمەن كورگەندەرىن اڭگىمەلەپ شىعادى. العان اسەرلەرى كەرەمەت. دومبىرا, قامشى, جەبە ساتىپ الىپتى. قوناق ۇيدەگى بولمەمىز شاعىن كيىز ۇيگە اينالعانداي. ۇلدارىم ۇيگە قايتقىسى كەلمەيدى. استاناعا تاعى دا كەلۋگە اسىق. سول سەبەپتى جىلى قابىلداپ, قۇرمەت كورسەتكەن قازاقستاندىقتارعا مىڭ العىس,– دەپ اعىنان جارىلدى ارمان داۆلەتياروۆ.
ايا ءومىرتاي,
«ەگەمەن قازاقستان»
