ۇلتتىق ساياساتتىڭ جەمىسى

مەملەكەت باسشىسىنىڭ اتىنا وڭتۇستىك قازاقستان وبلىسى, تولە بي اۋدانىنىڭ قۇرمەتتى ازاماتى, ءبىلىم بەرۋ سالاسىنىڭ ارداگەرى سۆەتلانا سەرگەەۆنا حومەنكودان حات كەلدى, دەپ حابارلادى قازاقستان رەسپۋبليكاسى پرەزي­دەنتىنىڭ ءباسپاسوز قىزمەتى. اۆتور ءوز حاتىندا ەلباسى ن.ءا.نازارباەۆتى الدا كەلە جات­قان ەل تاۋەلسىزدىگىنىڭ 20 جىل­دى­عىمەن قۇتتىقتاي وتىرىپ, جاڭا قازاقستاننىڭ قارىشتاپ دامۋى جانە الەمدىك ارەناداعى بەدەلىنىڭ كۇن ساناپ ءوسىپ وتىر­عانى, ەڭ الدىمەن, پرەزيدەنتتىڭ ەسىمىمەن تىكەلەي بايلانىستى ءارى ەرەن ەڭبەگىنىڭ ناتيجەسى ەكەنىن زور ماقتانىش سەزىممەن جازادى. ودان ءارى حاتتا بىلاي دەلىنگەن: «قازاقستان بۇگىندە ءسىز جانە كەلەشەك ۇرپاقتار ماقتان ەتەتىن ءوز تاريحىنىڭ جاڭا بەتتەرىن جازۋدا. بۇگىنگى ءبىزدىڭ رەس­پۋبليكامىز – كۇللى الەمگە تا­نىل­عان, اشىق جانە گۇلدەنگەن ەل. 90-جىلدارداعى قازاقستان مەن بۇگىنگى قازاقستاننىڭ ارا­سىن­دا قانشاما وراسان ايىرما­شى­لىقتار بار دەسەڭىزشى! ول كەزدە قالاي ءومىر سۇرەمىز دەپ الاڭدادىق, ال قازىر جاقسى ءومىر ءسۇرىپ كەلەمىز. ول ۋاقىتتا كۇي­رە­گەن ەكونوميكانىڭ قاي با­عىت­قا بۇرىلاتىنىن بىلمەي سار­ساڭ­عا تۇستىك, ال قازىر ەلىمىز كوز ال­دى­مىزدا وركەندەپ كەلەدى. 90-جىل­دارى ءسىزدىڭ «قازاقستان-2030» ستراتەگياڭىزبەن ەڭ العاش تانىسقانىم ەسىمدە. شىنىن ايتسام, ول ۋاقىتتا جولىمىزدا تالاي قيىندىقتار تۇرعان­دىق­تان, كۇردەلى كەزەڭدەر بول­عان­دىق­تان, ستراتەگيانىڭ ىسكە اساتىنىنا سەنۋ وڭاي ەمەس-ءتى. الايدا, ءسىز بولاشاق ۇرپاقتار ءۇشىن ۇلكەن جەتىستىكتەرگە جەتەتىن مەملەكەتتى جاڭادان قۇرا­تى­نىڭىزعا سەنگەن, الداعىنى 100-200 جىل بۇرىن كورە بىلەتىن قايراتكەر ادامدار قاتارىنان ەكەنىڭىزدى ەندى ءبىلىپ وتىرمىز. وسىنشاما قىسقا مەرزىمدە ءبىز­دىڭ ەلىمىز تاڭدانارلىق جەتىستىكتەرگە قول جەتكىزگەنىنە ءسۇي­سى­نەمىز. قازاقستاندىقتاردىڭ كىرىسى ارتۋدا, ەڭبەكاقى مەن زەي­نەت­اقى كولەمى وسۋدە. ءبىز, ءبىلىم بەرۋ سالاسىنىڭ ارداگەرلەرى قا­زاقستاندا زاماناۋي مەكتەپتەر پايدالانۋعا بەرىلىپ, ول ءبىلىم وردالارىنا وقۋشىلار  مەن مۇعالىمدەردىڭ زور قۋا­نىش­­­­پەن كىرىپ جاتقاندارىن كورىپ, شاتتانۋدامىز. 1997 جىلى ءسىز ورتا ءبىلىم بەرۋ جۇيەسىن اقپا­رات­تان­دىرۋ مەملەكەتتىك باعدارلاماسى تۋرالى ايتتىڭىز. قازىر بۇل ءسوز شىندىققا اينالدى. ءبىزدىڭ رەس­پۋب­ليكانىڭ بارلىق مەكتەپتەرى, اسىرەسە, اۋىلدىق جانە قالا مەكتەپتەرى كومپيۋتەرمەن جابدىق­تال­عان, ينتەرنەت جۇيەسىنە قو­سىلعان. بۇل – زور جەتىستىك. ءوزىڭىز ۇنەمى ايتاتىنداي, XXI عاسىر –    جاڭا تەحنولوگيالار مەن كوممۋنيكاتسيا عاسىرى. جاستارىمىزعا جاڭا تەحنولوگيانى مەڭگەرۋ ءۇشىن مەملەكەت تاراپىنان بارلىق قام­قورلىقتار جاسالۋدا. مەن پەداگوگ, قازاقستان ازاماتشاسى, انا جانە اجە رەتىندە سىزبەن تولىق كەلىسەمىن, لايىقتى ءبىلىم الۋ – قا­زاق­ستاننىڭ باسەكەگە قابىلەتتىلىگىن قامتاماسىز ەتۋگە مۇمكىندىك بەرەتىن ماڭىزدى قۇرال». حات يەسى ودان ءارى ەلىمىزدە تى­نىشتىقتىڭ, بەيبىتشىلىك پەن كەلى­سىمنىڭ, ءارتۇرلى ۇلت وكىلدەرى ارا­سىن­دا ءوزارا تۇسىنىستىك پەن ىن­تىماقتاستىقتىڭ ورناۋى قازاق­ستان­داعى ۇلتتىق ساياساتتىڭ جەمىسى ەكەنىن ايتا كەلىپ, ەلباسىنىڭ ەل مۇددەسى جولىنداعى قىزمەتىنە تولايىم تابىس, باقىت جانە زور دەنساۋلىق تىلەيدى.